அடிமட்ட விலைக்கு இறங்கிய ரஷ்ய கச்சா எண்ணெய்.. இந்தியாவுக்கு அடித்த ஜாக்பாட்!

அமெரிக்காவின் புதிய தடைகளால், ரஷ்யாவின் யூரல்ஸ் கச்சா எண்ணெய் விலை வரலாறு காணாத அளவு குறைந்துள்ளது. இந்த திடீர் விலை வீழ்ச்சி, தடைகளால் ரஷ்ய எண்ணெயை வாங்குவதைத் தவிர்த்த இந்திய சுத்திகரிப்பு ஆலைகளை மீண்டும் கொள்முதல் செய்யத் தூண்டியுள்ளது.

அமெரிக்கா விதித்த புதிய தடைகளால், ரஷ்யாவின் முக்கிய கச்சா எண்ணெய் வகையான 'யூரல்ஸ்' (Urals) இந்திய சுத்திகரிப்பு ஆலைகளுக்கு கடந்த இரண்டு ஆண்டுகளில் இல்லாத அளவுக்குக் குறைந்த விலையில் வழங்கப்பட்டு வருகிறது.

இது, சமீபத்திய தடைகளால் முடங்கியிருந்த கச்சா எண்ணெய் வர்த்தகத்தை மீண்டும் தொடங்கத் தூண்டுவதாக உள்ளது.

பேரலுக்கு 7 டாலர் குறைவு

ரஷ்யாவின் முன்னணி எண்ணெய் உற்பத்தியாளர்களான ரோஸ்நெஃப்ட் (Rosneft PJSC) மற்றும் லுகோயில் (Lukoil PJSC) நிறுவனங்கள் மீது அமெரிக்கா பொருளாதாரத் தடைகளை விதித்ததைத் தொடர்ந்து, இந்த விலை வீழ்ச்சி ஏற்பட்டுள்ளது.

தற்போதைய நிலவரப்படி, யூரல்ஸ் கச்சா எண்ணெயின் விலை, உலகளாவிய தரக்குறியீடான 'டேடட் பிரென்ட்' (Dated Brent) விலையை விட ஒரு பேரலுக்கு சுமார் 7 டாலர் வரை குறைத்து வழங்கப்படுகிறது. கப்பலில் வந்து சேரும் (delivered basis) சரக்குகளுக்கான இந்தத் தள்ளுபடி, டிசம்பர் மாதத்தில் ஏற்றி ஜனவரி மாதம் இந்தியாவை வந்தடையும் சரக்குகளுக்குப் பொருந்தும்.

தடை விதிப்பதற்கு முன்பு, யூரல்ஸ் கச்சா எண்ணெய் மீதான தள்ளுபடி சுமார் 3 டாலராக மட்டுமே இருந்தது குறிப்பிடத்தக்கது.

அபரிமதிமான சலுகை

2022-ஆம் ஆண்டு உக்ரைன் மீதான படையெடுப்புக்குப் பிறகு, ரஷ்யாவிடமிருந்து மலிவான கச்சா எண்ணெயைத் தொடர்ந்து இறக்குமதி செய்து இந்தியா பெரும் பொருளாதார ஆதாயம் பெற்றது. இருப்பினும், கடந்த வாரம் ரோஸ்நெஃப்ட் மற்றும் லுகோயில் நிறுவனங்கள் மீதான அமெரிக்கத் தடைகள் நடைமுறைக்கு வந்த பிறகு, பெரும்பாலான இந்திய சுத்திகரிப்பு ஆலைகள் புதிய ஆர்டர்களைப் போடுவதைத் தவிர்த்தன. இதன் விளைவாக, ரஷ்ய எண்ணெய் ஏற்றுமதியில் தொய்வு ஏற்பட்டது.

எனினும், தற்போது அறிவிக்கப்பட்டுள்ள அபரிமிதமான விலை சலுகை காரணமாக, இந்திய சுத்திகரிப்பு ஆலைகளின் நிலைப்பாடு மாறியுள்ளது. சில நிறுவனங்கள், தடைகளுக்கு உட்படாத (non-sanctioned) விற்பனையாளர்களிடமிருந்து ரஷ்ய எண்ணெயைக் கொள்முதல் செய்யத் தயாராக இருப்பதாகத் தகவல்கள் தெரிவிக்கின்றன.

குறிப்பு: தற்போது வழங்கப்படும் சரக்குகளில், சுமார் ஐந்தில் ஒரு பகுதி மட்டுமே தடைகளுக்கு உட்படாத நிறுவனங்களிடமிருந்து கிடைப்பதாக, இந்த விவகாரம் குறித்து அறிந்த வட்டாரங்கள் தெரிவிக்கின்றன.

மாற்றுத் தேடலில் இந்தியா

ரோஸ்நெஃப்ட் மற்றும் லுகோயில் மீது தடைகள் விதிக்கப்படுவதற்கு முன்பு, இந்தியா தனது கச்சா எண்ணெய் தேவைகளைப் பூர்த்தி செய்ய மத்திய கிழக்கு உட்பட பிற பிராந்தியங்களிடமிருந்து அதிக எண்ணெயை வாங்கத் தொடங்கியிருந்தது.

ரஷ்யாவின் மேற்கு துறைமுகங்களிலிருந்து அனுப்பப்படும் யூரல்ஸ் கச்சா எண்ணெய் மீதான விலை வீழ்ச்சியானது, இந்தியாவின் எண்ணெய் கொள்முதல் முடிவுகளில் மீண்டும் ஒரு திருப்புமுனையை ஏற்படுத்தும் என்று எதிர்பார்க்கப்படுகிறது.