கரப்பான் பூச்சிகள் நோய்களைப் பரப்பும் ஆபத்தானவை என்பதால், அவற்றை வீட்டிலிருந்து விரட்டுவது அவசியம். எளிய வீட்டுப் பொருட்களைப் பயன்படுத்தியும், சமையலறையை சுத்தமாக வைத்திருப்பதன் மூலமும் இந்த தொல்லையிலிருந்து நிரந்தரமாக விடுபடலாம்.
இரவு நேரத்தில் சமையலறைக்குள் லைட்டை போட்டவுடன் சட்டென்று ஓடி சுவரின் ஓரத்தில் மறையும் கரப்பான் பூச்சிகளைப் பார்த்து அதிர்ச்சியடையாதவர்கள் இருக்க முடியாது. வீட்டை எவ்வளவு சுத்தமாக வைத்தாலும், ஒரு கட்டத்தில் இந்த தொல்லை தலைதூக்கிவிடும். ஆனால், கரப்பான் பூச்சிகள் வெறும் அருவருப்பை மட்டுமே ஏற்படுத்துகின்றன என்று நினைத்தால் அது தவறு. அவை பல்வேறு நோய்களை பரப்பும் ஆபத்தான பூச்சிகளாகவும் கருதப்படுகின்றன. சில எளிய பழக்கங்களையும், வீட்டிலேயே இருக்கும் பொருட்களையும் பயன்படுத்தினாலே இந்த தொல்லைக்கு முற்றுப்புள்ளி வைக்க முடியும்.
29
கரப்பான் பூச்சிகள் ஏன் ஆபத்தானவை?
கரப்பான் பூச்சிகள் பொதுவாக குப்பைகள், கழிவுநீர் பகுதிகள், அழுகிய உணவுப் பொருட்கள் போன்ற இடங்களில் சுற்றித் திரிகின்றன. பின்னர் அதே பூச்சிகள் நமது சமையலறை பாத்திரங்கள், உணவுப் பொருட்கள் மற்றும் சமையல் மேசைகளில் ஊர்ந்து செல்லும். இதன் மூலம் உணவு மாசுபடுவதோடு, உணவு நச்சாதல், வயிற்றுப்போக்கு, சால்மோனெல்லா போன்ற பாக்டீரியா தொற்றுகள் ஏற்படும் அபாயமும் அதிகரிக்கிறது. குறிப்பாக குழந்தைகள் மற்றும் ஆஸ்துமா, ஒவ்வாமை பிரச்சினை உள்ளவர்களுக்கு இவை பெரிய பாதிப்பை ஏற்படுத்தக்கூடும்.
39
கரப்பான் பூச்சிகள் வீட்டுக்குள் வருவதற்கு காரணம் என்ன?
வீட்டில் எங்காவது உணவுத் துகள்கள் சிதறிக் கிடந்தாலோ, கழுவாமல் பாத்திரங்கள் குவிந்திருந்தாலோ, கரப்பான் பூச்சிகளுக்கு அது விருந்தாகிவிடும். அதேபோல், குழாய் கசிவு, ஈரமான சிங்க், குளியலறை மூலைகள் போன்ற இடங்களும் அவற்றின் விருப்பமான தங்குமிடங்களாகும். அடுப்பின் பின்புறம், அலமாரியின் கீழ், கார்ட்போர்டு பெட்டிகள் போன்ற இருண்ட பகுதிகளும் அவற்றுக்கு பாதுகாப்பான மறைவிடமாக மாறுகின்றன. சுவற்றில் இருக்கும் சிறிய விரிசல்கள் மற்றும் திறந்த வடிகால்கள் வழியாகவும் அவை வீட்டிற்குள் நுழைகின்றன.
வீட்டிலேயே இருக்கும் பொருட்களால் கரப்பான் பூச்சிகளை விரட்டலாம்
கரப்பான் பூச்சிகளை விரட்டுவதற்கு விலை உயர்ந்த மருந்துகள் அவசியமில்லை. வீட்டிலேயே இருக்கும் சில பொருட்களைக் கொண்டு நல்ல பலனைப் பெறலாம்.
பேக்கிங் சோடாவையும் சர்க்கரையையும் சம அளவில் கலந்து, கரப்பான் பூச்சிகள் வரும் இடங்களில் தூவலாம். சர்க்கரையின் மணத்தால் ஈர்க்கப்படும் பூச்சிகள் அந்தக் கலவையை உண்ட பிறகு அழிந்து போகும்.
அதேபோல், மாவு, சர்க்கரை மற்றும் போரிக் அமிலத்தை கலந்து சிறிய உருண்டைகளாக செய்து, குழந்தைகள் மற்றும் செல்லப்பிராணிகள் எட்டாத இடங்களில் வைத்தால் கரப்பான் பூச்சிகளின் எண்ணிக்கை வேகமாக குறையும். இது மிகவும் பிரபலமான மற்றும் குறைந்த செலவிலான வழிமுறையாகும்.
59
இயற்கை வாசனைகளும் நல்ல தீர்வுதான்
கரப்பான் பூச்சிகளுக்கு சில இயற்கை மணங்கள் பிடிக்காது.
வெள்ளரிக்காய் துண்டுகளை கரப்பான் பூச்சிகள் அதிகம் வரும் இடங்களில் வைத்தால் அவை அந்தப் பகுதியைத் தவிர்க்கத் தொடங்கும்.
வேப்பெண்ணெயை சிறிதளவு தண்ணீரில் கலந்து ஸ்ப்ரே பாட்டிலில் நிரப்பி, சமையலறை மூலைகள் மற்றும் சுவர் ஓரங்களில் தெளிக்கலாம். வேப்பெண்ணெய் இயற்கையான பூச்சி விரட்டியாக செயல்படுகிறது.
அதேபோல், லாரல் இலைகளை நசுக்கி அலமாரி மற்றும் சமையலறை மூலைகளில் வைத்தாலும் அதன் மணம் கரப்பான் பூச்சிகளை அண்டவிடாது.
69
வெள்ளை வினிகரும் உதவியாக இருக்கும்
வெள்ளை வினிகரும் தண்ணீரும் சம அளவில் கலந்து சமையலறை மேசை, சிங்க் மற்றும் தரையை தினமும் துடைத்தால் நோய்க்கிருமிகள் குறைவதோடு, கரப்பான் பூச்சிகளும் அந்த இடத்தில் தங்க விரும்பாது. சுத்தமான சமையலறை கரப்பான் பூச்சிகளுக்கு மிகவும் பிடிக்காத சூழலாக மாறிவிடும்.
79
இந்த பழக்கங்கள் இருந்தால் கரப்பான் பூச்சிகளுக்கு இடமே இருக்காது
இரவு தூங்குவதற்கு முன் சமையலறையை சுத்தம் செய்து விடுவது மிகவும் முக்கியம். உணவுப் பொருட்களை திறந்த நிலையில் வைக்காமல் மூடி வைக்க வேண்டும். குப்பைத் தொட்டியை எப்போதும் மூடியுடன் வைத்திருந்து தினமும் காலி செய்ய வேண்டும். வீட்டில் எங்காவது தண்ணீர் கசிவு இருந்தால் உடனடியாக சரி செய்ய வேண்டும். சுவற்றில் இருக்கும் சிறிய விரிசல்களையும் அடைத்து விட வேண்டும். அதேபோல், அழுக்கு பாத்திரங்களை இரவு முழுவதும் அப்படியே வைக்காமல் உடனடியாக கழுவி விடுவது நல்லது. வாரத்திற்கு ஒருமுறை அலமாரி மற்றும் சமையலறை மூலைகளை முழுமையாக சுத்தம் செய்வதும் அவசியம்.
89
தொல்லை அதிகமாக இருந்தால் என்ன செய்ய வேண்டும்?
வீட்டு வைத்தியங்கள் பலன் தராத அளவுக்கு கரப்பான் பூச்சிகள் அதிகமாக இருந்தால், தொழில்முறை பெஸ்ட் கண்ட்ரோல் சேவையைப் பயன்படுத்துவது சிறந்த தீர்வாக இருக்கும். தற்போது சந்தையில் கிடைக்கும் ஜெல் பெயிட்கள் மற்றும் பேயிட் டிராப்கள் நல்ல பலனை அளிக்கின்றன. ஆனால், குழந்தைகள் மற்றும் செல்லப்பிராணிகள் இருக்கும் வீடுகளில் தரமான மற்றும் நம்பகமான நிறுவனங்களின் பொருட்களை மட்டுமே பயன்படுத்துவது பாதுகாப்பானது. வீட்டில் யாரும் இல்லாத நேரத்தில் மற்றும் வெளியே செல்லும் விடுமுறை நாட்களில் பெஸ்ட் கண்ட்ரோல் சேவையை பயன்படுத்தவும். பெஸ்ட் கண்ட்ரோல் முறையை பயன்படுத்திய பிறகு 3 நாட்களுக்கு வீட்டில் தங்காமல் இருப்பது நல்லது. தங்க நேர்ந்தால் கதவு ஜன்னல்களை திறந்துவைத்து விட்டு தூங்க வேண்டும்.
99
கரப்பான் பூச்சிகளை நிரந்தரமாக விரட்டலாம்
கரப்பான் பூச்சிகள் சிறிய பூச்சிகளாக இருந்தாலும், அவை ஏற்படுத்தும் பாதிப்பு மிகவும் பெரியது. வீட்டின் சுத்தத்தை பராமரிப்பதுடன், இந்த எளிய இயற்கை வழிமுறைகளையும் தொடர்ந்து பின்பற்றினால், கரப்பான் பூச்சிகளை நிரந்தரமாக வீட்டை விட்டு விரட்ட முடியும். "இவ்ளோ நாள் இது தெரியாம போச்சே!" என்று நினைக்க வைக்கும் இந்த சின்னச் சின்ன டிப்ஸ்களை இன்றே பின்பற்றி, உங்கள் வீட்டை சுத்தமாகவும், ஆரோக்கியமாகவும் மாற்றுங்கள்.
ஏஷ்யாநெட் தமிழ் நியூஸின் லைஃப்ஸ்டைல் பிரிவு, வாசகர்களுக்கு வாழ்க்கை முறை, உறவுகள் மற்றும் நடைமுறை வாழ்க்கை குறித்து வளமான தகவல்களை வழங்குகிறது. இதில் ஆரோக்கிய ஆலோசனைகள், உணவு மற்றும் ஊட்டச்சத்து குறிப்புகள், ஃபாஷன் டிரெண்ட்ஸ் மற்றும் தினசரி வாழ்க்கையை மேம்படுத்தும் சிந்தனையூட்டும் கருத்துகள் அடங்கும்.
