தேசிய பாதுகாப்பு நிதிக்காக ஒரு மாத சம்பளத்தை வழங்கிய இசைஞானி இளையராஜா

இந்தியா-பாகிஸ்தான் மோதலால் எல்லைப் பகுதிகளில் பதற்றம் நீடிக்கும் நிலையில், இளையராஜா தனது ஒரு மாத ஊதியத்தை தேசிய பாதுகாப்பு நிதிக்கு வழங்குவதாக அறிவித்துள்ளார்.

இந்தியா - பாகிஸ்தான் இடையே நடந்து வரும் மோதலால் இருநாட்டின் எல்லைப் பகுதிகளிலும் தொடர்ந்து பதற்றம் நிலவி வருகிறது. இரு நாடுகளும் மாறி மாறி தாக்குதலை நடத்தி வருகின்றனர். இரு நாடுகளும் பேச்சுவார்த்தை மூலம் தீர்வு காண வேண்டும் என அமெரிக்கா, சீனா மற்றும் ஐ.நா. வலியுறுத்தி வருகிறது. இந்நிலையில், இளையராஜா தேசிய பாதுகாப்பு நிதிக்கு தனது ஊதியத்தை வழங்குவதாக அறிவித்துள்ளார். 

இது தொடர்பாக இசையமைப்பாளர் இளையராஜா  எக்ஸ் பக்கத்தில்: இப்போது நிஜத்தில் வீரம் கொண்ட ஹீரோக்கள் பஹல்காமில் அப்பாவி சுற்றுலாப் பயணிகள் கொடூரமாகக் கொலை செய்யப்பட்டதற்கு எதிராக  எல்லைகளில் துணிச்சலுடன், பயத்தைக் கடந்து, துல்லியம் உறுதியுடன் செயல்படுகின்றனர். இதை அறியாமலே இந்த ஆண்டின் தொடக்கத்தில், நான் என் முதல் சிம்பொனியை இசையமைத்து அதற்கு வேலியண்ட் Valiant (மிகுந்த தைரியத்தையும் துணிச்சலையும் குறிக்கும் சொல்) என்று பெயரிட்டேன்

நமது தன்னலமற்ற துணிச்சலான வீரர்கள் எதிரிகளை மண்டியிடச் செய்வார்கள் என நம்புகிறேன். ஜெய பேரிகை கொட்டடா! கொட்டடா! ஜெய பேரிகை கொட்டடா! - பாரதியார். இத்தருணத்தில் பெருமைமிக்க இந்தியனாகவும், நாடாளுமன்ற உறுப்பினராகவும் நான்  எனது இசை நிகழ்ச்சி மூலம் கிடைத்த தொகையையும், ஒரு மாத ஊதியத்தையும் தேசிய பாதுகாப்பு நிதிக்கு தருகிறேன். பயங்கரவாதத்தை ஒழிக்கவும், நமது எல்லைகளையும் மக்களையும் பாதுகாப்பை உறுதி செய்யவும் நம் வீரம் மிக்க ராணுவ வீரர்களின் மாபெரும் முயற்சிக்காக ஒரு சிறிய பங்களிப்பாக வழங்க முடிவு செய்துள்ளேன். ஜெய் ஹிந்த்" என குறிப்பிட்டிருக்கிறார்.