ஒரே ஒரு கையெழுத்தால் 100 கோடியை இழந்த அஜித் பட நடிகை... 1000 படங்களில் நடித்தவருக்கு இந்த நிலைமையா?

Actress Lost 100 Crore with One Signature : தமிழ் மற்றும் தெலுங்கில் 1000-க்கும் மேற்பட்ட படங்களில் நடித்து, இயல்பான நடிப்பால் ரசிகர்களைக் கவர்ந்த பிரபல நடிகையின் வாழ்க்கைக்குள் இவ்வளவு பெரிய சோகங்கள் ஒளிஞ்சிருக்கா?

திரையில் கம்பீரம் காட்டிய குணச்சித்திர நடிகை

தமிழ் மற்றும் தெலுங்கு சினிமாவில் அம்மா, அக்கா கதாபாத்திரங்களில் நடித்து கோடிக்கணக்கான ரசிகர்களின் மனதை வென்றவர் நடிகை சுதா. கமல், ராமராஜன், விஷால், ஜெயம் ரவி, சூர்யா, மாதவன் போன்ற முன்னணி நடிகர்களின் படங்களில் முக்கிய வேடங்களில் இவர் நடித்துள்ளார். சுமார் 1000-க்கும் மேற்பட்ட படங்களில் நடித்து தனது இயல்பான நடிப்பால் தனி அடையாளம் பெற்றார். திரையில் மிகவும் அமைதியாகவும் கம்பீரமாகவும் தோன்றும் இவருடைய வாழ்க்கைக்குள் பல சோகங்கள் மறைந்து கிடக்கின்றன.

ராஜவாழ்க்கை வாழ்ந்த சுதா

நடிகை சுதா ஒரு மிகப்பெரிய பணக்காரக் குடும்பத்தில் பிறந்தவர். நான்கு சகோதரர்களுக்கு நடுவே ஒரே பெண் குழந்தையாக வளர்ந்ததால், பெற்றோர் அவரை செல்லமாக வளர்த்தார்கள். கார்கள், சொகுசு வாழ்க்கை, வீடு நிறைய வேலைக்காரர்கள் என ஒரு மகாராணி போல வாழ்ந்தார். ஆனால், கொஞ்ச நாட்களிலேயே அவருடைய தந்தைக்கு புற்றுநோய் பாதிப்பு ஏற்பட்டது. இதனால் அந்த குடும்பம் கடுமையான நிதி நெருக்கடியில் சிக்கியது. தந்தையின் மருத்துவச் செலவுக்காக இருந்த சொத்துக்கள் அனைத்தும் கரைந்தன. அப்போது சுதாவுக்கு பத்து வயது கூட ஆகவில்லை.

தலைகீழாக மாறிய சுதாவின் வாழ்க்கை

சிறிய வயதிலேயே வறுமை சூழ்ந்தது. படிக்கக் கூட பணமில்லாமல், கடைசியில் தாயின் தாலியை அடமானம் வைக்கும் அளவுக்கு நிலைமை மோசமானது. சிறுவயதிலேயே கஷ்டங்களை பார்த்ததால், சுதா தனது வாழ்க்கையை திட்டமிட்டு அமைத்துக் கொண்டார். மெதுவாக நடிப்புத்துறையில் அடியெடுத்து வைத்தார். தனது திறமையால் திரையுலகில் பிஸியான நடிகையாக மாறி, பெருமளவு பணத்தையும் புகழையும் சம்பாதித்தார். டோலிவுட், கோலிவுட் என இரண்டு துறைகளிலும் முன்னணி நடிகையாக ஜொலித்தார். தொழில்கள் மூலமாகவும் கோடிக்கணக்கில் சொத்து சேர்த்தார். சரியா அந்த நேரத்தில்தான் அவர் வாழ்க்கையில் அடுத்த கட்ட சோகம் தொடங்கியது.

100 கோடி இழப்பு

வாழ்க்கை மீண்டும் சீரான நிலைக்கு வந்தபோது, அவர் தொழில் துறையில் இறங்கினார். டெல்லியில் பெரிய முதலீட்டில் ஹோட்டல் தொழில் தொடங்கினார். அந்த தொழில் பரிவர்த்தனையின் போது அவர் போட்ட ஒரே ஒரு கையெழுத்து, அவர் வாழ்க்கையையே தலைகீழாக மாற்றியது. அந்த ஆவணத்தில் போட்ட கையெழுத்தால், வாழ்நாள் முழுவதும் கஷ்டப்பட்டு சம்பாதித்த 100 கோடி ரூபாய்க்கும் அதிகமான சொத்துக்களை ஒரே கணத்தில் இழந்தார்.

பொருளாதார ரீதியாக மீள முடியாத அடியை வாங்கிய சுதாவுக்கு, சொந்த வாழ்க்கையிலும் கசப்பான அனுபவங்கள் மட்டுமே கிடைத்தன. சொத்துக்கள் கரைந்த கஷ்ட காலத்தில் கணவர் அவருக்கு துணையாக நிற்காமல், அவரை விட்டு பிரிந்து சென்றார். உயிருக்கு உயிராக வளர்த்த சொந்த மகனும் ஒரு சிறிய கருத்து வேறுபாடு காரணமாக அவரை விட்டு விலகி வெளிநாட்டில் குடியேறினார். இப்படி எல்லாம் இருந்தும், தற்போது அவர் தனிமையில் வாழ்ந்து வருகிறார்.