2025-ல் ஹாட்ரிக் ஹிட்! ரசிகர்களுக்கு நெகிழ்ச்சியுடன் நன்றி சொன்ன தனுஷ் - 2026-ல் காத்திருக்கும் மெகா பிளான்கள்!

2025 ஆம் ஆண்டில் 3 படங்கள் ஹிட்டாக காரணமாக இருந்த ரசிகர்களுக்கு தனுஷ் நன்றி தெரிவித்துள்ளார்.

தனுஷ் நடிப்பில் மட்டும் கடந்த 2025 ஆம் ஆண்டு 3 படங்கள் வெளியாகின. அதில் குபேரா, இட்லி கடை மற்றும் தேரே இஷ்க் மெய்ன் ஆகிய படங்கள். இந்த 3 படங்களுமே தமிழ் சினிமா ரசிகர்களுக்கு ஏமாற்றத்தை கொடுத்தாலும் மற்ற மொழி ரசிகர்களை வெகுவாகவே கவர்ந்தன. இதன் காரணமாக இந்த 3 படங்களுக்குமே ரசிகர்கள் மத்தியில் பாசிட்டிவ் விமர்சனம் கிடைத்ததோடு மட்டுமின்றி பாக்ஸ் ஆபிஸிலும் நல்ல வரவேற்பை பெற்றன.

இந்த 3 படங்களுமே முறையே 138.1 கோடி, ரூ.161.96 கோடி மற்றும் 71.85 கோடி என்று வசூல் குவித்தன. இதன் காரணமாக தனுஷ் தனது ரசிகர்களுக்கு நன்றி தெரிவித்துள்ளார். இது குறித்து அவர் கூறியிருப்பதாவது: 2025 ஆம் ஆண்டு உண்மையில் மறக்க முடியாத வருடம். இந்த 3 படங்களுமே சூப்பர் ஹிட்டாவதை பார்க்க நான் போற்றும் ஆசிர்வாதம். ரசிகர்களது அன்பும், ஆதரவும் தான் ஒருபடத்தை ஹிட் கொடுக்கும். அப்படி எனக்கு ஹிட் கொடுத்த படம் தான் குபேரா, இட்லி கடை மற்றும் தேரே இஷ்க் மெய்ன் என்று கூறியிருக்கிறார்.

இந்தப் படங்களின் வரிசையில் தற்போது தனுஷ் தனது 54ஆவது படமான டி54 படத்தில் நடித்துள்ளார். இந்தப் படத்திற்கு அறுவடை என்று டைட்டில் வைத்துள்ளதாக சொல்லப்படுகிறது. போர் தொழில் படத்தை இயக்கிய இயக்குநர் விக்னேஷ் ராஜா இந்தப் படத்தை இயக்கியுள்ளார். இந்தப் படம் இந்த ஆண்டு திரைக்கு வரும் என்று தெரிகிறது.