Kerala Woman : காதல் திருமணம் செய்த அஸ்வதி.. திருமணமாகி ஒரு மாதம்தான் ஆகிறது.. ஆடிப்போன கேரளா

கேரளாவில் சமீபமாக இளம் பெண்கள் உயிரிழந்த சம்பவங்கள் கவலையை ஏற்படுத்தியுள்ளன. குடும்ப சூழ்நிலை மற்றும் சமூக அழுத்தங்கள் மீண்டும் விவாதத்திற்கு வந்துள்ளன.

புதுமண பெண் விவகாரம்

கேரள மாநிலத்தின் காசர்கோடு பகுதியில் இளம் புதுமண பெண் ஒருவர் உயிரிழந்த சம்பவம் சோகத்தையும் பல கேள்விகளையும் எழுப்பியுள்ளது. குட்டிக்கோல் பகுதியைச் சேர்ந்த 25 வயதான அஸ்வதி, காசர்கோட்டில் உள்ள தனியார் மருத்துவமனையில் நர்சாக பணியாற்றி வந்தார். பறக்களை பகுதியைச் சேர்ந்த ரூபாஷுடன் திருமணமான அவர், திருமண வாழ்க்கையை தொடங்கி ஒரு மாதமே ஆன நிலையில் உயிரிழந்த குடும்பத்தினரையும் உள்ளூர் மக்களையும் அதிர்ச்சியில் ஆழ்த்தியுள்ளது. சில நாட்களுக்கு முன்பு, காசர்கோட்டில் தங்கி வந்த வீட்டில் உடல்நலக்குறைவு ஏற்பட்ட நிலையில் அஸ்வதி கண்டுபிடிக்கப்பட்டதாக கூறப்படுகிறது.

காசர்கோடு சம்பவம்

உடனடியாக தனியார் மருத்துவமனையில் சேர்க்கப்பட்ட அவர், மேல் சிகிச்சைக்காக பரியாரம் மருத்துவக் கல்லூரி மருத்துவமனைக்கு மாற்றப்பட்டார். தொடர்ந்து சிகிச்சை அளிக்கப்பட்ட போதிலும், வியாழக்கிழமை இரவு அவர் உயிரிழந்தார். இந்த சம்பவம் குறித்து காசர்கோடு டவுன் போலீசார் சந்தேக மரண வழக்குப்பதிவு செய்து விசாரணை நடத்தி வருகின்றனர். அஸ்வதி மற்றும் அவரது கணவர் காதலித்து திருமணம் செய்துகொண்டவர்கள் என தகவல்கள் வெளியாகியுள்ளன.

குடும்ப பிரச்சனை

இந்த சம்பவம் நடைபெறும் நேரத்தில், காசர்கோடு மாவட்டத்தில் பெண்கள் உயிரிழந்த பிற சம்பவங்களும் கவனத்தில் கொள்ளப்பட்டுள்ளன. பெளூர் பகுதியில் திருமணமான இளம் பெண் ஒருவர் உயிரிழந்த சம்பவம் தொடர்பாக குடும்ப வன்முறைகள் முன்வைக்கப்பட்டுள்ளன. இதேபோல், செங்களா பகுதியில் நடந்த மற்றொரு சம்பவத்தில் வரதட்சணை புகாரைத் தொடர்ந்து போலீஸ் நடவடிக்கையும் மேற்கொள்ளப்பட்டுள்ளது. அடுத்தடுத்து நிகழும் இந்த சம்பவங்கள் குடும்ப உறவுகள், மனநல ஆதரவு மற்றும் சமூக பாதுகாப்பு குறித்த விவாதங்களை மீண்டும் முன்னிலைப்படுத்தியுள்ளன. அத்தகைய சூழல்களில் மனஅழுத்தம் அல்லது உதவி தேவைப்பட்டால், குடும்பத்தினரிடமோ அல்லது நிபுணர்களிடமோ உடனடியாக ஆலோசனை பெறுவது அவசியம் என சமூக ஆர்வலர்கள் வலியுறுத்துகின்றனர்.