கட்டுப்பாடுகளின்றி 5ஆம் தலைமுறை போர் விமான தொழில்நுட்பம்; இந்தியாவுக்கு ரஷ்யாவின் மெகா ஆஃபர்

ரஷ்ய அதிபர் விளாடிமிர் புதினின் இந்தியப் பயணத்திற்கு முன்னதாக, ஐந்தாம் தலைமுறை Su-57 ஸ்டெல்த் போர் விமான தொழில்நுட்பத்தை முழுமையாகப் பயன்படுத்த ரஷ்யா இந்தியாவிற்கு வாய்ப்பளித்துள்ளது.

இந்திய விமானப்படையின் எதிர்காலத்திற்கு முக்கியத்துவம் வாய்ந்த ஒரு ராணுவ முன்மொழிவை மாஸ்கோ வைத்துள்ளது. அடுத்த மாதம் ரஷ்ய அதிபர் விளாடிமிர் புதின் இந்தியாவிற்கு வரவிருக்கும் நிலையில், நாட்டின் எதிர்காலப் போர் விமானத் தேவைகளைப் பூர்த்தி செய்வதற்காக, புதிய ஐந்தாம் தலைமுறை Su-57 ஸ்டெல்த் போர் விமானத்தின் தொழில்நுட்பத்தை எந்தவித கட்டுப்பாடுகளும் இன்றி வழங்க ரஷ்யா தயாராக இருப்பதாகத் தெரிவித்துள்ளது. இந்த அளவிலான பாதுகாப்புத் தொழில்நுட்பத்தை இதற்கு முன் வேறு எந்த நாடும் இந்தியாவிற்கு வழங்க முன்வந்ததில்லை. இந்த முன்மொழிவை இந்தியா ஏற்றுக்கொண்டால், மேற்கத்திய நாடுகள் பகிர்ந்துகொள்ள மறுத்த திறன்களைப் பெறுவதோடு, மேம்படுத்தப்பட்ட ஸ்டெல்த் போர் விமானங்களை உள்நாட்டிலேயே தயாரிக்க இந்தியாவால் முடியும்.

ரஷ்ய அரசுக்குச் சொந்தமான பாதுகாப்பு கூட்டமைப்பான ரோஸ்டெக்கின் (Rostec) தலைமைச் செயல் அதிகாரி செர்ஜி செமசோவ், துபாய் ஏர் ஷோ 2025-ல் இந்த முன்மொழிவை வெளிப்படுத்தினார். தொடக்கத்தில் ரஷ்யாவில் தயாரிக்கப்பட்ட Su-57 விமானங்களை இந்தியாவிற்கு வழங்கி, பின்னர் படிப்படியாக உற்பத்தியை இந்தியாவிற்கு மாற்றுவதே இதன் நோக்கம். என்ஜின்கள், சென்சார்கள், ஸ்டெல்த் பொருட்கள் உட்பட ஐந்தாம் தலைமுறை விமானத் தயாரிப்பின் முழு தொழில்நுட்பத்தையும் இந்தியாவிற்குத் திறந்துவிட மாஸ்கோ தயாராக இருப்பதாக செமசோவ் கூறினார். பல ஆண்டுகால இந்திய-ரஷ்ய நட்புறவை சுட்டிக்காட்டிய செமசோவ், தொழில்நுட்பம் தொடர்பான இந்தியாவின் எந்தவொரு தேவையையும் தாங்கள் முழுமையாக ஏற்றுக்கொள்வோம் என்றும் தெளிவுபடுத்தினார்.

மாபெரும் சலுகை

தொழில்நுட்பப் பரிமாற்றம் மற்றும் தொழில்நுட்பக் கற்றலுக்கு மாஸ்கோ தயாராக இருப்பதாக ரஷ்யாவின் ஆயுத ஏற்றுமதி நிறுவனமான ரோசோபோரோன் எக்ஸ்போர்ட்டின் மூத்த பிரதிநிதியும் உறுதிப்படுத்தியுள்ளார். என்ஜின்கள், ஆப்டிக்ஸ், ஏஇஎஸ்ஏ ரேடார், செயற்கை நுண்ணறிவு கூறுகள் மற்றும் குறைந்த சிக்னேச்சர் தொழில்நுட்பங்கள் இதில் அடங்கும். இது தவிர, ரஷ்யாவின் ஒற்றை என்ஜின் ஸ்டெல்த் போர் விமானமான Su-75 செக்மேட் விமானத்தையும் இந்தியாவிற்கு வழங்கக்கூடும் என்று தகவல்கள் தெரிவிக்கின்றன. Su-75 செக்மேட் தயாரிப்பை இந்தியாவில் நிறுவுவது, உள்நாட்டில் தயாரிக்கப்படும் ஏஎம்சிஏ (AMCA) போன்ற இரட்டை என்ஜின் போர் விமானங்களுக்கு மாற்றாக இருக்காது, மாறாக அதற்கு உதவியாக இருக்கும் என்றும் பாதுகாப்பு வல்லுநர்கள் கருத்து தெரிவித்துள்ளனர்.

புதினின் வருகை

23-வது இந்திய-ரஷ்ய வருடாந்திர உச்சி மாநாட்டில் பங்கேற்பதற்காக ரஷ்ய அதிபர் புதின் டிசம்பரில் இந்தியாவிற்கு வருகிறார். பாதுகாப்புத் துறையில் முக்கிய அறிவிப்புகளுக்கு இந்த உச்சி மாநாடு ஒரு களமாக அமையும் என எதிர்பார்க்கப்படுகிறது. இதன் முன்னோட்டமாக, இந்த வார தொடக்கத்தில், புதினின் உயர் உதவியாளரும், கடல்சார் வாரியத் தலைவருமான நிக்கோலாய் பட்ருஷேவ், பிரதமர் நரேந்திர மோடியை புதுதில்லியில் சந்தித்துப் பேசினார். இந்த சந்திப்பில், உச்சி மாநாட்டிற்கான தயாரிப்புகள் மற்றும் பாதுகாப்பு ஒத்துழைப்பை அதிகரிப்பதில் உள்ள பொதுவான ஆர்வங்கள் குறித்து இரு தரப்பினரும் விவாதித்தனர்.