தமிழ் சினிமாவில் பல பிரமாண்ட படங்களை அடுத்தடுத்து தயாரித்து வரும் லைகா நிறுவனத்தின் (Lyca Productions) உரிமையாளரும், தொழிலதிபருமான சுபாஸ்கரன் அல்லிராஜா (Subaskaran Allirajah) தன்னுடைய மனைவி பிரேமாவுடன் (Prema), பாரம்பரிய உடையான வேஷ்டி சட்டையில் வந்து சுவாமி தரிசனம் செய்த புகைப்படங்கள் வெளியாகியுள்ளது..
தளபதி விஜய் (Actor Vijay) நடிப்பில், இயக்குனர் ஏ.ஆர்.முருகதாஸ் (A.R.Murugadoss) இயக்கத்தில் கடந்த 2014 ஆம் ஆண்டு வெளியான 'கத்தி' படம் மூலம் தயாரிப்பாளராக அறிமுகமானவர் சுபாஸ்கரன் அல்லிராஜா. இதை தொடர்ந்து, பெரிய நடிகர்கள் படங்களை மட்டுமே தயாரிக்காமல், பல சிறிய பட்ஜெட் படங்களை தயாரித்து, வளர்ந்து வரும் நடிகர்களுக்கும் வாய்ப்பளித்தார். குறுகிய காலத்தில் தனது லைகா புரொடக்ஷன்ஸ் நிறுவனம் மூலம் தொடர்ந்து பல்வேறு படங்களை தயாரித்து திரையுலகில் நிலையான இடத்தை பிடித்தார்.
தமிழ் படங்களை தொடர்ந்து, சில ஹிந்தி படங்களையும் லைகா நிறுவனம் தற்போது தயாரித்து வருகிறது. குறிப்பாக தமிழில், மிக பிரமாண்ட பொருட்செலவில் உருவாகி வரும் 'பொன்னியின் செல்வன்', 'இந்தியன் 2', வடிவேலுவின் 'நாய் சேகர் ரிட்டர்ன்ஸ்' , சிவகார்த்திகேயனின் 'டான்' உள்ளிட்ட படங்களையும் சில ஹிந்தி படங்களையும் தயாரித்து வருகிறது.
இங்கிலாந்தை தலைமையிடமாகக் கொண்டு தற்போது லைகா நிறுவனம் செயல்பட்டு வருகிறது. இதன் ஒரு பகுதியாக இருந்து வரும், லைகா மொபைல் நிறுவனம், பல்வேறு உலக நாடுகளில் முன்னணி தொலைதொடர்பு நிறுவனமாக உள்ளது.
ஒரு தயாரிப்பாளராகவும், தொழிலதிபராகவும் வெற்றிவாகை சூடிவிட்ட இலங்கையை சேர்ந்த தமிழரான இவர், சமூக சேவையிலும் தாராள மனசுக்காரர். இலங்கையின் வடகிழக்குப் பகுதியில் தமிழர்களுக்காக நூற்றுக்கணக்கான வீடுகளை கட்டி கொடுத்துள்ளார். ஆப்பிரிக்க நாடுகளில் உள்ள சிறுவர்களுக்கு, உணவு, உடை, கல்வி, என பல்வேறு வகையில் உதவிகள் செய்து வருகிறார். விளையாட்டு வீரர்களுக்கு உபகரணங்கள், குடிநீர் தட்டுப்பாடு உள்ள நாடுகளில் அதற்கான வசதிகள் என இவரது சேவைகள் நீண்டு கொண்டே செல்கிறது. சமீபத்தில் கூட சமூக சேவைகளைப் பாராட்டி மலேசியாவில் உள்ள அமிஸ்ட் (ஏசியன் இன்ஸ்டிடியூட் ஆஃப் மெடிசின், சயின்ஸ் அண்ட் டெக்னாலஜி) சுபாஸ்கரனுக்கு கவுரவ டாக்டர் பட்டம் வழங்கி சிறப்பித்துள்ளது.
தொடர்ந்து தன்னலம் பாராமல், பலருக்கு உதவ வேண்டும் என்கிற முன்னெடுப்போடு செயல்பட்டு வரும் சுபாஸ்கரன், ராமேஸ்வரம் கோவிலுக்கு, பாரம்பரியம் மாறாமல்... வேஷ்டி அணிந்தபடி தன்னுடைய மனைவியுடன் வந்து சுவாமி தரிசனம் செய்துள்ளார். இவருடன் பாமக தலைவர் ஜி.கே.மணியும் ராமேஸ்வரம் கோவிலுக்கு சென்றுள்ளார். இந்த புகைப்படங்கள் தற்போது வெளியாகி வைரலாக பார்க்கப்பட்டு வருகிறது.