உலக சாதனையுடன் களமிறங்கும் இந்தியாவின் முதல் ஹைட்ரஜன் ரயில்: ரயில்வே வாரியம் அதிரடி ஒப்புதல்!

சுற்றுச்சூழலுக்குப் பாதிப்பில்லாத பூஜ்ஜிய கார்பன் உமிழ்வுடன், உலகிலேயே மிக நீளமான இந்தியாவின் முதலாவது 'ஹைட்ரஜன் ரயில்' ஜிந்த் - சோனிபட் இடையே மணிக்கு 75 கி.மீ வேகத்தில் இயக்கப்பட ரயில்வே வாரியம் அதிகாரப்பூர்வ ஒப்புதல் அளித்துள்ளது.

நாட்டின் முதல் ஹட்ரஜன் ரயில்

இந்திய ரயில்வே வரலாற்றில் ஒரு முக்கிய மைல்கல்லாக, நாட்டின் முதலாவது ஹைட்ரஜன் ஆற்றலில் இயங்கும் ரயில் பெட்டிகளின் (Trainset) அறிமுகத்திற்கு ரயில்வே வாரியம் (Railway Board) தனது அதிகாரப்பூர்வ ஒப்புதலை வழங்கியுள்ளது. 2026 மே 22 தேதியிட்ட கடிதத்தில், ரயில்வே வாரியம் இந்த ஒப்புதலை ஆர்.டி.எஸ்.ஓ (RDSO) மற்றும் வடக்கு ரயில்வே (Northern Railway) ஆகிய அமைப்புகளுக்குத் தெரிவித்துள்ளது. இந்தத் திட்டம் குறித்த முழுமையான விவரங்கள் பின்வருமாறு:

வேகம் மற்றும் இயங்கும் பாதை

பாதை: இந்த ஹைட்ரஜன் ரயில், வடக்கு ரயில்வேயின் டெல்லி கோட்டத்திற்கு உட்பட்ட ஜிந்த் - சோனிபட் (Jind-Sonipat) வழித்தடத்தில் இயக்கப்பட உள்ளது.

வேகம்: இந்த வழித்தடத்தில் இந்த ரயில் மணிக்கு அதிகபட்சமாக 75 கிலோமீட்டர் (75 kmph) வேகத்தில் இயக்கப்படும் என்று வாரியம் குறிப்பிட்டுள்ளது.

"ஆர்.டி.எஸ்.ஓ (RDSO) கடந்த 16.03.2026 அன்று புதுடெல்லியில் உள்ள ரயில்வே பாதுகாப்பு முதன்மை ஆணையர் மூலமாக அனுப்பிய விண்ணப்பத்தின் அடிப்படையில், ரயில்வே அமைச்சகம் (ரயில்வே வாரியம்) இந்த ஒப்புதலை வழங்கியுள்ளது. இதன்படி, 10 பெட்டிகளைக் கொண்ட, 1200 கிலோவாட் (KW) திறன் கொண்ட ஹைட்ரஜன் எரிபொருள் செல் (Hydrogen Fuel Cell) அடிப்படையிலான 'DEMU' ரயில் பெட்டிகளை, ஜிந்த் - சோனிபட் பிரத்யேக வழித்தடத்தில் மணிக்கு 75 கி.மீ வேகத்தில் இயக்க அனுமதி அளிக்கப்படுகிறது," என்று ரயில்வே வாரியம் தனது கடிதத்தில் தெரிவித்துள்ளது.

வெற்றிகரமான சோதனை ஓட்டம்

இந்த ரயிலுக்கான முதற்கட்ட சோதனை ஓட்டங்கள் (Oscillation trial run) கடந்த மார்ச் மாதமே வெற்றிகரமாக முடிவடைந்தன. ரயில்வேயின் ஆராய்ச்சி வடிவமைப்பு மற்றும் தரக்கட்டுப்பாட்டு நிறுவனமான ஆர்.டி.எஸ்.ஓ (RDSO), இந்த ரயிலின் செயல்பாடுகளை மதிப்பீடு செய்யும் நோக்கில் இந்தச் சோதனையை நடத்தியது.

உலக அரங்கில் இந்தியா

இந்த ஹைட்ரஜன் ரயில் வணிக ரீதியான மக்கள் பயன்பாட்டிற்கு வரும்போது, உலக அளவில் ஹைட்ரஜன் ரயில்களை இயக்கும் ஜெர்மனி, ஸ்வீடன், ஜப்பான் மற்றும் சீனா போன்ற ஒரு சில முன்னணி நாடுகளின் எலைட் (Elite) பட்டியலில் இந்தியாவும் இணையும்.

பராமரிப்பு மற்றும் இயக்க விதிகள்

தற்போது வழங்கப்பட்டுள்ள அனுமதியானது ஜிந்த் - சோனிபட் வழித்தடத்தில் ரயிலை இயக்குவதற்கு மட்டுமே செல்லுபடியாகும். இந்த ரயிலுக்கான வழக்கமான மற்றும் திட்டமிடப்பட்ட பராமரிப்புப் பணிகள் ஷாகுர்பஸ்தி (Shakurbasti) ரயில் நிலையத்தில் மேற்கொள்ளப்பட உள்ளன.

பராமரிப்பிற்காக இந்த ரயிலை 'ஜிந்த் - ஷாகுர்பஸ்தி - ஜிந்த்' ஆகிய இடங்களுக்கு இடையே என்ஜின் மூலம் இழுத்துச் செல்லும்போது (Dead Condition - சுய இயக்கம் இல்லாமல்), அதற்குரிய ரயில்வே விதிமுறைகளின்படி தேவையான அனுமதிகளைப் பெற வேண்டும் என்றும் உத்தரவிடப்பட்டுள்ளது.

ஜிந்த் - சோனிபட் ஹைட்ரஜன் ரயிலின் சிறப்பம்சங்கள்:

உலக சாதனை: பிராட் கேஜ் (Broad Gauge - அகலப் பாதை) தடத்தில் இயங்கக்கூடிய, உலகிலேயே மிக நீளமான (10 பெட்டிகள்) மற்றும் அதிக சக்தி வாய்ந்த (2400 kW) முதலாவது ஹைட்ரஜன் ரயில் இதுவாகும்.

என்ஜின் திறன்: இந்த ரயிலில் தலா 1200 kW திறன் கொண்ட இரண்டு 'டிரைவிங் பவர் கார்கள்' (Driving Power Cars - DPCs) உள்ளன. இதன் மொத்த திறன் 2400 kW ஆகும். இவற்றுடன் பயணிகள் பயணிக்கும் 8 சாதாரண பெட்டிகள் இணைக்கப்பட்டு மொத்தம் 10 பெட்டிகளுடன் இந்த ரயில் இயங்கும்.

சுற்றுச்சூழல் பாதுகாப்பு (Zero Pollution): இந்த ரயிலில் இருந்து கார்பன் டை ஆக்சைடு (CO2) போன்ற நச்சு வாயுக்கள் எதுவும் வெளியாகாது. முற்றிலும் பூஜ்ஜிய உமிழ்வு (Zero Emission) கொண்டது. இதன் புகைக்குழாய் வழியே தூய்மையான நீராவி (Water Vapour) மட்டுமே வெளியேறும். இதனால் சுற்றுப்புறச் சூழல் முற்றிலும் பாதுகாக்கப்படுகிறது.