உங்கள் பால்கனிக்கு பட்டாம்பூச்சிகளை ஈர்க்கும் 7 சிறந்த செடிகள்: பால்கனித் தோட்டக் குறிப்புகள்!

நகர அடுக்குமாடி பால்கனியை அழகாக்க, ஒருமுறை நட்டால் பல வருடங்கள் பூக்கும் பல்லாண்டுத் தாவரங்களை வளர்க்கலாம். இவை உங்கள் சிறிய வெளியை, வண்ணத்துப் பூச்சிகள் சிறகடிக்கும் குட்டிப் பூங்காவாக மாற்றி இயற்கையை வீட்டிற்கே கொண்டு வரும்.

லாவண்டர் :

லாவண்டர் செடியின் இதமான நறுமணமும், அதன் ஊதா நிறப் பூக்களும் பட்டாம்பூச்சிகளுக்கு மிகவும் பிடித்தமானவை. இதன் வாசனை மனிதர்களுக்கு மன அழுத்தத்தைக் குறைக்கும் தன்மையுடையது.

பராமரிப்பு: இதற்கு அதிக சூரிய ஒளி (குறைந்தது 6 மணிநேரம்) தேவைப்படும். பால்கனியின் வெயில் படும் பகுதியில் வைப்பது சிறந்தது. மண்ணில் தண்ணீர் தேங்கக் கூடாது.

பட்டாம்பூச்சி புஷ் :

பெயருக்கு ஏற்றாற்போலவே இது பட்டாம்பூச்சிகளின் காந்தம் என்று அழைக்கப்படுகிறது. இதன் தேன் நிறைந்த பூக்களின் வாசனை, சுற்றியுள்ள பட்டாம்பூச்சிகளை உங்கள் பால்கனி நோக்கி சுலபமாக ஈர்க்கும்.

பராமரிப்பு: இது சற்று பெரிய புதர் போல வளரக்கூடியது என்பதால், ஓரளவு பெரிய தொட்டியில் வளர்க்க வேண்டும். அவ்வப்போது கவாத்து (Pruning) செய்வது புதிய கிளைகளையும் பூக்களையும் உருவாக்கும்.

மில்க்வீட் :

மோனார்க் (Monarch) வகை பட்டாம்பூச்சிகளுக்கு மில்க்வீட் செடி மிகவும் முக்கியமானது. பட்டாம்பூச்சிகள் முட்டையிட்டு, அவற்றின் புழுக்கள் (Caterpillars) வளர்வதற்கு இந்த செடியின் இலைகள் மட்டுமே முக்கிய உணவாகப் பயன்படுகின்றன.

பராமரிப்பு: இதற்கு நல்ல வடிகால் வசதியுள்ள மண் தேவை. இலைகளைப் புழுக்கள் சாப்பிட்டாலும் கவலைப்பட வேண்டாம், அது பட்டாம்பூச்சியாக மாறுவதற்கான இயற்கை சுழற்சி மட்டுமே!

பர்பிள் கோன்ஃப்ளவர் :

வட்ட வடிவமான, பெரிய இதழ்களைக் கொண்ட இந்த மலர்கள் பார்ப்பதற்கு மிகவும் அழகாக இருக்கும். இதன் மையப்பகுதியில் அதிகளவு தேன் இருப்பதால் பட்டாம்பூச்சிகள் நீண்ட நேரம் இதன் மேல் அமர்ந்து தேன் குடிக்க விரும்பும்.

பராமரிப்பு: வறட்சியைத் தாங்கி வளரக்கூடியது. வாரத்திற்கு இரண்டு அல்லது மூன்று முறை தண்ணீர் ஊற்றினாலே போதுமானது.

சால்வியா :

நீண்ட குச்சிகள் போன்ற அமைப்பில் பூக்கும் சால்வியா மலர்கள், பால்கனித் தொட்டிகளில் வளர்க்க ஏதுவானவை. இதன் பிரகாசமான சிவப்பு, ஊதா மற்றும் நீல நிறங்கள் பட்டாம்பூச்சிகளை வெகு தொலைவில் இருந்தே கவர்ந்திழுக்கும்.

பராமரிப்பு: பூக்கள் பூத்து முடிந்தவுடன் அந்தப் பகுதியை வெட்டிவிட்டால், மீண்டும் புதிய மொட்டுகள் வைக்கும்.

மேரிகோல்ட் :

நம்ம ஊரில் சுலபமாகக் கிடைக்கக்கூடிய சாமந்திப் பூக்கள், பட்டாம்பூச்சிகளுக்குப் பிடித்தமான மற்றொரு தாவரமாகும். இதன் அடர்ந்த மஞ்சள் மற்றும் ஆரஞ்சு நிறங்கள் பால்கனிக்கு கூடுதல் அழகைத் தரும். மேலும், இது தேவையில்லாத பூச்சிகளைத் தோட்டத்திற்குள் வரவிடாமல் தடுக்கும்.

பராமரிப்பு: தினமும் மிதமான தண்ணீர் மற்றும் நல்ல சூரிய ஒளி இருந்தால் போதும், மிக வேகமாக வளரும்.

செடம் :

குறைந்த பராமரிப்பே தேவைப்படும் இந்தச் சதைப்பற்றுள்ள (Succulent) தாவரம், கோடையின் இறுதியிலும் இலையுதிர் காலத்திலும் அழகாகப் பூக்கும். மற்ற பூக்கள் குறையும் காலத்தில், பட்டாம்பூச்சிகளுக்கு இது சிறந்த உணவாதாரமாக மாறும்.

பராமரிப்பு: இதற்கு மிகக் குறைந்த தண்ணீரே தேவை. பால்கனியில் அதிக வெயில் படும் இடங்களில் தாராளமாக வைக்கலாம்.

பட்டாம்பூச்சிகளை ஈர்க்க சில கூடுதல் டிப்ஸ் :

சாயனங்களைத் தவிர்க்கவும்: பூச்சிக்கொல்லி மருந்துகள் மற்றும் ரசாயன உரங்களை உங்கள் பால்கனித் தோட்டத்தில் பயன்படுத்த வேண்டாம். இது பட்டாம்பூச்சிகளையும் அவற்றின் புழுக்களையும் அழித்துவிடும். இயற்கை உரங்களான மண்புழு உரம், தொழு உரம் ஆகியவற்றைப் பயன்படுத்தலாம்.

தண்ணீர் வசதி: ஒரு சிறிய தட்டில் அல்லது அகல் விளக்கில் தண்ணீர் ஊற்றி, அதில் சில கூழாங்கற்களைப் போட்டு வைக்கவும். பட்டாம்பூச்சிகள் கற்களின் மீது அமர்ந்து தண்ணீர் குடிக்க இது உதவும்.

வெயில் படும் இடம்: பட்டாம்பூச்சிகள் குளிர் இரத்தம் கொண்டவை (Cold-blooded), எனவே அவை சிறகடிக்க சூரிய வெப்பம் தேவை. உங்கள் பால்கனியில் வெயில் படும் திசையில் இந்தச் செடிகளை வரிசைப்படுத்துங்கள்.