Music: பாட்டுக்காக எடுக்கப்பட்ட படங்கள்.! இளையராஜா மெட்டுக்களால் மட்டுமே ஹிட்டான படங்கள் எவை தெரியுமா?

80 மற்றும் 90-களில், இசைஞானி இளையராஜாவின் இசை பல திரைப்படங்களின் வெற்றிக்கு முக்கிய காரணமாக அமைந்தது. சுமாரான திரைக்கதைகளைக் கொண்ட படங்கள் கூட, அவரது உயிரோட்டமான பாடல்கள் மற்றும் பின்னணி இசையால் பாக்ஸ் ஆபீஸில் மாபெரும் சாதனைகளைப் படைத்தன. 

திரைக்கதையைத் தாண்டிய இசைப் புரட்சி

தமிழ் சினிமாவில் எத்தனையோ படங்கள் பிரம்மாண்டமான கதைகளுக்காகவும், உச்ச நட்சத்திரங்களின் நடிப்பிற்காகவும் கொண்டாடப்பட்டிருக்கின்றன. ஆனால், கதை சுமார்தான், ஆனால் பாட்டுக்காகவே படம் ஓடுது என்ற ஒற்றை வாசகத்தின் மூலம் பாக்ஸ் ஆபீஸை அதிரவைத்த ஒரு காலம் இருந்தது. அந்த பொற்காலத்தின் ஏகபோகச் சக்கரவர்த்தி - இசைஞானி இளையராஜா. ஒரு திரைப்படம் என்பது ஓடும் பிம்பம் என்றால், அதற்கு உயிர் கொடுக்கும் மூச்சுக்காற்றாக தனது இசையை மாற்றியவர் அவர். வெறும் அலங்காரமாக இருந்த இசையை, ஒரு படத்தின் பிரதான நாயகனாக உயர்த்திய பெருமை ராஜாவையே சாரும்.

மெட்டுகளால் எழுதப்பட்ட மந்திரத் திரைக்கதை

80 மற்றும் 90-களில் பல இயக்குநர்களுக்கு ஒரு எழுதப்படாத விதி இருந்தது. கதை பலவீனமாக இருந்தாலும் சரி, முன்னணி நடிகர்கள் இல்லாவிட்டாலும் சரி, இளையராஜாவின் கால்ஷீட் கிடைத்துவிட்டால் "படம் பாதி வெற்றி பெற்றுவிட்டது" என்ற துணிச்சலோடு களமிறங்குவார்கள். காட்சிகளில் சொல்ல முடியாத ஆழமான உணர்வுகளை, ஒரு சிறிய புல்லாங்குழல் இசையாலோ அல்லது வயலின் கோர்ப்பாலோ ரசிகர்களின் இதயத்திற்குள் கடத்திவிடுவார் ராஜா. இதனாலேயே பல சுமாரான கதைகள் கூட, ராஜாவின் பின்னணி இசையால் உயிர்பெற்று, திரையரங்குகளில் நூறு நாட்களைக் கடந்து சாதனை படைத்தன. இசைஞானியிடம் சில மெட்டுக்களை பெற்ற இயக்குனர்களை அதன் பிறகே அவற்றை சிறந்த காபியமாக படைத்த வலராறும் உண்டு. அத்தகைய படங்களின் தொகுப்பை தெரிந்துகொண்டால் ஆச்சரியப்படுவீர்கள்.

பாடல்களால் கோலோச்சிய வெள்ளித்திரை காவியங்கள்

வைதேகி காத்திருந்தாள் 

இசையால் உயிர்பெற்ற காத்திருப்பு: இயக்குநர் ஆர் சுந்தர்ராஜன் - விஜயகாந்த் கூட்டணியில் உருவான இந்தப் படம், இசை இல்லாமல் நினைத்துப் பார்க்கவே முடியாத ஒரு காவியம். இதில் வரும் "ராசாத்தி உன்னை காணாத நெஞ்சு", "காத்திருந்து காத்திருந்து" போன்ற பாடல்கள் ஒவ்வொன்றும் ஒரு கதையைச் சொல்லின. காதலியின் ஏக்கத்தையும், தனிமையின் வலியையும் சொற்களால் விவரிக்க முடியாத இடத்திலெல்லாம் ராஜாவின் மெட்டுகள் ஆக்கிரமித்தன. இந்தப் படத்தின் பிரம்மாண்ட வெற்றிக்கு இளையராஜாவின் பாடல்களே அஸ்திவாரமாக அமைந்தன.

பயணங்கள் முடிவதில்லை - சராசரி கதைக்குக் கிடைத்த மகுடம்

மைக் மோகன் நடித்த இந்தப் படத்தின் திரைக்கதை ஒரு சாதாரண காதல் கதைதான். ஆனால், "இளைய நிலா பொழிகிறதே", "மணி ஓசை கேட்டு எழுந்து" போன்ற பாடல்கள் அந்தப் படத்தையே ஒரு 'மியூசிக்கல் மேஜிக்' ஆக மாற்றின. திரையரங்குகளில் படம் முடிந்த பிறகும் பாடல்களைக் கேட்பதற்காகவே ரசிகர்கள் அமர்ந்திருந்த காலம் அது. இந்தப் படம் 100 நாட்களைக் கடந்து ஓடியதில் 90% பங்கு ராஜாவின் இசைக்கே உண்டு.

இதயக்கோயில் - மெட்டுகள் கட்டிய மனக்கோயில்

இந்தப் படத்தின் கதையை விடவும், அதன் பாடல்களே இன்றும் இளைஞர்களின் தேசிய கீதமாக இருக்கின்றன. "நான் பாடும் மௌன ராகம்", "பூங்காற்று புதிதானது" போன்ற பாடல்கள் காதல் தோல்வியையும், மன உளைச்சலையும் கூட ஒரு அழகிய அனுபவமாக மாற்றின. கதையின் போக்கில் இருந்த தொய்வுகளைத் தனது அபாரமான இசைக்கோர்ப்பால் சரிசெய்து, ரசிகர்களைக் கட்டிப்போட்டார் ராஜா.

கரகாட்டக்காரன் - கிராமிய இசைப் புரட்சி

ராமராஜன் நடித்த இந்தப் படத்தின் வெற்றிக்குக் கவுண்டமணி - செந்தில் நகைச்சுவை ஒரு தூண் என்றால், ராஜாவின் இசை மற்றொரு பிரம்மாண்ட தூண். குறிப்பாக "மாங்குயிலே பூங்குயிலே" பாடல் ஒலிக்காத கிராமங்களே இல்லை எனலாம். கிராமிய இசையையும் கிளாசிக்கல் இசையையும் இணைத்து ராஜா நிகழ்த்திய அந்த மந்திரம், அந்தப் படத்தை மெகா ஹிட் ஆக்கியது.

பின்னணி இசை: வசனமில்லா உரையாடல்

பாடல்கள் ஒருபுறம் இருக்க, படத்தின் 'பிண்ணனி இசை' மூலம் ஒரு சுமாரான காட்சியைக்கூடப் பிரம்மாண்டமான உணர்ச்சிக் குவியலாக மாற்றுவதில் ராஜா ஒரு கில்லாடி. "சின்னத்தாய்" போன்ற படங்களில் வசனங்கள் இல்லாத இடங்களில் கூட, அவரது பின்னணி இசை பார்வையாளர்களைக் கண்கலங்க வைத்தது. நடிகர்களின் நடிப்பை அடுத்த கட்டத்திற்கு எடுத்துச் செல்வதில் ராஜாவின் இசைக்கு நிகர் அவரே. பல இயக்குநர்கள் "இந்த இடத்திற்கு வசனம் தேவையில்லை, ராஜா பார்த்துக்கொள்வார்" என்று முழுமையாக அவரை நம்பியதற்குக் காரணம், அவரது இசையில் இருந்த அந்த ஜீவன்.

காலம் கடந்தும் வாழும் மந்திரம்

இளையராஜா வெறும் இசையமைப்பாளர் மட்டுமல்ல அவர் ஒரு திரைக்கதை ஆசிரியரின் பொறுப்பையும் தனது இசை மூலம் சுமந்தவர். இன்று பல படங்கள் காலப்போக்கில் காட்சிகளாக மக்கள் மனதிலிருந்து மறைந்திருக்கலாம். ஆனால், அந்தப் படங்களின் பாடல்கள் இன்றும் வானொலியிலும், செல்போன்களிலும் ஒலித்துக்கொண்டே இருக்கின்றன. "திரைப்படம் ஒரு உடல் என்றால், அதன் உயிர்நாடி இளையராஜாவின் இசை" என்பது நிதர்சனமான உண்மை.