பிரபல நடிகையின் பாத்ரூம் குளியல் முதல் பூட்டிய அறைக்குள் நடக்கும் புதுமண தம்பதிகளின் தாம்பத்திய உறவு வரையிலான அந்தரங்க விஷயங்களை ரகசிய கேமரா மூலம் சில விஷமிகள் படமாக்கி அதனை யூடியூபில் பதிவேற்றி விடுகின்றனர் என இயக்குனர் வெற்றிமாறன் ஆபாச பட பிரியர்களை வறுத்தெடுத்துள்ளார்.
இதனால் ஏற்படும் பாதிப்பை மையமாக வைத்து உருவாகியிருக்கும் படம் ‘லென்ஸ்’. ஜெயபிரகாஷ் ராதா கிருஷ்ணன் இயக்கி நடித்துள்ளார். மேலும் ஆனந்த்சாமி, அஸ்வதி லால், மிஷா கோஷல் உள்ளிட்டோரும் நடித்துள்ளனர்.
இதுபற்றி இயக்குநர் ஜெயபிரகாஷ் கூறும்போது, “யாருமே இக்கதையைத் தயாரிக்க முன்வராத நிலையில் எனது வீடு நிலத்தை விற்றுத் தயாரித்தேன்.
சர்வதேச பட விழாக்களில் படம் கலந்துகொண்டு பல பரிசுகளை வென்றபோதும் ரொக்கப்பரிசு எதுவும் கிடைக்கவில்லை. படத்தைப் பார்க்க வரும்படி பலமுறை விநியோகஸ்தர்களை அழைத்தேன். வருவதாகக் கூறிவிட்டு வராமல் ஏமாற்றிவிட்டார்கள்.
கடைசியாக இயக்குநர் வெற்றிமாறனிடம் சென்றபோது படத்தைப் பார்த்து பாராட்டியதுடன், இது மிக அவசியமான படம். சமூகத்துக்குப் போய் சேர வேண்டும். பொறுமையாகக் காத்திருங்கள். சரியான நேரத்தில் ரிலீஸ் செய்யலாம் என்றதுடன் இப்படத்தின் ரிலீஸுக்கு உதவியிருக்கிறார்.
இதுகுறித்து இயக்குனர் வெற்றிமாறன் கூறுகையில், காக்கா முட்டை, விசாரணை படத்தைவிட இது மிக முக்கிய படம் லென்ஸ். அதனால்தான் இப்படம் மக்களுக்குப் போய் சேர வேண்டும் என்று விரும்பினேன். இதுவொரு விழிப்பு உணர்வு படமாகவும் நிச்சயம் இருக்கும் என தெரிவித்தார்.