அம்மா-மகன், அம்மா-மகள் பாசத்தை மையமாகக் கொண்ட மறக்க முடியாத தமிழ் படங்கள் இவை. உணர்வுபூர்வமான கதைகள் முதல் சிக்கலான தாய்ப்பாசம் வரை, கட்டாயம் பார்க்க வேண்டிய 7 படங்கள் இதோ! உங்களுக்கு அம்மாவை ரொம்ப பிடிக்குமென்றால் இந்த படங்களை மிஸ் பண்ணிடாதீங்க!
அம்மாவை ரொம்ப பிடிக்குமா? இந்தப் படங்கள் உங்களுக்குத்தான்!
தமிழ் சினிமாவில் அம்மா கதாபாத்திரம் என்றாலே தியாகம், பாசம், சென்டிமென்ட் என்று மட்டும் இல்லாமல், வெவ்வேறு காலகட்டங்களில் பலவிதமான உறவுகளாகவும் காட்டப்பட்டுள்ளது. சில படங்களில் அம்மா தனது குழந்தைக்காக போராடுவார். சில படங்களில் மகன் தனது அம்மாவுக்காக எதையும் செய்யத் தயாராக இருப்பான்.
இன்னும் சில படங்களில் அம்மா என்ற உறவே எவ்வளவு சிக்கலானது என்பதை கதை காட்டும். அப்படி அம்மா-குழந்தை உறவை மையமாக வைத்து மனதில் நிற்கும் 7 தமிழ் படங்களை இங்கே பார்க்கலாம். காதல், குடும்பம், பிரிவு, தியாகம் என ஒவ்வொரு படமும் அம்மாவை வெவ்வேறு கோணத்தில் காட்டுகிறது.
என் பொம்முக்குட்டி அம்மாவுக்கு – தாய்ப்பாசத்திற்கு எல்லை உண்டா?
என் பொம்முக்குட்டி அம்மாவுக்கு (1988) இந்தப் பட்டியலில் கண்டிப்பாக இருக்க வேண்டிய படம். வினோத், லட்சுமி தம்பதியினர் தங்கள் மகளை விபத்தில் இழந்துவிடுகிறார்கள். அந்தத் துயரத்திலிருந்து மனைவியை மீட்டெடுக்க, ஒரு குழந்தையைத் தத்தெடுக்க வினோத் முடிவு செய்கிறார். அனாதை இல்லத்தில் இருக்கும் டின்னு என்ற சிறுமியைப் பார்த்த பிறகு லட்சுமியின் மனமும் மாறுகிறது. அந்தக் குழந்தையைத் தன் மகளாகவே ஏற்றுக்கொண்டு பாசத்துடன் வளர்க்கத் தொடங்குகிறார்.
ஆனால் ஒரு கட்டத்தில் அந்தக் குழந்தையின் உண்மையான பெற்றோர் அவளைத் தேடி வருகிறார்கள். இதில்தான் படத்தின் மிகப்பெரிய உணர்ச்சிப் போராட்டம் தொடங்குகிறது. ஒரு குழந்தையைப் பெற்றெடுத்த தாய் ஒருபுறம்; அந்தக் குழந்தையை தன் உயிராக வளர்த்த தாய் மறுபுறம். யார் அந்தக் குழந்தைக்கு அம்மா என்ற கேள்வியை மிகவும் உணர்வுபூர்வமாக அணுகும் படம் இது. சத்யராஜ், சுஹாசினி, ரகுவரன், ரேகா நடிப்பில் பாசில் இயக்கிய இந்தப் படம் 1988-ல் வெளியானது.
ராம் (2005) படத்தில் அம்மா-மகன் உறவு வழக்கமான சென்டிமென்ட் காட்சிகளைத் தாண்டி செல்கிறது. ராம் தனது அம்மா சாரதாவுடன் மிகவும் நெருக்கமான பந்தத்தில் இருக்கிறான். அந்த உறவுதான் அவனுடைய உலகம். அம்மாவின் மீது அளவுக்கு அதிகமான பாசம் கொண்ட மகன், வெளி உலகத்துடன் எப்படி உறவுகொள்கிறான் என்பதையும், அந்த உறவு அவனுடைய வாழ்க்கையை எப்படி பாதிக்கிறது என்பதையும் படம் காட்டுகிறது.
அதனால் இந்தப் படத்தை வெறுமனே அம்மா பாசப் படம் என்று சொல்லிவிட முடியாது. ஒரு தாயின் அன்பு ஒரு குழந்தையின் உலகத்தையே எப்படி வடிவமைக்கிறது? இந்தக் கேள்வியை சற்று வித்தியாசமான கோணத்தில் பார்க்க வைக்கும் படம் ராம்.
அம்மா கணக்கு (2016) படத்தின் மிகப்பெரிய பலமே அதன் அம்மா கதாபாத்திரம். வீட்டு வேலை செய்து வாழ்க்கையை நடத்தும் சாந்தி, தனது மகள் படித்து முன்னேற வேண்டும் என்று விரும்புகிறார். ஆனால் மகளுக்கும் அவருக்கும் இடையில் கல்வி, எதிர்காலம், வாழ்க்கையைப் பார்க்கும் விதம் என பல விஷயங்களில் முரண்பாடுகள் இருக்கின்றன. மகளுக்காக எல்லாவற்றையும் அமைதியாக தாங்கிக்கொள்ளும் அம்மா என்ற ஒரே கோணத்தில் கதை செல்லாமல், மகளின் வாழ்க்கையை மாற்ற வேண்டும் என்று நினைக்கும் ஒரு பெண்ணாகவும் அம்மாவை படம் காட்டுகிறது.
அதனால்தான் இந்தப் படம் வழக்கமான அம்மா சென்டிமென்ட் கதைகளில் இருந்து கொஞ்சம் வித்தியாசமாகத் தெரிகிறது. ஒரு அம்மா தனது குழந்தைக்காக என்ன செய்ய முடியும் என்பதோடு, அவள் குழந்தையின் எதிர்காலத்தைப் பற்றி எவ்வளவு தீவிரமாக யோசிக்கிறாள் என்பதையும் இந்தப் படம் பேசுகிறது.
எம். குமரன் சன் ஆஃப் மகாலட்சுமி – அம்மாதான் ஹீரோவின் பலம்!
எம். குமரன் சன் ஆஃப் மகாலட்சுமி (2004) படத்தின் தலைப்பிலேயே அம்மாவின் முக்கியத்துவம் தெரிந்துவிடும். மகாலட்சுமி தனது மகன் குமரனை தனியாக வளர்க்கிறார். அம்மா-மகன் உறவு இந்தப் படத்தின் உணர்ச்சிப் பகுதியாக மட்டும் இல்லாமல், குமரனின் குணத்தையும் அவனுடைய வாழ்க்கைப் பார்வையையும் உருவாக்கிய முக்கியமான சக்தியாக இருக்கிறது.
இங்கே அம்மா என்பது மகனுக்காக அழும் கதாபாத்திரம் மட்டும் இல்லை. தனது வாழ்க்கையைத் தனியாக சமாளித்து, மகனை தன்னம்பிக்கையுடன் வளர்க்கும் பெண். அதனால்தான் மகாலட்சுமி கதாபாத்திரம் இன்றும் ரசிகர்களுக்கு நினைவில் நிற்கிறது.
பிச்சைக்காரன் – அம்மாவுக்காக எல்லாவற்றையும் துறந்த மகன்!
பிச்சைக்காரன் (2016) படத்தின் மையமே அம்மாதான். அருள் தனது தாயின் உயிரைக் காப்பாற்ற வேண்டும் என்பதற்காக, தன்னிடம் இருக்கும் பணம், வசதி, அந்தஸ்து என அனைத்தையும் விட்டு விலகி ஒரு கடினமான முடிவை எடுக்கிறான். அதன்பிறகு நடக்கும் சம்பவங்கள்தான் முழுக் கதையையும் நகர்த்துகின்றன.
இந்தப் படத்தில் வழக்கமான அம்மா குழந்தைக்காக தியாகம் செய்கிறார் என்ற கோணம் இல்லை. அதற்கு பதிலாக, ஒரு மகன் தனது அம்மாவுக்காக எவ்வளவு தூரம் செல்ல முடியும்? என்ற கேள்வியை படம் முன்வைக்கிறது. அதனால்தான் இந்தப் படம் அம்மா சென்டிமென்ட் படங்களின் பட்டியலில் தனி இடம் பிடிக்கிறது.
வேலையில்லா பட்டதாரி – அம்மா என்றால் சென்டிமென்ட் மட்டும் இல்லை!
வேலையில்லா பட்டதாரி (2014) படத்தில் புவனா மற்றும் ரகுவரன் இடையிலான அம்மா-மகன் உறவு மிகவும் இயல்பாக அமைந்திருக்கும். இங்கே அம்மா என்றால் எப்போதும் மகனைப் பார்த்து அழும் கதாபாத்திரம் கிடையாது. மகனைத் திட்டுவது, அவனுடன் வாக்குவாதம் செய்வது, அவனைப் புரிந்துகொள்வது, அவனுக்கு ஆதரவாக நிற்பது என ஒரு வீட்டில் நடக்கும் இயல்பான அம்மா-மகன் உறவைப் போலவே இந்தப் பந்தம் அமைந்திருக்கிறது.
அதனால்தான் இந்தப் படத்தில் வரும் அம்மா காட்சிகள் பலருக்கும் தங்கள் சொந்த வீட்டை நினைவுபடுத்தும். அம்மா என்றால் தியாகம் மட்டுமல்ல; நண்பர், ஆலோசகர், கண்டிப்பவர் என பல முகங்கள் இருக்கின்றன என்பதை நினைவுபடுத்தும் படம் இது.
கன்னத்தில் முத்தமிட்டாள் (2002) இந்தப் பட்டியலில் மிகவும் முக்கியமான படமாக இருக்கலாம். அமுதாவுக்கு 9 வயதாகும்போது, தான் வளர்ப்புப் பிள்ளை என்ற உண்மை தெரிய வருகிறது. அதன்பிறகு தனது உண்மையான தாயைச் சந்திக்க வேண்டும் என்ற ஆசை அவளுக்குள் உருவாகிறது. தனக்கு அன்பையும் பாதுகாப்பையும் கொடுத்து வளர்த்த இந்திரா ஒருபுறம் இருக்க, தன்னைப் பெற்றெடுத்த தாய் ஷியாமா மறுபுறம் இருக்கிறார். அமுதா தனது பிறந்த தாயைத் தேடி இலங்கைக்குச் செல்லும் பயணம்தான் கதையின் முக்கியமான உணர்ச்சிப் பாதை. அவளை அழைத்துக்கொண்டு போவதே அவளுடைய வளர்ப்பு தாய்தான்.
இந்தப் படத்தின் சிறப்பு என்னவென்றால், இது அம்மா-மகள் பாசத்தை ஒரே கோணத்தில் காட்டவில்லை. பெற்றெடுத்த தாய், வளர்த்த தாய், தாயைத் தேடும் குழந்தை — இந்த மூன்று உணர்வுகளையும் ஒரே கதைக்குள் கொண்டு வருகிறது. அதனால்தான் பல ஆண்டுகள் கடந்தும், அம்மா-மகள் உறவைப் பற்றிய தமிழ் சினிமாவின் முக்கியமான படங்களில் ஒன்றாக கன்னத்தில் முத்தமிட்டாள் நினைவில் நிற்கிறது.
இந்தப் பட்டியலில் கூடுதலாக ஒரு படத்தை சேர்க்க வேண்டுமென்றால், அது பசும்பொன் (1995). பாரதிராஜா இயக்கிய இந்தப் படம் அம்மா-மகன் பாசப் போராட்டத்தை வேறொரு கோணத்தில் காட்டி நம்மை இதயம் கணக்க வைக்கிறது. கணவன் இளைமையிலேயே இறந்துவிடுவதால் இரண்டாம் திருமணம் செய்துகொள்ளும் தாயிடமிருந்து விலகி வாழும் மகனும், அவனுடைய பாசம் கிடைக்காதா என அணு தினமும் ஏங்கித் தவிக்கும் அம்மாவும் நம்மை கலங்க அடித்து விடுகிறார்கள்.
படம் முழுவதும் அம்மாவும், மகனும் சேர மாட்டார்களா என பரிதவிப்போடு காத்திருக்கும் நமக்கு அந்த கிளைமாக்ஸ் காட்சி மனதை பிடித்து அழுத்துகிறது. தாய் பாசம் மட்டுமின்றி அண்ணன்-தம்பி பாசத்தை ஒரே ஒரு சீனில் காட்டும் போது நம் கண்கள் ஆனந்தத்தில் பனிக்கின்றன. கண்ணீர் தாரை தாரையாக சிந்தி ஒரு அன்பு பெருவெளியில் சிக்கி வெளியே வரும் நமக்கு இந்த படம் நிறைய விஷயங்களை யோசிக்க வைக்கும்.
1995-ல் வெளியான இந்தப் படத்தில் பிரபு, சிவாஜி கணேசன், சிவக்குமார், ராதிகா, சரண்யா பொன்வண்ணன் உள்ளிட்டோர் நடித்திருந்தனர்.
தமிழ் சினிமா (Tamil Cinema News), டிவி நிகழ்ச்சிகள் (Tamil TV Shows), செலிபிரிட்டி செய்திகள் மற்றும் சமீபத்திய அப்டேட்களுக்காக ஏஷ்யாநெட் தமிழ் நியூஸின் பொழுதுபோக்கு பிரிவை ஆராயுங்கள். சினிமா விமர்சனங்கள் (Tamil Movies Review), நட்சத்திரங்களின் நேர்காணல்கள், தொடர்களில் நடக்கும் ட்ராமா மற்றும் பொழுதுபோக்கு உலகின் டிரெண்ட்ஸ்பாட்டிங்குடன் எப்போதும் புதுப்பித்த நிலையில் இருங்கள். திரையரங்குப் பின்னணி கதைகள்,டிரெய்லர் வெளியீடுகள்மற்றும் ரெட் கார்பெட் தருணங்களை அறிந்து கொள்ளுங்கள்.
