Netflix ஓடிடியில் உங்களை நடுநடுங்க வைக்கும் 5 திகில் படங்கள்! தனியா பார்த்தா நிச்சயம் பயப்படுவீங்க!

Must Watch Horror Movies on Netflix : உங்களுக்கு ஹாரர் படங்கள் பார்ப்பது பிடிக்குமா? அப்போ இந்த லிஸ்ட் உங்களுக்குத்தான். Netflix-ல் பார்க்கக்கூடிய 5 மிரட்டலான படங்களைப் பற்றி இங்கே பார்க்கலாம்.

Must Watch Horror Movies on Netflix

ஓடிடி தளங்களில் திரைப்படங்கள், வெப் சீரிஸ்களைப் பார்த்து பொழுதுபோக்குவது உங்களுடைய வழக்கமாக இருந்தால், இந்தப் பட்டியல் நிச்சயம் உங்களுக்குப் பிடிக்கும். குறிப்பாக திகில், மர்மம், சைக்கலாஜிக்கல் திரில்லர் போன்ற படங்களை விரும்புபவர்களுக்கு ஓடிடியில் பல சுவாரஸ்யமான சாய்ஸ் இங்கு இருக்கின்றன. அந்த வகையில், பார்வையாளர்களை பதற்றத்தில் ஆழ்த்தும் 5 ஹாரர் படங்களை இங்கே பார்க்கலாம். இந்தப் படங்களில் சிலவற்றை இரவு நேரத்தில் தனியாகப் பார்ப்பது சற்று கஷ்டமாகத்தான் இருக்கும்!

1. ஷைத்தான்

இந்தப் பட்டியலில் முதலிடத்தைப் பிடிப்பது அஜய் தேவ்கன், ஆர். மாதவன், ஜோதிகா மற்றும் ஜானகி போடிவாலா நடித்த ‘ஷைத்தான்’. சைக்கலாஜிக்கல் ஹாரர் த்ரில்லர் பாணியில் உருவாகியுள்ள இப்படம், ஒரு குடும்பத்தை மையமாக வைத்து நகர்கிறது. விடுமுறையை மகிழ்ச்சியாகக் கொண்டாடச் செல்லும் குடும்பத்திற்கு எதிர்பாராத விதமாக ஒரு அமானுஷ்ய சக்தியால் மிகப்பெரிய ஆபத்து ஏற்படுகிறது. அதன் பிறகு நடக்கும் சம்பவங்கள் ஒவ்வொன்றும் பார்வையாளர்களை பதற்றத்தில் வைத்திருக்கும். குறிப்பாக அமானுஷ்ய சக்தியின் தாக்கம் அதிகரிக்கும் காட்சிகள் திகிலை ஏற்படுத்தும் வகையில் அமைந்துள்ளன.

2. கோஸ்ட் ஸ்டோரீஸ்

ஹாரர் படங்களில் வித்தியாசமான அனுபவத்தை எதிர்பார்ப்பவர்களுக்கு ‘கோஸ்ட் ஸ்டோரீஸ்’ ஒரு சிறந்த தேர்வாக இருக்கலாம். நான்கு தனித்தனி அமானுஷ்யக் கதைகளை ஒன்றாகக் கொண்ட இப்படத்தை கரண் ஜோஹர், ஜோயா அக்தர், அனுராக் காஷ்யப் மற்றும் திபாகர் பானர்ஜி ஆகியோர் இயக்கியுள்ளனர். ஒவ்வொரு கதைக்கும் தனித்துவமான பின்னணியும், பயமுறுத்தும் சம்பவங்களும் இருப்பதால், படம் முழுவதும் அடுத்ததாக என்ன நடக்கப்போகிறது என்ற எதிர்பார்ப்பு உருவாகும். ஹாரர் ஆந்தாலஜி படங்களை விரும்புபவர்கள் இந்தப் படத்தை தங்களுடைய ஓடிடி வாட்ச் லிஸ்ட்டில் சேர்த்துக்கொள்ளலாம்.

3. மா

புராணக் கதைகளையும் திகிலையும் இணைத்து உருவாக்கப்பட்ட ‘மா’ திரைப்படமும் இந்தப் பட்டியலில் இடம்பெறுகிறது. பாலிவுட் நடிகை கஜோல் முன்னணி கதாபாத்திரத்தில் நடித்துள்ள இப்படத்தில் ரோனித் ராய் மற்றும் இந்திரநீல் சென்குப்தா உள்ளிட்டோரும் முக்கிய வேடங்களில் நடித்துள்ளனர். ஒரு பயங்கரமான சாபத்துடன் தொடர்புடைய சம்பவங்கள் மற்றும் அதனால் பாதிக்கப்படும் ஒரு குடும்பத்தைச் சுற்றியே கதை நகர்கிறது. குறிப்பாக மகளைச் சுற்றி உருவாகும் மர்மமான சூழ்நிலைகள் படத்தின் திகில் அனுபவத்தை அதிகரிக்கின்றன. இப்படத்தை நெட்பிளிக்ஸ் தளத்தில் பார்க்க முடியும்.

4. புல்புல்

இந்தப் பட்டியலில் இடம்பெறும் மற்றொரு கவனம் ஈர்க்கும் படம் ‘புல்புல்’. அன்விதா தத் இயக்கிய இந்தப் படத்தில் திரிப்தி திம்ரி முக்கிய கதாபாத்திரத்தில் நடித்துள்ளார். பெண் கதாபாத்திரத்தை மையமாகக் கொண்டு உருவாக்கப்பட்டுள்ள இந்தப் படத்தில் மர்மம், அமானுஷ்யம் மற்றும் திகில் ஆகியவை அழுத்தமாகக் கையாளப்பட்டுள்ளன. படத்தின் காட்சியமைப்பும் பின்னணியும் கதைக்கு கூடுதல் வலு சேர்க்கின்றன. கதையின் போக்கில் அடுத்தடுத்து வரும் திருப்பங்கள், படம் முடியும் வரை பார்வையாளர்களை திரையில் இருந்து விலக விடாது.

5. பாரமுல்லா

இந்த ஹாரர் பட்டியலில் கடைசியாக இடம்பெறுவது ‘பாரமுல்லா’. மர்மமான முறையில் ஒரு குழந்தை காணாமல் போகும் சம்பவத்தைச் சுற்றியே கதையின் தொடக்கம் அமைகிறது. காணாமல் போன குழந்தையைத் தேடும் விசாரணை அடுத்தடுத்த கட்டங்களை நோக்கி நகரும்போது, பல மர்மமான விஷயங்கள் வெளிச்சத்திற்கு வருகின்றன. விசாரணை, அமானுஷ்யம் மற்றும் பதற்றம் ஆகியவை இணைந்திருப்பதால், ஒவ்வொரு காட்சியிலும் என்ன நடக்கப்போகிறது என்ற எதிர்பார்ப்பு நீடிக்கும்.