முதல் முறையாக அமெரிக்காவுடன் LPG ஒப்பந்தம்! வருடாந்திர இறக்குமதியில் 10 சதவீதம்!

நாட்டின் எரிசக்தி பாதுகாப்பை வலுப்படுத்த, இந்தியா முதல் முறையாக அமெரிக்காவுடன் நீண்டகால எல்பிஜி இறக்குமதி ஒப்பந்தத்தில் கையெழுத்திட்டுள்ளது. இந்த ஓராண்டு ஒப்பந்தத்தின் மூலம் 2.2 மில்லியன் டன் எரிவாயு இறக்குமதி செய்யப்பட உள்ளது.

நாட்டின் எரிசக்தி பாதுகாப்பை வலுப்படுத்தும் வகையில அமெரிக்காவிலிருந்து எரிவாயு (LPG) இறக்குமதி செய்வதற்கான நீண்டகால ஒப்பந்தத்தில் முதல் முறையாக இந்தியா கையெழுத்திட்டுள்ளது.

மத்திய பெட்ரோலியம் மற்றும் இயற்கை எரிவாயுத் துறை அமைச்சர் ஹர்தீப் சிங் பூரி திங்களன்று இந்த வரலாற்றுச் சிறப்புமிக்க அறிவிப்பை வெளியிட்டுள்ளார். அரசுக்குச் சொந்தமான எண்ணெய் நிறுவனங்கள், சுமார் 2.2 மில்லியன் டன் எல்.பி.ஜி. இறக்குமதி செய்வதற்கான ஓராண்டு கால ஒப்பந்தத்தை இறுதி செய்துள்ளன.

இந்த அளவு இந்தியாவின் வருடாந்திர எல்.பி.ஜி. இறக்குமதியில் கிட்டத்தட்ட 10% ஆகும். இது நாட்டின் விநியோக மூலோபாயத்தில் ஒரு பெரிய மாற்றத்தைக் குறிக்கிறது.

பொதுத்துறை நிறுவனங்களின் இறக்குமதி

அமெரிக்காவுடன் இந்தியா கையெழுத்திட்ட முதல் கட்டமைக்கப்பட்ட எல்.பி.ஜி. கொள்முதல் ஒப்பந்தம் இதுவாகும். இந்த ஒப்பந்தம், அமெரிக்காவில் எல்.பி.ஜி.-க்கான முக்கிய விலை நிர்ணய மையமான மான்ட் பெல்வியூ (Mont Belvieu) குறியீட்டின் அடிப்படையில் அளவிடப்படுகிறது.

இந்தியன் ஆயில் கார்ப்பரேஷன் (IOC), பாரத் பெட்ரோலியம் கார்ப்பரேஷன் லிமிடெட் (BPCL), மற்றும் இந்துஸ்தான் பெட்ரோலியம் கார்ப்பரேஷன் லிமிடெட் (HPCL) ஆகியவற்றின் அதிகாரிகள் அடங்கிய கூட்டுக்குழு, கடந்த சில மாதங்களாக அமெரிக்காவின் முக்கிய உற்பத்தியாளர்களுடன் பேச்சுவார்த்தை நடத்தி இந்த ஒப்பந்தத்தை இறுதி செய்தது.

அமைச்சர் பூரி கூறுகையில், "உலகின் வேகமாக வளர்ந்து வரும் எல்.பி.ஜி. சந்தைகளில் ஒன்றான இந்தியா, இப்போது முறையாக அமெரிக்க விநியோகங்களுக்கு வழி திறந்து கொடுத்துள்ளது. இந்திய மக்களுக்குப் பாதுகாப்பான மற்றும் மலிவு விலையில் LPG வழங்குவதற்கான எங்கள் முயற்சியில், நாங்கள் எங்கள் மூல ஆதாரங்களைப் பல்வகைப்படுத்தி வருகிறோம். இந்த ஒப்பந்தம் அந்த திசையில் ஒரு குறிப்பிடத்தக்க படியாகும்" என்றார்.

அதிகரிக்கும் எரிவாயு பயன்பாடு

எல்.பி.ஜி. நுகர்வில் இந்தியா உலகின் இரண்டாவது பெரிய நாடாக உள்ளது. உஜ்வாலா யோஜனாவின் (Pradhan Mantri Ujjwala Yojana) தொடர்ச்சியான விரிவாக்கத்தாலும், அதிக குடும்பங்கள் எரிவாயு இணைப்பைப் பெறுவதாலும் தேவை அதிகரித்து வருகிறது.

இந்தியா தனது எல்.பி.ஜி. தேவையில் 50% க்கும் அதிகமாக இறக்குமதி செய்கிறது, இதில் பெரும்பாலான விநியோகம் மேற்கு ஆசிய சந்தைகளிலிருந்து வருகிறது. அமெரிக்காவிலிருந்து கணிசமான பகுதியை ஆதாரமாகக் கொள்வது, பாரம்பரிய விநியோகஸ்தர்கள் மீதான சார்பைக் குறைக்கவும், விநியோக ஸ்திரத்தன்மையை மேம்படுத்தவும் உதவுகிறது.

கடந்த ஆண்டு உலகளாவிய எல்.பி.ஜி. விலை 60% க்கும் அதிகமாக உயர்ந்தபோது, அரசு ரூ.40,000 கோடிக்கும் அதிகமாகச் செலவழித்து, உஜ்வாலா திட்டப் பயனாளிகளுக்கு சிலிண்டர் விலையை ரூ.500-550 ஆகவே வைத்தது. இந்தப் புதிய ஒப்பந்தம், பாதுகாப்பான எல்.பி.ஜி.யை மலிவு விலையில் விநியோகிப்பதை உறுதி செய்வதற்கான மற்றொரு நடவடிக்கையாக அமைந்துள்ளது.

இந்த ஒப்பந்தம், இந்தியா-அமெரிக்கா இடையேயான எரிசக்தி ஒத்துழைப்பை மேலும் ஆழப்படுத்தும் என்றும், எதிர்காலத்தில் நீண்டகால விநியோக ஒப்பந்தங்களுக்கு வழிவகுக்கும் என்றும் எதிர்பார்க்கப்படுகிறது.