Jana nayagan: "தலைவா உன் பின்னால் நாங்கள் இருக்கிறோம்!" - விஜய்க்கு ஆதரவாக அணிவகுக்கும் கோலிவுட் பட்டாளம்.!

நடிகர் விஜய்யின் ஜனநாயகன் திரைப்படம் தணிக்கைச் சான்றிதழ் பெறுவதில் ஏற்பட்ட சிக்கலால் தற்காலிகமாக தள்ளிவைக்கப்பட்டுள்ளது. இந்த இக்கட்டான சூழலில், ரத்ன குமார், சிபிராஜ் உள்ளிட்ட பல திரையுலகப் பிரபலங்கள் விஜய்க்கு தங்கள் ஆதரவை தெரிவித்து வருகின்றனர்.

காத்திருக்கும் விஜய் ரசிகர்கள்

தமிழ் சினிமாவின் உச்ச நட்சத்திரமான விஜய், நடிப்பிலிருந்து விலகி முழுநேர அரசியலில் ஈடுபடப்போவதாக அறிவித்துள்ள நிலையில், அவரது தற்போதைய படமான 'ஜனநாயகன்' மீது பெரும் எதிர்பார்ப்பு நிலவி வருகிறது. ஆனால், திட்டமிட்டபடி இப்படம் வெளியாவதில் சென்சார் சான்றிதழ் பெறுவது பெரும் தடையாக உருவெடுத்துள்ளது.

தாமதத்திற்கான காரணம்

ஜனநாயகன்' படத்தின் ரிலீஸ் தேதி தணிக்கை சான்றிதழ் கிடைப்பதில் ஏற்பட்ட இழுபறி காரணமாகத் தற்போது தள்ளிவைக்கப்பட்டுள்ளது. இது தொடர்பாகத் தொடரப்பட்ட வழக்கில், நீதிமன்றம் தனது தீர்ப்பை ஜனவரி 9-ஆம் தேதிதான் அறிவிக்கும் என்று கூறியுள்ளது. இதன் விளைவாக, தயாரிப்புத் தரப்பு வேறு வழியின்றி படத்தின் வெளியீட்டைத் தற்காலிகமாக ஒத்திவைத்துள்ளது. இந்த அறிவிப்பு விஜய் ரசிகர்களிடையே பெரும் ஏமாற்றத்தையும் அதிர்ச்சியையும் ஏற்படுத்தியுள்ளது.

திரையுலகப் பிரபலங்களின் ஆதரவு

இக்கட்டான இந்தச் சூழலில், தமிழ் திரையுலகைச் சேர்ந்த பல இயக்குநர்களும் நடிகர்களும் விஜய்க்கு ஆதரவாகத் தங்கள் கருத்துகளைப் பகிர்ந்து வருகின்றனர்:

இயக்குநர் ரத்ன குமார்

 "தமிழ் சினிமா ஆபத்தில் இருக்கிறது" என்று கவலை தெரிவித்துள்ள அவர், "விஜய் சார் வலிமையாக இருங்கள். கொரோனா காலக்கட்டத்தில் சரிந்திருந்த தமிழ் சினிமாவை மீட்டெடுத்தவர் நீங்கள். இந்தப் படமும் வெளியாகும் நாள் அன்றுதான் எங்களுக்குத் திருவிழா" என உருக்கமாகப் பதிவிட்டுள்ளார்.

நடிகர் சிபிராஜ்

தற்போதைய சூழ்நிலையைப் பற்றிக் குறிப்பிட்டுள்ள அவர், "இப்போது நடப்பதைப் பார்த்தால், இது 'ஜனநாயகன்' படம் மிகப்பெரிய வெற்றியைப் பெறுவதற்கான ஒரு முன்னோட்டமாகவே தெரிகிறது. நம்பிக்கையுடன் இருங்கள், வெற்றி நிச்சயம்" என்று ஊக்கமளித்துள்ளார்.

இயக்குநர் அஜய் ஞானமுத்து மற்றும் நடிகை சனம் ஷெட்டி

இவர்களும் விஜய்க்குத் தங்கள் ஆதரவைத் தெரிவித்துள்ளனர். குறிப்பாக, சனம் ஷெட்டி "வா தல, நாங்க இருக்கோம்" என உற்சாகப்படுத்தியுள்ளார்.

திரைத்துறையின் கவலை

கடந்த சில மாதங்களாகவே பெரிய பட்ஜெட் படங்கள் தணிக்கை மற்றும் ரிலீஸ் சிக்கல்களால் தள்ளிப்போவது தமிழ் சினிமாத் துறைக்கு ஆரோக்கியமானதாக இல்லை என்று பலரும் கருத்துத் தெரிவித்து வருகின்றனர். 'ஜனநாயகன்' படத்தின் அரசியல் பின்னணி மற்றும் அதில் உள்ள சில காட்சிகள் காரணமாகவே இந்தத் தணிக்கை கெடுபிடிகள் இருப்பதாகக் கூறப்படுகிறது.