Gift : உறவினர்கள் கொடுக்கும் பண அன்பளிப்புக்கு வரி கட்ட வேண்டுமா? ரூ.85.30 லட்சம் Gift வழக்கில் சென்னை ITAT அளித்த தீர்ப்பு, உறவினர்களிடமிருந்து பெறும் பணத்திற்கு பொருந்தும் வருமான வரி விதிகள் இதோ.
உறவினர் ரூ.85 லட்சம் அன்பளிப்பு கொடுத்தார்.. வரி கட்ட வேண்டுமா?
உறவினர்கள் அன்பாக கொடுக்கும் பணத்துக்கும் வருமான வரி வருமா என்ற சந்தேகம் பலருக்கும் இருக்கும். குறிப்பாக பெரிய தொகை வங்கிக் கணக்கில் வரும்போது, வருமான வரித்துறை அதன் மூலம், கொடுத்தவரின் அடையாளம், பரிவர்த்தனையின் உண்மைத் தன்மை போன்றவற்றை கேள்வி கேட்கலாம்.
சமீபத்தில் சென்னை வருமான வரி மேல்முறையீட்டு தீர்ப்பாயம் (ITAT) முன்பு வந்த வழக்கில், ஒருவர் தனது மனைவி, மாமனார்கள் உள்ளிட்ட 5 உறவினர்களிடமிருந்து மொத்தம் ரூ.85.30 லட்சம் பண அன்பளிப்பாக பெற்றிருந்தார்.
வருமான வரித்துறை இந்தத் தொகையை விளக்கப்படாத பணமாகக் கருதி வரி விதித்தது. ஆனால், அந்த நபர் அன்பளிப்பு பத்திரம், வருமான வரிக் கணக்கு உள்ளிட்ட ஆவணங்களை சமர்ப்பித்திருந்தார். அன்பளிப்பு கொடுத்த 5 பேரும் தாங்கள்தான் பணம் கொடுத்ததாக உறுதி செய்திருந்தனர்.
இந்த வழக்கில் ITAT, கொடுத்தவரின் அந்த ஆண்டுக்கான வருமானம் குறைவாக இருப்பது மட்டுமே அன்பளிப்பு போலியானது என்பதற்கான போதுமான காரணம் அல்ல என்று கூறி ரூ.85.30 லட்சம் வரி சேர்ப்பை நீக்கியது.
இந்த வழக்கில் கிடைத்த மொத்த அன்பளிப்பு ரூ.85.30 லட்சம்.
அதன் விவரம் :
மனைவி — ரூ.29 லட்சம்
சகோதரியின் கணவர் — ரூ.29 லட்சம்
தந்தை வழி மாமா — ரூ.9.30 லட்சம்
மற்றொரு தந்தை வழி மாமா — ரூ.9.30 லட்சம்
தாய் வழி மாமா — ரூ.8.70 லட்சம்
இந்தத் தொகை ரொக்கமாகப் பெறப்பட்டு வங்கிக் கணக்கில் செலுத்தப்பட்டது. வருமான வரித்துறை விசாரணை நடத்தியபோது, பணம் கொடுத்தவர்களின் வருமானத்துடன் ஒப்பிடுகையில் அன்பளிப்பு தொகை அதிகமாக இருப்பதாக கேள்வி எழுப்பப்பட்டது.
ஆனால், அந்த நபர் அன்பளிப்பு பத்திரங்கள், வருமான வரிக் கணக்கு விவரங்கள், நிதிநிலை அறிக்கைகள் உள்ளிட்ட ஆவணங்களை தாக்கல் செய்தார். மேலும், 5 பேரும் வருமான வரித்துறையின் நோட்டீஸுக்கு பதிலளித்து, தாங்கள்தான் அந்தப் பணத்தை அன்பளிப்பாக கொடுத்ததாக உறுதி செய்தனர்.
உறவினரிடம் இருந்து பெறும் பணத்துக்கு எப்போது வரி இல்லை?
வருமான வரிச் சட்டத்தின் பிரிவு 56(2)(x)-ன் கீழ், ஒருவருக்கு கிடைக்கும் பண அன்பளிப்பு பொதுவாக சில சூழல்களில் வருமானமாகக் கருதப்படலாம். ஒரு நிதியாண்டில் ரூ.50,000-ஐத் தாண்டும் பண அன்பளிப்பு, அது விதிவிலக்குக்குள் வரவில்லை என்றால், வரிக்கு உட்படலாம். ஆனால் குறிப்பிட்ட உறவினர்களிடம் இருந்து பெறப்படும் பணம் இந்த விதிவிலக்குக்குள் வருகிறது.
வரிச்சட்டத்தில் குறிப்பிடப்பட்ட உறவினர்களில், தனிநபரைப் பொறுத்தவரை பொதுவாக கணவன் அல்லது மனைவி, சகோதரர் அல்லது சகோதரி, பெற்றோரின் சகோதரர் அல்லது சகோதரி, நேரடி முன்னோர் மற்றும் சந்ததியினர், குறிப்பிட்ட உறவு வரம்புக்குள் வரும் அவர்களின் வாழ்க்கைத்துணை போன்ற உறவுகள் அடங்கும்.
அதனால் ₹50,000-க்கு மேல் கிஃப்ட் என்றாலே வரி என்பது முழுமையான விதி அல்ல. முதலில் அந்தப் பணத்தை கொடுத்தவர் சட்டத்தில் குறிப்பிடப்பட்ட ‘உறவினர்’ வரையறைக்குள் வருகிறாரா என்பதை பார்க்க வேண்டும்.
நண்பர் ரூ.1 லட்சம் கொடுத்தால்? இங்கேதான் முக்கிய விதி!
உறவினரிடம் இருந்து பெறும் அன்பளிப்புக்கும், நண்பர் அல்லது தொடர்பில்லாத ஒருவரிடம் இருந்து பெறும் அன்பளிப்புக்கும் வரி விதிகள் வேறுபடும். உதாரணமாக, நண்பர் ஒருவர் ரூ.1 லட்சம் பணத்தை எந்தப் பிரதிபலனும் இல்லாமல் கொடுத்தால், அந்தத் தொகை பொதுவாக ரூ.50,000 வரம்பு தொடர்பான விதிகளுக்குள் வரும்.
முக்கியமாக, ரூ.50,000 வரம்பு என்பது ஒரு தனிப்பட்ட Gift-க்கு மட்டும் அல்ல; அந்த நிதியாண்டில் கிடைத்த பண அன்பளிப்புகளின் மொத்த மதிப்பை அடிப்படையாகக் கொண்டது. அந்த மொத்த தொகை ரூ.50,000-ஐத் தாண்டினால், விதிவிலக்கு இல்லாத நிலையில் முழுத் தொகையும் வரிக்கு உட்படும்.
அதே நேரத்தில், திருமணத்தின் போது பெறும் அன்பளிப்பு, உயில் அல்லது வாரிசு மூலம் பெறும் சொத்து/பணம் போன்றவற்றுக்கும் தனித்தனி விதிவிலக்குகள் உள்ளன.
இல்லை. ₹10 லட்சம், ₹20 லட்சம் அல்லது அதைவிட அதிகமான தொகை உறவினரிடம் இருந்து கிடைத்தால், பரிவர்த்தனை உண்மையானது என்பதை நிரூபிக்கும் ஆவணங்களை வைத்திருப்பது மிகவும் முக்கியம்.
தேவைப்படும் ஆவணங்கள் :
பணம் கொடுத்தவரின் அடையாள ஆவணங்கள்
உறவு இருப்பதற்கான ஆதாரம்
அன்பளிப்பு பத்திரம்
பணம் கொடுத்தவரின் வருமான வரிக் கணக்கு
அவருடைய வங்கி மற்றும் நிதிநிலை விவரங்கள்
பணம் எங்கிருந்து வந்தது என்பதற்கான நியாயமான விளக்கம்
முடிந்தவரை வங்கி வழியான பரிவர்த்தனை
போன்ற ஆவணங்கள் உதவியாக இருக்கும்.
இந்த ₹85.30 லட்சம் வழக்கிலும், அன்பளிப்பு பத்திரம் மற்றும் வருமான வரிக் கணக்கு உள்ளிட்ட ஆவணங்களுடன், பணம் கொடுத்த 5 உறவினர்களும் வருமான வரித்துறையிடம் தாங்களே அன்பளிப்பு கொடுத்ததாக உறுதி செய்திருந்தனர்.
இந்த வழக்கில் வருமான வரித்துறை, அன்பளிப்பு கொடுத்தவர்களின் அறிவிக்கப்பட்ட வருமானத்துடன் ஒப்பிட்டு, அவர்களிடம் இவ்வளவு பணம் கொடுக்கும் அளவுக்கு நிதித் திறன் இருந்ததா என்று கேள்வி எழுப்பியது. ஆனால் ITAT, ஒரு வருடத்தின் வருமானத்தை மட்டும் பார்த்து ஒருவரின் முழுமையான நிதித் திறனை முடிவு செய்ய முடியாது என்று கூறியது.
முந்தைய சேமிப்பு, சேர்த்து வைத்த மூலதனம், வங்கி இருப்பு, பணப் பரிவர்த்தனைகள் போன்றவற்றையும் பார்க்க வேண்டியிருக்கலாம். இந்த வழக்கில் அன்பளிப்பு பத்திரங்கள், வருமான வரிக் கணக்குகள், நிதிநிலை அறிக்கைகள் உள்ளிட்ட ஆதாரங்கள் தாக்கல் செய்யப்பட்டதுடன், பணம் கொடுத்தவர்களும் பரிவர்த்தனையை உறுதி செய்திருந்தனர். இதனால் வரி செலுத்தியவரின் ஆரம்பகட்ட ஆதாரப் பொறுப்பு நிறைவேற்றப்பட்டதாக ITAT கூறி, ரூ.85.30 லட்சம் சேர்ப்பை நீக்கியது.
குறிப்பு : இந்தத் தீர்ப்பு உறவினரிடம் இருந்து எவ்வளவு பெரிய தொகையை ரொக்கமாக பெற்றாலும் வரி இல்லை என்று கூறவில்லை. ஒவ்வொரு பரிவர்த்தனையின் உண்மைத் தன்மை, உறவு, ஆவணங்கள் மற்றும் பணத்தின் பின்னணி ஆகியவை முக்கியம்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
