Sea Fish vs River Fish: கடல் மீனா, ஆத்து மீனா? எது உடம்புக்கு ரொம்ப நல்லது? முழு விவரம் உள்ளே!

Sea Fish vs River Fish: மீன் சாப்பிடுவது உடலுக்கு ரொம்ப நல்லது. இதில் புரோட்டீன், வைட்டமின்கள், தாதுக்கள்னு ஏகப்பட்ட சத்துக்கள் இருக்கு. ஆனா, கடல் மீன், ஆத்து மீன்... இதுல எதைச் சாப்பிட்டா உடம்புக்கு அதிக நன்மை கிடைக்கும்? வாங்க பார்க்கலாம்.

கடல் மீன் vs ஆத்து மீன்

அசைவப் பிரியர்களுக்கு மீன் என்றால் ஒரு தனி ருசி என்றே கூறலாம். ருசிக்கு மட்டுமல்ல, உடலுக்குத் தேவையான வைட்டமின்கள், புரோட்டீன், தாதுக்கள், ஆரோக்கியமான கொழுப்பு அமிலங்கள் என எல்லாமே இதில் இருக்கு. ஆனால், மீன் வாங்கும்போது நம்மில் பலருக்கும் ஒரு சந்தேகம் வரும். கடல் மீன் நல்லதா? இல்லை ஆத்து மீன் நல்லதா? இந்த ரெண்டில் எது ஆரோக்கியத்திற்கு அதிக நன்மை தரும்? நிபுணர்கள் என்ன சொல்கிறார்கள் என்று பார்ப்போம். மீனின் வகை, அது வளரும் சூழல், சாப்பிடும் உணவு ஆகியவற்றைப் பொறுத்து, மீன்களில் உள்ள ஊட்டச்சத்துக்களின் அளவு மாறுபடும். கடல் மீனுக்கும் ஆற்று மீனுக்கும் என்ன வித்தியாசம், எதைச் சாப்பிட்டால் அதிக சத்துக்கள் கிடைக்கும் என்பதை இப்போது பார்க்கலாம்.

கடல் மீன்கள் (Sea Fish)

சாப்பாட்டுப் பிரியர்களுக்கு மட்டுமல்ல, இதய ஆரோக்கியத்தில் அக்கறை உள்ளவர்களுக்கும் கடல் மீன்கள் ஒரு சிறந்த தேர்வு. இவை இதய ஆரோக்கியத்தைப் பாதுகாக்க உதவுகின்றன. ஒமேகா-3 புதையல்: கடல் மீன்களில் 'ஒமேகா-3 கொழுப்பு அமிலங்கள்' (EPA & DHA) மிக அதிக அளவில் உள்ளன. இவை நமது இதயம், மூளை மற்றும் கண் ஆரோக்கியத்திற்கு மிகவும் நன்மை பயக்கும். தரமான புரோட்டீன் & தாதுக்கள்: எளிதில் ஜீரணமாகும் புரோட்டீன், அயோடின், வைட்டமின்-டி, கால்சியம், பாஸ்பரஸ் போன்ற தாதுக்கள் இதில் ஏராளமாக உள்ளன. கவனிக்க வேண்டியவை: சுறா, வாள்மீன் போன்ற பெரிய கடல் மீன்கள் நீண்ட காலம் வாழ்வதால், அவற்றின் உடலில் 'பாதரசம்' (Mercury) சேர வாய்ப்புள்ளது. இந்த மீன்களை சாப்பிடும்போது, அதிலுள்ள பாதரசம் நரம்பு மண்டலத்தைப் பாதிக்கலாம். எனவே கர்ப்பிணிகள், பாலூட்டும் தாய்மார்கள், மற்றும் சிறு குழந்தைகள் பெரிய கடல் மீன்களைத் தவிர்ப்பது நல்லது. சிறிய வகை கடல் மீன்களைச் சாப்பிடுவது பாதுகாப்பானது.

ஆற்று மீன்கள் / நன்னீர் மீன்கள் (Freshwater Fish)

நம்ம ஊர் சந்தைகளில் சுலபமாகக் கிடைக்கும் ஆற்று மீன்கள், குளத்து மீன்களிலும் நிறைய நல்ல பலன்கள் உள்ளன.

சிறந்த புரோட்டீன் ஆதாரம்: உடல் தசைகளின் வளர்ச்சிக்கும், செல்களைப் பழுதுபார்க்கவும் தேவையான உயர்தர புரோட்டீன் ஆற்று மீன்களில் நிறைந்துள்ளது. கடல் மீன்களுடன் ஒப்பிடும்போது, ஆற்று மீன்களில் பாதரசம் (Mercury) இருக்கும் அபாயம் மிகக் குறைவு. எனவே கர்ப்பிணிகள், சிறு குழந்தைகள் உட்பட அனைவரும் இதை அச்சமின்றி சாப்பிடலாம்.

எலும்புகளுக்கு வலு: விரால், கெண்டை போன்ற ஆற்று மீன்களையும், சிறிய வகை நன்னீர் மீன்களையும் முள்ளுடன் சேர்த்து சாப்பிட்டால், உடலுக்கு அதிக அளவில் கால்சியம் கிடைக்கும்.

ஒமேகா-3 அளவு: இவற்றிலும் ஒமேகா-3 கொழுப்பு அமிலங்கள் உள்ளன, ஆனால் கடல் மீன்களுடன் ஒப்பிடும்போது இதன் அளவு சற்று குறைவாக இருக்கும்.

சமைக்கும்போது கவனம்: எவ்வளவு நல்ல மீனாக இருந்தாலும், அதிக உப்பு போட்டு, எண்ணெயில் பொரித்தால் (Deep Fry) அதன் சத்துக்கள் அனைத்தும் அழிந்துவிடும். அதுமட்டுமின்றி, அது ஆரோக்கியத்திற்கும் தீங்கு விளைவிக்கும். எனவே மீன் குழம்பு, கிரில் செய்தது அல்லது குறைந்த எண்ணெயில் வேகவைத்த மீன்களைச் சாப்பிடுவது ஆரோக்கியத்திற்கு மிகவும் நல்லது.

ஒமேகா-3 அதிகம் வேண்டுவோர் கடல் மீன்களையும், பாதரசம் பற்றிய பயமின்றி பாதுகாப்பான புரோட்டீன் வேண்டுவோர் ஆற்று மீன்களையும் தேர்ந்தெடுக்கலாம். இரண்டையும் மாற்றி மாற்றி உணவில் சேர்த்துக்கொள்வதே சிறந்த வழி.