பாவனா பலாத்காரம் விவகாரத்தில் நான் பலிகடாவா? - நடிகர் திலீப் ஆவேசப் பதிவு

நடிகை பாவனா காரில் கடத்தப்பட்டு, பாலியல் பலாத்காரம் செய்யப்பட்ட விவகாரத்தில் அனைவரும் என்னை குறிவைத்து பலிகடாவாக்க முயல்கிறார்கள் என்று நடிகர் திலீப் தனது முகநூல் பக்கத்தில் ஆவேசத்துடன் தெரிவித்துள்ளார்.

நடிகை பவானா கடந்த வெள்ளிக்கிழமை கொச்சியில் படப்படிப்பு முடிந்து, திருச்சூருக்கு காரில் திரும்பிக் கொண்டு இருந்தார். அப்போது அவரை வேனில் பின்தொடர்ந்த 4 பேர், அவர் கார் மீது மோதி தடுத்து நிறுத்தினர்.

அதன்பின், காருக்குள் அந்த 4 பேரும் ஏறி ஏறக்குறைய 2 மணிநேரம் காரை ஓட்டிச் சென்று, பாவனாவை மிரட்டி பாலியல் பலாத்காரம் செய்து, அதை வீடியோவாகவும், புகைப்படமாகவும் எடுத்தனர்.

கைது

இது தொடர்பாக பாவனா கொச்சி போலீசில் புகார் செய்ததையடுத்து, நடிகை பாவனாவின் கார் டிரைவர் மார்டின் உள்ளிட்ட 3 பேர் கைது செய்யப்பட்டுள்ளனர். இதில் முக்கிய குற்றவாளியான பல்சர் சுனில், வி.பி.விகீஸ் ஆகியோரை போலீசார் தேடி வருகின்றனர். நடிகை பாவனாவுக்கு ஆதரவாக கேரள திரையுலகம் திரண்டு வந்து போராட்டம் நடத்தினர்.

திலீபுக்கு தொடர்பா?

இதற்கிடையே நடிகர் திலீப்புக்கும், பாவனாவுக்கும் இடையிலான முன்விரோதம் காரணமாக, திலீப் கூலிப்படை மூலம் இந்த செயலை நடத்தியதாக குற்றச்சாட்டுகள் எழுந்தன. ஆனால், அதை அவர் தொடர்ந்து மறுத்து வருகிறார்.

இந்நிலையில், நடிகர் திலீப் தனது முகநூல் பக்கத்தில் இது குறித்து ஆவேசத்துடன் பதிவிட்டுள்ளார். அதில் கூறியிருப்பதாவது-

நடிகை பாவனாவுக்கு எதிரான மோசமான குற்றச்செயலில் எனக்கு நேரடியாகவோ, மறைமுகமகவோ எந்த விதத்திலும் தொடர்பு இல்லை.

இந்த விவகாரத்தில் தொடர்புடைய  குற்றவாளிகளை கைது செய்து நேர்மையான விசாரணை நடத்தி, நீதிமுன் நிறுத்த அதிகாரிகளை நான் கேட்டுக் கொள்கிறேன். அந்த குற்றத்தை செய்தவர்களுக்கு அதிகபட்சமான தண்டனையை வழங்க வேண்டும்.

இந்த விசயத்தில் என்னிடம் போலீசார் எந்தவிதமான விசாரணையையும் மேற்கொள்ளவில்லை, ஆலுவா நகரில் உள்ள என்னுடைய வீட்டுக்கு எந்த போலீசாரும் வரவில்லை.

தொலைபேசியும் என்னை தொடர்பு கொள்ளவில்லை. எந்தவிதமான நடிகர், நடிகையும் என்னுடைய வீட்டுக்குவரவும் இல்லை. இந்த விசயத்தில் அனைவரும் என்மீது குற்றம்சாட்டி, என்னை சிலுவையில் அறைகிறீர்கள்'' எனத் தெரிவித்துள்ளார்.