வம்பு இழுக்கும் நேபாளம்.. ரூ.100 நோட்டில் இந்தியப் பகுதியைக் காட்டும் மேப்!

நேபாளம் இந்தியா உரிமை கோரும் காலாபாணி, லிபுலேக், லிம்பியாதுரா பகுதிகளை உள்ளடக்கிய புதிய 100 ரூபாய் நோட்டை வெளியிட்டுள்ளது. 2020-இல் திருத்தப்பட்ட இந்த வரைபடத்தை கரன்சியில் சேர்த்திருப்பது, எல்லைப் பிரச்சனையை மீண்டும் தீவிரப்படுத்தியுள்ளது.

நேபாளத்தின் மத்திய வங்கியான நேபாள ராஷ்டிர வங்கி (NRB), 100 ரூபாய் மதிப்புள்ள புதிய கரன்சி நோட்டுகளை வியாழக்கிழமை வெளியிட்டுள்ளது. இதில், இந்தியா தனக்குச் சொந்தமானது என்று வலியுறுத்தி வரும் காலாபாணி, லிபுலேக் மற்றும் லிம்பியாதுரா ஆகிய பகுதிகளை உள்ளடக்கிய திருத்தப்பட்ட நேபாள வரைபடம் இடம்பெற்றுள்ளது.

இந்த நடவடிக்கை, இந்தியாவுக்கும் நேபாளத்துக்கும் இடையே பல ஆண்டுகளாக நிலவி வரும் எல்லைப் பிரச்சனையை மீண்டும் தீவிரப்படுத்தியுள்ளது.

நேபாள வரைபடம் குறித்த சர்ச்சை

புதிய 100 ரூபாய் நோட்டின் மையத்தில், மங்கலான பச்சை நிறத்தில் நேபாளத்தின் திருத்தப்பட்ட வரைபடம் அச்சிடப்பட்டுள்ளது. முன்னதாக, மே 2020-இல் கே.பி. சர்மா ஒலி தலைமையிலான நேபாள அரசு, இந்த மூன்று பகுதிகளையும் உள்ளடக்கி நாட்டின் புதிய அரசியல் வரைபடத்தை வெளியிட்டது.

இது நாடாளுமன்றத்தின் ஒப்புதலையும் பெற்றது. இப்போது, அரசின் முடிவின்படி பழைய 100 ரூபாய் நோட்டில் இருந்த வரைபடம் திருத்தப்பட்டுள்ளது என்று நேபாள ராஷ்டிர வங்கியின் செய்தித் தொடர்பாளர் இன்று தெரிவித்துள்ளார்.

லிபுலேக், காலாபாணி மற்றும் லிம்பியாதுரா ஆகிய பகுதிகள் இந்தியாவுக்குச் சொந்தமானவை என்று இந்தியா உறுதியாகக் கூறி வருகிறது. 2020-இல் நேபாளம் வரைபடத்தை மாற்றியபோது, இது "தன்னிச்சையான செயல்" என்று இந்தியா கடுமையாக எதிர்வினையாற்றியதுடன், இத்தகைய செயற்கையான பிரதேச விரிவாக்கம் ஏற்கப்படாது என்றும் எச்சரித்தது.

புதிய நோட்டின் வடிவமைப்பு

புதிய நோட்டில் முந்தைய ஆளுநர் மகா பிரசாத ஆதிகாரியின் கையொப்பம் இடம்பெற்றுள்ளது. நோட்டின் வெளியீட்டுத் தேதி 2081 பி.எஸ். (BS) எனக் குறிப்பிடப்பட்டுள்ளது, இது 2024 ஆம் ஆண்டைக் குறிக்கிறது. நோட்டின் இடது பக்கத்தில் எவரெஸ்ட் சிகரத்தின் படமும், வலதுபுறம் நேபாளத்தின் தேசிய மலரான ரோடோடென்ட்ரான் (Rhododendron) வாட்டர்மார்க் செய்யப்பட்டுள்ளது.

வரைபடத்திற்கு அருகில் அசோகத் தூண் சின்னம் மற்றும் "புத்தர் பிறந்த இடம், லும்பினி" என்ற வாசகம் அச்சிடப்பட்டுள்ளது. நோட்டின் பின்பக்கத்தில் ஒற்றைக் கொம்புக் காண்டாமிருகத்தின் படம் உள்ளது. மேலும், கண் பார்வையற்றோர் எளிதில் கண்டறியும் வகையில், நோட்டில் ஒரு பாதுகாப்பு இழை மற்றும் புடைப்பான கருப்புப் புள்ளியும் உள்ளது.

நேபாள கரன்சி

நேபாளத்தில் ரூ.10, ரூ.50, ரூ.500, ரூ.1,000 போன்ற பல்வேறு மதிப்புள்ள பணத்தாள்கள் புழக்கத்தில் உள்ளன. இவற்றில் 100 ரூபாய் நோட்டில் மட்டும்தான் நாட்டின் வரைபடம் இடம்பெறுவதாக மத்திய வங்கி தெளிவுபடுத்தியுள்ளது.

நேபாளம், இந்திய மாநிலங்களான சிக்கிம், மேற்கு வங்கம், பீகார், உத்தரப் பிரதேசம் மற்றும் உத்தரகண்ட் ஆகிய ஐந்து மாநிலங்களுடன் 1850 கி.மீ.க்கும் அதிகமான எல்லையைப் பகிர்ந்து கொள்கிறது என்பது குறிப்பிடத்தக்கது.