RK X KH Movie : ரஜினி - கமல் இணையும் படம்... ரெட் ஜெயண்ட்ஸ் வெளியிட்ட பட்டாசான அப்டேட்

சூப்பர் ஸ்டார் ரஜினிகாந்தும், கமல்ஹாசனும் நீண்ட இடைவெளிக்கு பின்னர் இணைந்து நடிக்க உள்ள படத்தை ரெட் ஜெயண்ட்ஸ் தயாரிக்கிறது. அப்படத்தின் அப்டேட் ஒன்றை படக்குழு வெளியிட்டுள்ளது.

RK X KH Movie Update

தமிழ் திரை உலகில் இரு பெரும் ஜாம்பவான்களாக அறியப்படுபவர்கள் தான் ரஜினிகாந்த் மற்றும் கமல்ஹாசன். இவர்கள் இருவரும் ஆரம்ப காலகட்டத்தில் ஒன்றாக இணைந்து நடித்திருந்தாலும் கடந்த 45 ஆண்டுகளாக ஒரு படத்தில் கூட இணைந்து நடிக்காமல் இருந்து வந்தனர். இந்த நிலையில் நீண்ட இடைவெளிக்கு பின்னர் ரஜினியும் கமலும் இணைந்து நடிக்கும் படம் கோலிவுட்டில் பிரம்மாண்டமாக தயாராகி வருகிறது. அப்படம் குறித்த அதிகாரப்பூர்வ அறிவிப்பு இன்று வெளியாகி இருக்கிறது. அப்படத்தை ரெட்ஜெயண்ட் மூவிஸ் நிறுவனம் தயாரிக்கிறது. இது அவர்கள் தயாரிக்கும் 17 வது படமாகும்.

நெல்சன் இயக்கும் படம்

ரஜினி கமல் இணைந்து நடிக்கும் படத்தை இயக்கப் போவது யார் என்பதுதான் மிகப்பெரிய கேள்வியாக இருந்தது. அதற்கான விடை தற்போது கிடைத்திருக்கிறது. அதன்படி ரஜினியை வைத்து ஜெயிலர் என்கிற மாஸ் ஹிட் படத்தை இயக்கிய நெல்சன் திலீப் குமார் தான் இந்த பிரம்மாண்ட படத்தை இயக்க உள்ளாராம். இப்படத்தின் அறிவிப்பு வீடியோவையும் தயார் செய்திருக்கிறது படக்குழு. அதில் ரஜினி கமல் இருவரும் விண்டேஜ் கார் ஒன்றில் ஒன்றாக வலம் வருவது போன்ற காட்சிகள் இடம் பெற உள்ளன. இப்படத்திற்கு அனிருத் தான் இசையமைக்க உள்ளார்.

பிசியாக நடிக்கும் ரஜினி

நடிகர் ரஜினிகாந்த் நடிப்பில் தற்போது ஜெயிலர் 2 திரைப்படம் தயாராகி வருகிறது. படத்தையும் நெல்சன் தான் இயக்கியுள்ளார். சன் பிக்சர்ஸ் நிறுவனம் தயாரித்துள்ள அப்படம் இந்த ஆண்டு ஜூன் மாதம் திரைக்கு வர உள்ளது. இது தவிர கமல்ஹாசன் தயாரிப்பில் ஒரு படத்திலும் நடிக்க கமிட் ஆகியுள்ளார் ரஜினி. தலைவர் 173 என தற்காலிகமாக அழைக்கப்படும் படத்தை சிபி சக்கரவர்த்தி இயக்குகிறார். அப்படத்தின் படப்பிடிப்பு வருகிற ஏப்ரல் மாதம் தொடங்கும் என எதிர்பார்க்கப்படுகிறது. இந்த இரு படங்களை முடித்த பின்னர் ரஜினி - கமல் இணைந்து நடிக்கும் படத்தின் படப்பிடிப்பு தொடங்கும்.

அப்டேட் என்ன?

அதேபோல் கமல்ஹாசனும் தற்போது அரசியலில் பிசியாக இருக்கிறார். அவர் அண்மையில் மாநிலங்களவை எம்பி ஆக தேர்ந்தெடுக்கப்பட்டு நாடாளுமன்றத்துக்கு சென்றிருக்கிறார். அதுமட்டுமின்றி தமிழகத்தில் சட்டமன்ற தேர்தல் வர உள்ளதால், அதற்கான பிரச்சாரத்திலும் பிசியாக இருக்கிறார். அவையெல்லாம் முடிந்த பின்னர் அன்பறிவு இயக்கும் படத்தில் நடிக்க உள்ளார் கமல். அப்படத்தை முடித்த பின்னரே நெல்சன் இயக்கத்தில் ரஜினி உடன் இணைந்து நடிக்கும் படத்துக்கு வருவார் என கூறப்படுகிறது. இந்தப் படத்தின் அறிவிப்பு வீடியோ நாளை நண்பகல் 12.07 மணிக்கு வெளியாகும் என அறிவிக்கப்பட்டு உள்ளது.