ஒருமுறை பயன்படுத்தும் PET பாட்டில்களிலிருந்து உருவாகும் நானோ பிளாஸ்டிக்குகள், மனித ஆரோக்கியத்திற்கு அவசியமான குடல் நுண்ணுயிரிகள் மற்றும் இரத்த அணுக்களைச் சேதப்படுத்தும் என்று ஒரு புதிய ஆய்வு கண்டறிந்துள்ளது.
ஒருமுறை மட்டுமே பயன்படுத்தும் PET (Polyethylene terephthalate) பாட்டில்களிலிருந்து உருவாகும் நானோபிளாஸ்டிக்குகள், மனித ஆரோக்கியத்திற்கு இன்றியமையாத முக்கிய உயிரியல் அமைப்புகளை நேரடியாகச் சீர்குலைக்க முடியும் என்று ஒரு ஆய்வில் கண்டறியப்பட்டுள்ளது.
மொஹாலியில் உள்ள நானோ அறிவியல் மற்றும் தொழில்நுட்ப நிறுவனம் (INST) தலைமையில் இந்த ஆய்வு மேற்கொள்ளப்பட்டது. இந்த நிறுவனம் அறிவியல் மற்றும் தொழில்நுட்பத் துறையின் (DST) கீழ் இயங்கும் ஒரு தன்னாட்சி நிறுவனம் ஆகும்.
24
இரத்தத்தில் நானோபிளாஸ்டிக்குகள்
உணவு மற்றும் நீரில் காணப்படும் நானோபிளாஸ்டிக்குகள் உலகளாவிய கவலையாக இருந்து வருகின்றன, மேலும் அவை மனித உடலுக்குள் பெருகிய முறையில் கண்டறியப்படுகின்றன. இருப்பினும், அவற்றின் துல்லியமான விளைவுகள் இதுவரை சரியாகப் புரிந்துகொள்ளப்படவில்லை.
பிளாஸ்டிக்குகள் சுற்றுச்சூழலை எவ்வாறு மாசுபடுத்துகின்றன அல்லது உடலின் திசுக்களை எவ்வாறு சேதப்படுத்துகின்றன என்பதில் பல ஆய்வுகள் கவனம் செலுத்தியுள்ள நிலையில், மனித ஆரோக்கியத்தின் மையமாக இருக்கும் பயனுள்ள குடல் நுண்ணுயிரிகள் (gut microbes) மீதான அவற்றின் நேரடி தாக்கம் பற்றி எதுவும் அறியப்படவில்லை.
34
குடல் நுண்ணுயிரிகளில் ஏற்படும் பாதிப்பு
INST-ல் உள்ள ரசாயன உயிரியல் பிரிவில் பிரசாந்த் ஷர்மா மற்றும் சாக்ஷி டகாரியா தலைமையிலான குழுவினர், நானோபிளாஸ்டிக்குகள் மனித ஆரோக்கியத்தில் ஏற்படுத்தும் ஆழமான விளைவுகளுக்கான முதல் தெளிவான ஆதாரத்தைக் கண்டறிந்துள்ளனர்.
ஆராய்ச்சியாளர்கள் ஆய்வகத்தில் PET பாட்டில்களிலிருந்து நானோபிளாஸ்டிக்குகளை உருவாக்கி, அவற்றை மூன்று முக்கிய உயிரியல் மாதிரிகளில் சோதித்தனர்.
Lactobacillus rhamnosus என்ற நன்மை பயக்கும் குடல் பாக்டீரியா, நானோபிளாஸ்டிக்குகள் நுண்ணுயிர் சமநிலையை (microbiome) எவ்வாறு பாதிக்கின்றன என்பதை அறியப் பயன்படுத்தப்பட்டது.
அதிக செறிவுகளில் நானோபிளாஸ்டிக்குகள் சிவப்பு இரத்த அணுக்களின் சவ்வுகளைச் (red blood cell membranes) சீர்குலைத்து, உயிரணுக்களை முன்கூட்டியே அழிக்கக் காரணமாகின்றன என்றும் கண்டறியப்பட்டது.
மேலும், நீடித்த வெளிப்பாடு டி.என்.ஏ சேதம், ஆக்ஸிஜனேற்ற அழுத்தம், செல் இறப்பு (apoptosis) மற்றும் அழற்சி சமிக்ஞைகளுக்கு வழிவகுக்கிறது என்பதையும் குழுவினர் கண்டறிந்தனர். இவை ஆற்றல் மற்றும் ஊட்டச்சத்து வளர்சிதை மாற்றத்தில் (metabolism) மாற்றங்களையும் ஏற்படுத்துகின்றன.
