FIFA World Cup 2026: முதல் வெற்றியை தேடும் பிரேசில்: ஹைட்டிக்கு எதிரான போட்டியில் வெல்லுமா?

FIFA உலகக் கோப்பை 2026 தொடரில், ஹைட்டிக்கு எதிரான அடுத்த போட்டியில் நிச்சயம் வெல்வோம் என பிரேசில் அணியின் பயிற்சியாளர் கார்லோ அன்செலோட்டி நம்பிக்கை தெரிவித்துள்ளார்.

Brazil vs Haiti : FIFA உலகக் கோப்பை 2026 தொடரில், தனது முதல் வெற்றியைப் பதிவு செய்யும் முனைப்புடன் பிரேசில் அணி களமிறங்குகிறது. குரூப் C-யின் இரண்டாவது போட்டியில் பிரேசில் அணி, ஹைட்டியை எதிர்கொள்கிறது. முதல் போட்டியில் ஏற்பட்ட குறைகளை சரிசெய்து அணி மீண்டு வரும் என்று தலைமைப் பயிற்சியாளர் கார்லோ அன்செலோட்டி நம்பிக்கை தெரிவித்துள்ளார். ஐந்து முறை உலக சாம்பியனான பிரேசில், தனது தொடக்க ஆட்டத்தில் மொராக்கோவுடன் 1-1 என்ற கோல் கணக்கில் டிரா செய்தது.

அந்தப் போட்டியில், மொராக்கோ சார்பில் இஸ்மாயில் சைபாரி கோல் அடித்து முன்னிலை பெற்றுத் தந்தார். பின்னர், வினிசியஸ் ஜூனியரின் சிறப்பான ஆட்டத்தால் பிரேசில் ஒரு கோல் அடித்து போட்டியை சமன் செய்தது. குரூப் C-ல், ஹைட்டியை வீழ்த்திய ஸ்காட்லாந்து 3 புள்ளிகளுடன் முதலிடத்தில் உள்ளது. எனவே, நாக் அவுட் சுற்றுக்கு முன்னேறும் வாய்ப்பை பிரகாசப்படுத்த, பிலடெல்பியாவில் நடைபெறும் இந்தப் போட்டியில் பிரேசில் வெற்றி பெறுவது அவசியம்.

இந்நிலையில், போட்டி நடைபெறும் பிலடெல்பியாவுக்கு பிரேசில் அணி வந்தடைந்துள்ளது. இதுகுறித்து பிரேசில் அணியின் அதிகாரப்பூர்வ X கணக்கில், "முழு பலத்துடன் களமிறங்குவோம்! நாங்கள் பிலடெல்பியா வந்துவிட்டோம், இன்று பிரேசில் தினம்! பிரேசிலியா நேரப்படி இரவு 9:30 மணிக்கு, ஹைட்டிக்கு எதிரான எங்களின் அடுத்தகட்ட பயணத்தைத் தொடங்குகிறோம்" என்று பதிவிட்டுள்ளது.

வெல்லும் முனைப்பில் பிரேசில்

மொராக்கோவுடனான டிரா குறித்து எழுந்த விமர்சனங்கள் பற்றி பேசிய அன்செலோட்டி, கவலைப்படத் தேவையில்லை என்று கூறினார். "முதல் போட்டியிலேயே உலகக் கோப்பையை வென்றுவிட முடியாது," என்று போட்டிக்கு முந்தைய நாள் செய்தியாளர்களிடம் ராய்ட்டர்ஸ் செய்தி நிறுவனத்தின்படி அவர் தெரிவித்தார். "வீரர்கள் தங்களை சுயபரிசோதனை செய்தது மிகவும் முக்கியமான விஷயம். நாங்கள் பிரச்சினைகளை சரிசெய்வோம் என்று நினைக்கிறேன்; நாங்கள் கடுமையாகப் போட்டியளிப்போம் என்ற நம்பிக்கை எனக்கு உள்ளது," என்று அவர் கூறினார்.

ஹைட்டிக்கு எதிரான போட்டியில் பிரேசில் அணியில் சில மாற்றங்கள் செய்யப்படும் என்று எதிர்பார்க்கப்படுகிறது. ஹைட்டி தனது முதல் போட்டியில் ஸ்காட்லாந்திடம் 1-0 என்ற கணக்கில் தோல்வியடைந்தது. இருப்பினும், பெரிய அளவில் மாற்றங்கள் இருக்காது என அன்செலோட்டி குறிப்பிட்டார். "நாங்கள் சில மாற்றங்களைச் செய்யப் போகிறோம்... எங்கள் ஆட்டத்தின் சமநிலையை மேம்படுத்தி, சிறப்பாக விளையாடுவோம்," என்றார். "நாங்கள் இன்னும் சிறப்பாக விளையாட முடியும், அதைச் செய்தாக வேண்டும்."

மொராக்கோவுக்கு எதிரான முதல் பாதியில் அணியின் மந்தமான ஆட்டத்திற்கு, உலகக் கோப்பையின் முதல் போட்டி அளித்த அழுத்தமும் ஒரு காரணமாக இருக்கலாம் என்று அந்த அனுபவமிக்க பயிற்சியாளர் சுட்டிக்காட்டினார்.

"முதல் பாதி ஆட்டம் சற்றும் எதிர்பாராதது; தொடக்க ஆட்டத்தில் பிரேசில் ஜெர்சியை அணியும் அழுத்தம் வீரர்களின் மனநிலையை சற்று பாதித்திருக்கலாம்," என்றார். "நல்ல தொடக்கம் முக்கியம்தான், ஆனால் அது மட்டுமே மிக முக்கியம் அல்ல. மொராக்கோவுக்கு எதிரான முதல் பாதியில் சரியாக விளையாடாத வீரர்களுக்கு நாங்கள் மேலும் வாய்ப்புகள் வழங்க வேண்டும். எங்கள் அணியில் யாரும் தங்களது சிறந்த ஆட்டத்தை வெளிப்படுத்தவில்லை. ஆனால், தொடக்கப் போட்டிகள் உலகக் கோப்பையின் இறுதி முடிவைத் தீர்மானிக்கும் என்று நான் நினைக்கவில்லை," என்றும் அவர் கூறினார்.

மேலும், தனது தலைமையின் கீழ் பிரேசில் அணிக்கு ஒரு குறிப்பிட்ட ஆட்ட பாணி இல்லை என்ற கவலையை அன்செலோட்டி நிராகரித்தார். சூழ்நிலைக்கு ஏற்ப தன்னை மாற்றிக்கொள்வது அணியின் பலங்களில் ஒன்று என்று அவர் வாதிட்டார்.

"எனக்கு ஒரே ஒரு அடையாளம் வேண்டாம். என் அணிக்கு பல அடையாளங்கள் இருக்க வேண்டும் என்று நான் விரும்புகிறேன்," என்றார். தொடரின் முதல் வெற்றியைப் பெறும் முனைப்பில் பிரேசில் அணி ஹைட்டியை எதிர்கொள்ளும் நிலையில், பயிற்சியாளர் அன்செலோட்டியின் நம்பிக்கை அணிக்கு உத்வேகம் அளித்துள்ளது.