சொந்தமாக ஒரு வீட்டைக் கட்டி முடிப்பது என்பது ஒவ்வொரு மனிதனின் வாழ்நாள் கனவு. அந்தக் கனவு இல்லம் உறுதியானதாகவும், பாதுகாப்பானதாகவும், பல தலைமுறைகள் கடந்து நிலைத்து நிற்கக் கூடியதாகவும் அமைய வேண்டுமெனில், கட்டுமானத்தில் பயன்படுத்தப்படும் தரம் மிக முக்கியமானது. வீட்டின் வெளிப்புற அழகைவிட அதன் வலிமையும், நீடித்த தன்மையுமே முதன்மையானவை. அந்த வலிமையைத் தீர்மானிப்பதில் சிமென்ட், மணல், இரும்புக் கம்பிகள், ஜல்லிக்கற்கள் மற்றும் செங்கற்கள் ஆகியவை முக்கியப் பங்கு வகிக்கின்றன.
பொதுவாகப் பலர் கட்டுமானப் பொருள்களைத் தேர்வு செய்யும்போது விலையை மட்டுமே ஒப்பிட்டுப் பார்த்து முடிவு செய்கின்றனர். ஆனால், தரத்தில் சமரசம் செய்துகொண்டால் சில ஆண்டுகளிலேயே சுவர்களில் விரிசல், கூரைக் கசிவு, தூண்கள் பலவீனமடைதல் மற்றும் கம்பிகள் துருப்பிடித்தல் போன்ற கடுமையான பிரச்னைகள் ஏற்படக்கூடும். எனவே, பொருள்களின் தரமறிந்து வாங்குவது காலத்தின் கட்டாயம்.
ஒரு கட்டடத்தின் வலிமை அதன் வடிவமைப்பு சார்ந்தது மட்டுமல்ல; அதில் பயன்படுத்தப்படும் ஒவ்வொரு மூலப்பொருளின் தரத்தையும் சார்ந்தது. தரமான பொருள்களைப் பயன்படுத்துவதால் கட்டடத்தின் ஆயுட்காலம் கணிசமாக அதிகரிக்கிறது. அடிக்கடி ஏற்படும் பராமரிப்பு மற்றும் பழுதுபார்ப்புச் செலவுகள் குறைகின்றன. நிலநடுக்கம் போன்ற இயற்கைச் சீற்றங்களையும், அதிக சுமையையும் தாங்கும் திறன் கட்டடத்திற்கு கிடைக்கிறது. எதிர்காலப் பராமரிப்புச் செலவு குறைவதோடு, சொத்தின் மதிப்பும் பல மடங்கு உயர்கிறது.
25
சிமென்ட், இரும்புக் கம்பிகள் தேர்வு செய்வது எப்படி?
சிமென்ட் தேர்வு:
கவனிக்க வேண்டிய அம்சங்கள் கட்டுமானத்தின் 'இதயம்' என அழைக்கப்படும் சிமென்ட், கட்டடத்தின் அனைத்துப் பாகங்களையும் உறுதியாகப் பிணைக்கும் பணியைச் செய்கிறது. சிமென்ட் வாங்கும் முன் அதன் உற்பத்தி தேதியைக் கவனிக்க வேண்டும். கிடங்கில் நீண்ட காலம் வைக்கப்பட்டிருந்தால் அதன் வலிமை படிப்படியாகக் குறையும் என்பதால், புதிய சிமென்டைப் பயன்படுத்துவதே சிறந்தது.
பையைத் திறக்கும்போது அதில் பெரிய கட்டிகள் இருக்கக்கூடாது; கட்டிகள் இருந்தால் ஈரப்பதம் புகுந்துவிட்டது என அர்த்தம். கையில் எடுத்துப் பார்த்தால் மென்மையான பொடியாக இருக்க வேண்டும். அதன் நிறம் லேசான பச்சை கலந்த சாம்பல் நிறத்தில் இருப்பது நல்ல தரத்தின் அறிகுறி. மலிவான விலைக்குக் கிடைக்கிறது என்பதற்காக 6 மாதங்களுக்கும் மேலாக கிடங்கில் இருந்த சிமென்டைப் பயன்படுத்தினால், பிற்காலத்தில் சுவர்களில் விரிசல் ஏற்பட்டு கூடுதல் செலவு வைக்க நேரிடும்.
இரும்புக் கம்பிகள்:
கட்டடத்தின் எலும்புக்கூடு கட்டடத்தின் ஒட்டுமொத்த எடையையும் தாங்கி நிற்பவை இரும்புக் கம்பிகளே. வாங்கும்போது கம்பிகள் துருப்பிடிக்காமல் இருக்க வேண்டும். எளிதில் வளைக்க முடியாத அல்லது மேற்பரப்பில் சேதமடைந்த கம்பிகளைத் தவிர்க்க வேண்டும். அனைத்துக் கம்பிகளும் ஒரே சீரான விட்டத்தில் (Diameter) இருப்பதை உறுதி செய்ய வேண்டும்.
தரமான இரும்பை பயன்படுத்துவது நிலநடுக்கம், அதிக சுமை & பருவநிலை மாற்றங்களால் ஏற்படும் பாதிப்புகளைக் குறைக்கும். மலிவான தரமற்ற கம்பிகளைப் பயன்படுத்தினால் சில ஆண்டுகளிலேயே தூண்களில் விரிசல் தோன்றி பெரும் இழப்பை ஏற்படுத்தும்.
35
மணலின் தரம்: கண்டறிவது எப்படி?
மணல் என்பது வெறும் நிரப்புப் பொருள் மட்டுமல்ல, அது கான்கிரீட்டின் உறுதியையும், சுவர்களின் பலத்தையும் தீர்மானிக்கும் காரணியாகும். நல்ல மணலில் களிமண், சாதாரண மண், உப்பு மற்றும் உயிரியல் கழிவுகள் கலந்திருக்கக் கூடாது. அதிக மண் கலந்த மணலால் சிமென்ட் சரியாகப் பிணையாமல் வலிமை குன்றும்.
எளிய பரிசோதனை முறை: ஒரு வெளிப்படையான (டிரான்ஸ்பரன்ட்) பாட்டிலில் மணலையும் தண்ணீரையும் சேர்த்து நன்றாகக் குலுக்கி வைக்க வேண்டும். சிறிது நேரம் கழித்துப் பார்க்கும்போது, மணலின் மேலே சேற்று/மண் படலம் அதிகமாகத் தெரிந்தால், அந்த மணலின் தரம் குறைவு என்பதை அறியலாம். சீரான துகள்கள், உப்பு மற்றும் கழிவுகள் இல்லாத தயாரிப்பு மணல் (M-Sand), இன்றைய சூழலில் சுற்றுச்சூழல் பாதுகாப்பு காரணங்களுக்காகச் சிறந்த மாற்றாகப் பயன்படுத்தப்பட்டு வருகிறது.
ஜல்லிக்கற்கள் & செங்கற்களின் மதிப்பீடு ஜல்லிக்கற்கள்:
கான்கிரீட்டின் உறுதியை அதிகரிக்க உதவும் ஜல்லிகள் வலிமையாகவும், சீரான அளவிலும் இருக்க வேண்டும். தூசிகள் அதிகமாக இருந்தால் சிமென்ட் சரியாகப் படியாது; உடைந்த கற்கள் அதிகம் இருந்தால் வலிமை குறையும். 2 ஜல்லிக்கற்களை ஒன்றுடன் ஒன்று மோதும்போது தெளிவான வெண்கல ஒலி எழுந்தால் அவை நல்ல தரம் கொண்டவை.
சுவர்கள் நீண்ட காலம் பலமாக இருக்கச் செங்கற்களின் தரம் அவசியம். செங்கற்கள் அனைத்தும் ஒரே அளவு, நேரான வடிவம், சீரான சிவப்பு நிறம் மற்றும் உடையாத கூர்மையான மூலைகளுடன் இருக்க வேண்டும். 2 செங்கற்களை மோதும்போதும் தெளிவான ஒலி எழ வேண்டும். தண்ணீரை அதிகமாக உறிஞ்சும் அல்லது தண்ணீரில் எளிதில் கரையும் செங்கற்களைத் தவிர்ப்பது நல்லது.
55
சேமிப்பு முறைகளும் முன்னெச்சரிக்கைகளும்
பொருள்களை வாங்குவதுடன் பணி முடிந்துவிடுவதில்லை; அவற்றைப் பாதுகாப்பாகச் சேமிப்பதும் சம அளவு முக்கியம். சிமென்ட் மூடைகளைத் தரை அல்லது சுவரில் படாமல், ஈரப்பதமில்லாத இடத்தில் மரப்பலகைகளின் மேல் அடுக்கி வைக்க வேண்டும். இரும்புக் கம்பிகளை மழைநீர் தேங்காத இடங்களில் பாதுகாக்க வேண்டும்.
மணல் மற்றும் ஜல்லிக்கற்களைத் தரை மண் கலக்காதவாறு தனித்தனியாகக் குவித்து வைக்க வேண்டும். தவறான சேமிப்பு முறைகளால் பயன்பாட்டிற்கு முன்பே பொருள்களின் தரம் இழக்க நேரிடும்.
வீட்டின் ஆயுள் அதன் பூச்சிலோ வெளிப்புற அலங்காரத்திலோ இல்லை; அடித்தளக் கட்டுமானப் பொருள்களில்தான் உள்ளது. ஆரம்பத்தில் தரத்திற்கு முன்னுரிமை கொடுத்து சற்று கூடுதலாகச் செலவழித்தாலும், அது எதிர்காலப் பழுதுபார்ப்புச் செலவைத் தவிர்த்துப் பாதுகாப்பான வீட்டை உறுதி செய்யும். எனவே, விலையை விட தரமே சிறந்த முதலீடு என்ற விழிப்புணர்வோடு செயல்படுவதே புத்திசாலித்தனம்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
