சூடுபிடிக்கும் துணை ஜனாதிபதி தேர்தல்! களமிறங்கிய இந்திய தேர்தல் ஆணையம்!

இந்தியாவின் அடுத்த துணை குடியரசுத் தலைவர் தேர்தலுக்கான பணிகளை தேர்தல் ஆணையம் தொடங்கியுள்ளது. ஜகதீப் தன்கர் ராஜினாமா செய்ததை அடுத்து இந்த தேர்தல் விரைவில் நடைபெறும். தற்போதைய நிலவரப்படி, ஆளும் NDA கூட்டணிக்கு தெளிவான முன்னிலை உள்ளது.

விரைவில் துணை ஜனாதிபதி தேர்தல்

இந்தியாவின் துணை குடியரசுத் தலைவர் பதவியை நிரப்புவதற்கான தேர்தல் பணிகளை இந்திய தேர்தல் ஆணையம் தொடங்கியுள்ளதாக இன்று (ஜூலை 23, 2025) அறிவித்துள்ளது. இதற்கான வாக்காளர் குழுவை அமைக்கும் பணியும் தொடங்கியுள்ளது.

திங்கள்கிழமை (ஜூலை 21, 2025) அன்று, அப்போதைய துணை குடியரசுத் தலைவர் ஜகதீப் தன்கர், உடல்நலக் காரணங்களைச் சுட்டிக்காட்டி தனது பதவியை ராஜினாமா செய்தார். அவரது பதவிக்காலம் ஆகஸ்ட் 10, 2027 வரை இருந்த நிலையில், அவரது திடீர் ராஜினாமா அரசியல் வட்டாரங்களில் கவனத்தை ஈர்த்துள்ளது. இதையடுத்து, துணை குடியரசுத் தலைவர் பதவியை விரைந்து நிரப்ப தேர்தல் ஆணையம் நடவடிக்கை எடுத்து வருகிறது.

தேர்தல் ஆணையத்தின் அறிக்கை

தேர்தல் ஆணையம் வெளியிட்டுள்ள அறிக்கையில், துணை குடியரசுத் தலைவர் தேர்தல் நடத்தத் தேவையான அனைத்து ஆயத்தப் பணிகளும் நடைபெற்று வருவதாகத் தெரிவித்துள்ளது. நாடாளுமன்றத்தின் இரு அவைகளையும் சேர்ந்த மக்களவை மற்றும் மாநிலங்களவை உறுப்பினர்களை உள்ளடக்கிய வாக்காளர் குழுவை இறுதி செய்யும் பணி நடைபெற்று வருகிறது. மேலும், தேர்தல் நடத்தும் அதிகாரிகளையும் இறுதி செய்து வருவதாகக் கூறியுள்ளது.

"இந்த ஆயத்தப் பணிகள் அனைத்தும் நிறைவடைந்ததும், துணை குடியரசுத் தலைவர் தேர்தல் குறித்த அட்டவணை விரைவில் அறிவிக்கப்படும்" என்று தேர்தல் ஆணையம் தெரிவித்துள்ளது.

துணை குடியரசுத் தலைவர் தேர்தல்

இந்திய அரசியலமைப்புச் சட்டத்தின் 324-வது பிரிவின்படி, துணை குடியரசுத் தலைவர் தேர்தலை இந்திய தேர்தல் ஆணையம் நடத்தும். இந்தத் தேர்தல், 1952-ம் ஆண்டின் குடியரசுத் தலைவர் மற்றும் துணை குடியரசுத் தலைவர் தேர்தல் சட்டம் மற்றும் 1974-ம் ஆண்டின் தேர்தல் விதிகள் ஆகியவற்றின் அடிப்படையில் நடத்தப்படுகிறது.

துணை குடியரசுத் தலைவர் தேர்தலில் மக்களவை மற்றும் மாநிலங்களவை உறுப்பினர்கள், நியமன உறுப்பினர்கள் உட்பட அனைவரும் வாக்களிக்க தகுதியுடையவர்கள் ஆவர்.

யாருக்கும் பலம்?

தற்போதுள்ள உறுப்பினர்களின் எண்ணிக்கையின்படி, ஆளும் தேசிய ஜனநாயகக் கூட்டணி (NDA) அடுத்த துணை குடியரசுத் தலைவரைத் தேர்ந்தெடுப்பதில் தெளிவான முன்னிலை வகிக்கிறது. மக்களவையில் 293 உறுப்பினர்களும், மாநிலங்களவையில் 133 உறுப்பினர்களும் என மொத்தம் 426 உறுப்பினர்களை NDA கூட்டணி கொண்டுள்ளது. இது, NDA-வால் ஆதரிக்கப்படும் ஒரு வேட்பாளரை துணை குடியரசுத் தலைவராகத் தேர்ந்தெடுக்க போதுமானது. மேலும், ஜகதீப் தன்கர் விஷயத்தில் நடந்ததைப் போல, பிற கட்சிகளின் எம்.பி.க்களின் ஆதரவு இந்த எண்ணிக்கையை மேலும் அதிகரிக்கும்.