ரோலெக்ஸை மிஞ்சுவாரா வால்டர்? பென்ஸ் மூலம் LCUவில் வில்லனாக எண்ட்ரி கொடுத்த நிவின் பாலி

லோகேஷ் கனகராஜ் தயாரிப்பில் உருவாகி வரும் பென்ஸ் திரைப்படத்தில் வில்லனாக நடிகர் நிவின் பாலி நடிப்பதாக படக்குழு அறிவித்து உள்ளது.

Benz movie Villain Nivin Pauly : லோகேஷ் கனகராஜ் சினிமாட்டிக் யூனிவர்ஸான எல்சியூவில் நான்காவது படமாக உருவாகி வருகிற பென்ஸ். ராகவா லாரன்ஸ் நாயகனாக நடிக்கும் இந்தப் படத்தை பாக்யராஜ் கண்ணன் இயக்குகிறார். லோகேஷ் கனகராஜ் கதை எழுதி இணை தயாரிப்பாளராகவும் இப்படத்தில் பணியாற்றி உள்ளார். இப்படத்திற்கு சாய் அபயங்கர் இசையமைக்கிறார். கௌதம் ஜார்ஜ் ஒளிப்பதிவு செய்யும் இப்படத்திற்கு பிலோமின் ராஜ் படத்தொகுப்பு பணிகளை மேற்கொள்கிறார்.

பென்ஸ் படத்தில் வில்லனாக நடிக்கும் நிவின் பாலி

இந்நிலையில் பென்ஸ் திரைப்படத்தின் மாஸ் அப்டேட் ஒன்று வெளியாகி உள்ளது. அதன்படி இப்படத்தில் வில்லனாக நடிக்கும் நடிகர் பற்றிய அறிவிப்பை ஒரு ஸ்பெஷல் வீடியோ உடன் படக்குழு வெளியிட்டுள்ளது. அதன்படி இப்படத்தில் நிவின் பாலி தான் வில்லனாக நடிக்கிறார் என்பது உறுதியாகி உள்ளது. அவர் வால்டர் என்ற ஸ்டைலிஷ் வில்லன் கதாபாத்திரத்தில் நடிக்கிறார். அவரது வில்லன் கதாபாத்திரத்திற்கான இண்ட்ரோவில் அவரை டெரர் வில்லனாக காட்டி இருக்கிறார்கள்.

அந்த டீசரை பார்த்த ரசிகர்கள், ஒரு சாயலில் நிவின் பாலியை பார்ப்பதற்கு புஷ்பா படத்தில் வரும் அல்லு அர்ஜுனை போல இருப்பதாக கூறி வருகின்றனர். ஒரு சிலரோ பிரேமம் படத்தில் லவ்வர் பாய் ஆக பார்த்த நிவின் பாலியா இது என வியந்து பார்த்து வருகின்றனர். ஏற்கனவே ரோலெக்ஸ் என்கிற வில்லன் கதாபாத்திரம் எல்சியூவில் தனித்துவம் வாய்ந்ததாகவும் மிகப்பெரிய அளவில் வரவேற்பை பெற்றதாகவும் இருந்து வருவதால், அதற்கு டஃப் கொடுக்கும் ஒரு கதாபாத்திரமாக நிவின் பாலியின் வால்டர் இருக்குமா என்பதை பொறுத்திருந்து தான் பார்க்க வேண்டும்.

கைதி, விக்ரம், லியோ படங்களைத் தொடர்ந்து எல்சியுவில் வெளிவரும் நான்காவது படம் இதுவாகும். கைதி 2, விக்ரம் 2, ஸ்டாண்ட் அலோன் படமான ரோலக்ஸ் ஆகியவை எல்சியுவில் அடுத்து வரவுள்ளன. பென்ஸ் திரைப்படத்தில் நாயகனாக நடித்துள்ள லாரன்ஸை, விக்ரம் படத்தில் விஜய் சேதுபதி நடித்த சந்தனம் கதாபாத்திரத்தில் நடிக்க வைக்க திட்டமிட்டிருந்தார் லோகேஷ், ஆனால் அவர் அப்போது வேறு படங்களில் பிசியாக இருந்ததால் நடிக்க முடியாமல் போனது. அப்படத்தை மிஸ் பண்ணினாலும் பென்ஸ் மூலம் எல்.சி.யூவில் இணைந்துள்ளார் லாரன்ஸ்.