நயன்தாரா கணவர்னு சொல்றதுல எனக்கு பெருமை... இயக்குநர் விக்னேஷ் சிவன் ஓபன் டாக்

லவ் இன்சூரன்ஸ் கம்பெனி திரைப்படம் வருகிற ஏப்ரல் 10ந் தேதி திரைக்கு வர உள்ள நிலையில், அப்படத்தின் புரமோஷன் நேர்காணலில் இயக்குநர் விக்னேஷ் சிவன் பேசியது வைரலாகி வருகிறது.

Love Insurance Kompany Director Vignesh Shivan

நயன்தாராவின் கணவர் என்று அழைக்கப்படுவதில் தனக்கு பெருமை என இயக்குநர் விக்னேஷ் சிவன் கூறியுள்ளார். தனக்கு கிடைத்த மிகப்பெரிய ஆசீர்வாதம் நயன்தாரா என்றும், தாங்கள் காதலிக்கத் தொடங்கியபோது தான் ஒரு வெற்றிகரமான இயக்குநர் கூட இல்லை என்றும் அவர் குறிப்பிட்டார். நயன்தாராவுடன் நெருங்கிப் பழகிய பிறகுதான் அவரைப் பற்றிய தனது பார்வை மாறியதாகவும் விக்னேஷ் சிவன் கூறினார். தனது புதிய படமான 'லவ் இன்சூரன்ஸ் கம்பெனி' புரொமோஷன் நேர்காணலின் போது அவர் இந்த விஷயங்களைப் பகிர்ந்து கொண்டார்.

நயன்தாரா கணவர் என்பதில் பெருமை

"நயன்தாராவின் கணவர் என்று அறியப்படுவதில் நான் பெருமைப்படுகிறேன். என்னுடன் இருக்கும் ஒரு போட்டோவை நயன்தாரா முதல்முறையாக வாட்ஸ்அப் டிபி-யாக வைத்தார். அது 'நானும் ரவுடி தான்' படத்தின் ஷூட்டிங் நடந்துகொண்டிருந்த நேரம். எனக்கு நயன்தாராவைப் பார்த்தால் பயம். 'மேடம்' என்பதைத் தவிர வேறு எதுவும் கூப்பிட மாட்டேன். ஒரு ரீ-டேக் கேட்கக் கூட எனக்குத் தயக்கமாக இருக்கும். இதை நயன்தாரா புரிந்துகொண்டார். ஒருநாள், எல்லோருக்கும் முன்னால் வெளிப்படையாகவே சொன்னார். 'நீங்க டைரக்டர், நீங்க சொல்றதை எத்தனை முறை வேண்டுமானாலும் செய்து தர நான் தயார். தயங்க வேண்டாம்' என்றார். எல்லோரும் இதைக் கேட்டுக்கொண்டிருந்தார்கள். ஷூட்டிங்கின் மூன்றாவது நாளிலேயே இது நடந்தது," என்று விக்னேஷ் சிவன் நினைவுகூர்ந்தார்.

நயன் பற்றி விக்கி சொன்னதென்ன?

"நெருங்கிப் பழக ஆரம்பித்த பிறகுதான் நயன்தாராவைப் பற்றிய என் பார்வை மாறியது. இவ்வளவு நல்ல குணம் கொண்டவரா இவர் என்று தோன்றியது. எல்லோருக்கும் முன்னால் நம்மை நிரூபிக்கவும், அவர்கள் விரும்புவது போல நடந்துகொள்ளவும் ஆரம்பித்தால், நமக்கென வாழ நேரம் இருக்காது. எல்லோரையும் திருப்திப்படுத்த முடியாது. நயன்தாரா ஒரு அற்புதமான குணம் கொண்டவர். அவருடைய ஸ்டார் அந்தஸ்து மற்றவர்களுக்கு மட்டும்தான். பலருக்கு என் பெயர் தெரியாது. அல்லது என்னைப் பார்த்தால் பெயர் நினைவுக்கு வராது. அதனால் 'நயன்தாரா' என்று சொல்லி பேச முயற்சிப்பார்கள்," என்கிறார் விக்னேஷ் சிவன்.

நயன்தாரா மிகப்பெரிய வரம்

"அவருடைய பெயரில் அறியப்படுவதில் நான் பெருமைப்படுகிறேன். அவர் எனக்கு கிடைத்த மிகப்பெரிய வரம். நாங்கள் காதலிக்க ஆரம்பித்தபோது, நான் ஒரு வெற்றிகரமான இயக்குநர் கூட கிடையாது. இன்றும் நயன்தாராவைப் பார்க்கும்போது எனக்குள் ஒருவிதமான பயம் இருக்கிறது. கணவன்-மனைவி உறவுக்குள் 'ஓவர் ஷேடோ' எல்லாம் என்ன இருக்கிறது? ஒருமுறை நயன்தாராவே, 'என்னுடைய புகழின் நிழலில் உன்னுடைய திறமையும் ஆளுமையும் கவனிக்கப்படாமல் போய்விடுமோ' என்று கவலைப்பட்டார்," என விக்னேஷ் சிவன் நெகிழ்ச்சியுடன் கூறினார்.

லவ் இன்சூரன்ஸ் கம்பெனி ரிலீஸ்

விக்னேஷ் சிவன் இயக்கியுள்ள லவ் இன்சூரன்ஸ் கம்பெனி திரைப்படம் வருகிற ஏப்ரல் 10ந் தேதி திரையரங்குகளில் ரிலீஸ் ஆக உள்ளது. அப்படத்தில் பிரதீப் ரங்கநாதன் ஹீரோவாக நடித்திருக்கிறார். டைம் டிராவலை மையமாக வைத்து ஒரு ஃபேண்டஸி நிறைந்த காதல் படமாக இது உருவாகி இருக்கிறது. இப்படத்தை ரெளடி பிக்சர்ஸ் நிறுவனம் சார்பாக நயன்தாரா தயாரித்துள்ளார். இப்படத்தில் பிரதீப் ரங்கநாதனுக்கு ஜோடியாக கீர்த்தி ஷெட்டி நடித்துள்ளார். மேலும் மிஷ்கின், எஸ்.ஜே.சூர்யா ஆகியோர் முக்கிய கதாபாத்திரத்தில் நடித்துள்ளனர். இப்படத்திற்கு அனிருத் இசையமைத்துள்ளார்.