45 சவரன் நகையை மீட்ட தூய்மை பணியாளர் பத்மா... தங்க செயின் பரிசளித்து நெகிழ வைத்த ரஜினிகாந்த்..!

சாலையோரம் கிடந்த பையில் இருந்த 45 சவரன் நகையை மீட்டு போலீஸிடம் ஒப்படைத்த தூய்மைப் பணியாளர் பத்மா என்பவரை நேரில் அழைத்து பாராட்டி பரிசளித்துள்ளார் சூப்பர்ஸ்டார் ரஜினிகாந்த்,

Rajinikanth Gifted Gold Chain to sanitation Worker

சென்னையில் நடந்த ஒரு சம்பவம், நேர்மை இன்னும் உயிருடன் இருப்பதை மீண்டும் ஒருமுறை நிரூபித்துள்ளது. தியாகராய நகர் பகுதியிலுள்ள முப்பாத்தம்மன் கோவில் தெருவில் உள்ள வண்டிக்காரன் சாலை பகுதியில் தூய்மைப் பணியில் ஈடுபட்டிருந்த பத்மா என்ற தூய்மைப் பணியாளர், சாலையோரத்தில் கிடந்த ஒரு பையை கண்டெடுத்துள்ளார். அந்தப் பையில் தங்க நகைகள் இருப்பதை பார்ந்த பத்மா, அதை உடனடியாக தனது மேலதிகாரிகளுக்கு தகவல் அளித்து, பாண்டிபஜார் காவல் நிலையத்தில் ஒப்படைத்தார்.

பத்மாவின் உயரிய உள்ளம்

காவல் துறையினர் மேற்கொண்ட சோதனையில், அந்தப் பையில் சுமார் 45 லட்சம் ரூபாய் மதிப்புள்ள 45 சவரன் தங்க நகைகள் இருந்தது தெரியவந்தது. மேலும் விசாரணையில், நங்கநல்லூர் பகுதியைச் சேர்ந்த ரமேஷ் என்பவர், இதே அளவு நகைகளை இழந்ததாக ஏற்கனவே காவல் நிலையத்தில் புகார் அளித்திருந்ததும் உறுதி செய்யப்பட்டது. அதன்பின்னர், உரிய விசாரணைக்கு பிறகு நகைகள் உரிமையாளரிடம் ஒப்படைக்கப்பட்டன.

பத்மாவுக்கு குவியும் பாராட்டு

இந்தச் சம்பவம் சமூக வலைதளம் வாயிலாக வைரலானது. தூய்மைப் பணியாளர் பத்மாவின் நேர்மையை பாராட்டி, தமிழக முதல்வர் மு.க.ஸ்டாலின் அவரை நேரில் அழைத்து பாராட்டினார். அதுமட்டிமின்றி அவருக்கு சால்வை அணிவித்து கெளரவித்த முதல்வர், ரூ.1 லட்சம் ரொக்கப் பரிசு வழங்கினார். பத்மாவின் இந்த செயலுக்கு நெட்டிசன்கள் சமூக வலைதளங்களில் வாழ்த்து மழை பொழிந்து வந்தனர். தற்போது பத்மாவுக்கு மற்றுமொரு பிரபலத்திடம் இருந்து பரிசு கிடைத்துள்ளது.

பத்மாவுக்கு பரிசளித்த ரஜினிகாந்த்

அவர் வேறு யாருமில்லை சூப்பர்ஸ்டார் தான். நடிகர் ரஜினிகாந்த் பத்மாவை நேரில் அழைத்து, அவரது நேர்மையை பாராட்டி தங்கச் செயின் ஒன்றை பரிசாக வழங்கினார். ரஜினியின் இந்த செயலுக்கு சமூக வலைதளங்களில் பலரும் பாராட்டுகளை தெரிவித்து வருகின்றனர். நேர்மை தான் உண்மையான செல்வம் என்பதை பத்மாவின் செயலும், அதை மதித்த தலைவர்களும் நிரூபித்துள்ளதாக நெட்டிசன்கள் கருத்து தெரிவித்து வருகின்றனர். அண்மையில் மதுரையில் மலிவு விலையில் புரோட்டா விற்பனை செய்து வரும் தன்னுடைய ரசிகரை நேரில் அழைத்து பாராட்டி இதேபோல் தங்கச் செயின் ரஜினி பரிசளித்தது குறிப்பிடத்தக்கது.