தமிழ் ராக்கர்ஸ்-க்கு உதவியதால் சீல் வைக்கப்பட்ட பிரபல திரையரங்கம்…!

famous theatre sealed for helping Tamil rockers

தயாரிப்பாளர்கள் கஷ்டப்பட்டு தயாரிக்கும் திரைப்படங்கள் பல, திரையரங்கில் ரிலீசான அடுத்த நாளே இணையதளத்திலும் ரிலீசாகி விடுகிறது. இதனால் அவர்களுக்கு போட்ட லாபம் கிடைப்பதில்லை. மேலும் பல மடங்கு நஷ்டம் ஏற்படுகிறது. இது போன்று திரைப்படங்களை திருட்டுத்தனமாக வெளியிடும் இணையதளங்களில், மிக பிரபலமானது தமிழ் ராக்கர்ஸ்.

நடிகர் விஷால் தயாரிப்பாளர் சங்க தலைவராக பதவி ஏற்ற உடன் செய்த முதல் சபதம், தமிழ் ராக்கர்ஸை ஒழிப்பது தான். ஆனால் அவர் சொன்னபடி எதுவும் நடைபெறவில்லை. தொடர்ந்து தமிழ் ராக்கர்ஸ் தனது வேலையை திறம்பட செய்து வருகிறது. இந்நிலையில் விஷாலும் தமிழ் ராக்கர்ஸ்க்கு ஆதரவு தருகிறார் போல? என்று சில தயாரிப்பாளர்கள் கோபமாக கேள்வி எழுப்பி இருந்தனர்.

இந்நிலையில் சமீபத்தில் திரைக்கு வந்த “ஒரு குப்பை கதை” திரைப்படம், மறுநாளே தமிழ் ராக்கர்ஸ் இணையதளத்தில் ரிலீசாகியது. இது குறித்து போலீசார் நடத்திய விசாரணையில், மயிலாடுதுறையில் உள்ள கோமதி எனும் திரையரங்கின் மூலம் தான், இந்த திரைப்படத்தின் காட்சிகள் வெளியேறி இருக்கின்றன, என்ற தகவல் கிடைத்திருக்கிறது.

இந்த குற்றத்தில் ஈடுபட்டது அந்த திரையரங்கை சேர்ந்த ஊழியர் ஒருவர்தான் என்பதும் அப்போது தெரியவந்திருக்கிறது. இதனால் அந்த திரையரங்கை மூடி சீல் வைத்ததுடன், அந்த ஊழியரையும் கைது செய்திருக்கின்றனர் போலீசார்.