samantha new movie : அண்ணனை தொடர்ந்து தம்பியை டார்கெட் செய்யும் சமந்தா... எல்லாம் பேச்சிலரின் மகிமை

நடிகை சமந்தா தற்போது ‘காத்துவாக்குல ரெண்டு காதல், சகுந்தலம், யசோதா, அரேஞ்ச்மென்ட்ஸ் ஆஃப் லவ் என ஏராளமான படங்களை கைவசம் வைத்துள்ளார். 

நடிகை சமந்தா (Samantha), தன்னுடைய காதல் கணவர் நாக சைதன்யாவை விட்டு பிரிந்த பின்னர் அவரது கேரியர் நாளுக்கு நாள் உயர்ந்து கொண்டே செல்கிறது. திருமண வாழ்க்கையில் நடிகை சமந்தா தோல்வியை சந்தித்தாலும், திரைத்துறையில் அடுத்தடுத்த லெவலுக்கு ஜெட் வேகத்தில் முன்னேறி வருகிறார்.

தெலுங்கு, தமிழ், இந்தி, என தொடர்ந்து பெண்களுக்கு முக்கியத்துவம் கொடுத்து எடுக்க கூடிய சிறந்த கதைகளையே தேர்வு செய்து நடித்து வருகிறார். இதுதவிர அல்லு அர்ஜுன் நடிப்பில் அண்மையில் வெளியான புஷ்பா படத்தில் இடம்பெறும் ஐட்டம் சாங்கில் உச்சகட்ட கவர்ச்சியில் அவர் ஆடிய நடனம் திரையுலகினரை மட்டுமல்லாது ரசிகர்களையும் ஆச்சர்யத்தில் ஆழ்த்தியது. சமந்தா ஆடிய ஐட்டம் பாடல் பட்டிதொட்டி எங்கும் பட்டையை கிளப்பியது. இப்பாடலுக்காக படத்தை பார்த்தவர்கள் ஏராளம்.

தற்போது இவர் ‘காத்துவாக்குல ரெண்டு காதல், சகுந்தலம், யசோதா, அரேஞ்ச்மென்ட்ஸ் ஆஃப் லவ் என ஏராளமான படங்களை கைவசம் வைத்துள்ளார். இதுதவிர ராஜ் மற்றும் டீகே இயக்கத்தில் இந்தியில் உருவாகும் வெப் தொடர் ஒன்றிலும் அவர் நடிக்க உள்ளார். இந்நிலையில், நடிகை சமந்தா மேலும் ஒரு தமிழ் படத்தில் கமிட் ஆகி உள்ளதாக தகவல் வெளியாகி உள்ளது.

அதன்படி ஜிவி பிரகாஷ், திவ்ய பாரதி நடிப்பில் கடந்த மாதம் திரையரங்குகளில் வெளியாகி வெற்றி பெற்ற பேச்சிலர் படத்தை இயக்கிய சதீஷ் செல்வகுமார் அடுத்ததாக இயக்க உள்ள படத்தில் நடிகை சமந்தா ஹீரோயினாக நடிக்க உள்ளதாக தகவல் வெளியாகி உள்ளது. இப்படத்தில் அவர் நடிகர் கார்த்திக்கு ஜோடியாக நடிக்க உள்ளதாக கூறப்படுகிறது.

விரைவில் இப்படம் குறித்த அதிகாரப்பூர்வ அறிவிப்பு வெளியாகும் என எதிர்பார்க்கப்படுகிறது. ஏற்கனவே சூர்யாவுடன் அஞ்சான் படத்தில் ஜோடியாக நடித்த சமந்தா தற்போது, அவரது தம்பி கார்த்தியுடன் ஜோடி சேர உள்ளார். இந்த கூட்டணி உறுதியானால், கார்த்தியும், சமந்தாவும் ஜோடியாக நடிக்கும் முதல் படமாக இது அமையும் என்பது குறிப்பிடத்தக்கது.