தொழில் மற்றும் சொந்த வாழ்க்கைச் செலவுகளைப் பிரித்து நிர்வகிப்பது அவசியம். தொழில் லாபத்தை சொந்த செலவுகளுக்கும், சொந்த சேமிப்பை வியாபாரச் செலவுகளுக்கும் பயன்படுத்துவதைத் தவிர்க்க வேண்டும். இது நிதி நெருக்கடிகளைத் தடுக்கும்.
சிறிய வணிகம் நடத்துகிறவர்களாக இருந்தாலும், பெரிய நிறுவனங்களை நடத்தும் முதலாளிகளாக இருந்தாலும், பலரும் செய்யும் மிகப் பெரிய தவறு ஒன்று – தொழிலுக்கான பணத்தையும், சொந்த வாழ்க்கைச் செலவுகளையும் ஒன்றாகக் குழப்பி விடுவது தான். இன்று லாபம் வந்திருக்கிறது என்று சொந்த செலவுக்கு தொழிலின் பணத்தை எடுத்துக் கொள்வது, சில நாட்கள் பிறகு சொந்த சேமிப்பை எடுத்து வியாபாரச் செலவில் போடுவது இவற்றால், எப்போது பணம் எங்கு சென்றது என்று கணக்கு சரியாகத் தெரியாமல், கடைசியில் நஷ்டமும், நெருக்கடிகளும் வந்து சேரும்.
27
நிறுவன பணத்தை குடும்பத்திற்கு தரவேண்டாம்!
சொந்த தொழில் என்பது நிச்சயமாக செல்வம் உருவாக்க ஒரு சக்திவாய்ந்த வாய்ப்பு என்பதே சரி. ஆனால் அதை மட்டுமே நம்பி நிதி பாதுகாப்பு கிடைக்கும் என்று நினைப்பது தவறு. வணிக உலகம் எப்போதும் மாற்றங்களால் நிரம்பியிருக்கிறது. எதிர்பாராத போட்டிகள், சந்தை சரிவுகள், பொருளாதாரப் பிரச்சினைகள் வந்து விடலாம். இந்நேரத்தில் சொந்த வாழ்க்கைச் செலவுகளுக்கு தொழிலின் பணத்தைப் பயன்படுத்தினால், இரண்டு இடத்திலும் கையிருப்பில்லாமல் நிற்பீர்கள்.
37
தனித்தனி நிர்வாகம் தேவை
இதற்கான மிக எளிய தீர்வு – தொழிலின் நிதி நிர்வாகமும், சொந்த நிதி நிர்வாகமும் தனியாக இருக்க வேண்டும். தனிப்பட்ட சேமிப்புகள், முதலீடுகள், அவசரகால நிதி போன்றவை தொழிலுக்கு ஒதுக்கப்பட்ட பணங்களோடு கலக்காமல் இருக்க வேண்டும். உதாரணத்திற்கு, ஒரு சிறு தொகையை எஸ்.ஐ.பி அல்லது பி.பி.எப் போன்ற திட்டங்களில் நீண்ட கால சேமிப்புக்கு ஒதுக்குங்கள். 6 முதல் 12 மாதங்கள் வரை குடும்ப செலவுக்கான அவசர நிதியை எப்போதும் தனியாக வையுங்கள். அவசரங்கள் வந்தால், தொழிலின் பணத்தை எடுக்க வேண்டிய நிலை இருக்காது.
உங்களுக்கும் குடும்பத்திற்கும் போதிய மருத்துவக் காப்பீடு, வாழ்க்கை காப்பீடு எடுக்க வேண்டும். தொழில் செய்யும் இடத்தில் முக்கிய நபர் காப்பீடு, முதலாளி–பணியாளர் காப்பீடு போன்று உத்திகளை கொண்டு வரலாம். இவை தொழிலையும், குடும்பத்தையும் பாதுகாப்பாக வைக்கும். அதேசமயம் வரி சலுகைகள் கிடைக்கும்.
57
முதலீட்டில் கவனம் தேவை
பெரும்பாலும், தொழில் வளர்ந்தால் சொந்த நிதி நிலையையும் அது காப்பாற்றும் என்று எண்ணுவோம். ஆனால் உண்மையில் சொந்த நிதி திட்டமிடல் இல்லாமல், தொழிலில் பூரண முதலீடு செய்து விடுவதை நினைத்தால் இது ஆபத்து. தொழிலுக்கு வந்த பணத்தை சரியாக மறுமுதலீடு செய்வது நல்லது தான். ஆனால், சொந்த வாழ்வின் நிதிப் பாதுகாப்பை உறுதி செய்த பிறகே அப்படி செய்ய வேண்டும்.
67
மாற்றம் செய்ய வேண்டும்
நிதி ரீதியாக சுயாதீனமாக இருந்தால், தொழில் வளர்ச்சிக்கே அதுவே உறுதியான ஆதாரம். சந்தையின் ஏற்றத் தாழ்வுகள், வருமானத்தில் மாற்றங்கள் போன்றவை உங்கள் சொந்த வாழ்வை பாதிக்காது. இதனால் தொழில் முடிவுகள் தெளிவாக எடுக்க முடியும். எப்போது வேண்டுமானாலும் உங்கள் சொந்த நிதி திட்டங்களை, தொழில் நிதி திட்டங்களையும் மீளாய்வு செய்து தேவையான மாற்றங்களைச் செய்யுங்கள்.
77
தனித்தனி நிர்வாகம் தேவை
சொந்த வாழ்வுக்கும் தொழிலுக்கும் தனித்தனி நிதி நிர்வாகம் இருக்கும்போதுதான் உங்கள் வளர்ச்சி, குடும்ப நலன், தொழில் விரிவாக்கம் – அனைத்தும் ஒரே சமயத்தில் வெற்றி பெறும்.
