டிரம்ப் கொடுத்த கிரீன் சிக்னல்... கத்தாரில் புகுந்து ஹமாஸ் தலைக்கு குறி வைத்த இஸ்ரேல்!

இஸ்ரேலியப் படைகள் கத்தாரின் தலைநகரான தோஹாவில் உள்ள ஹமாஸ் தலைவர்களைக் குறிவைத்துத் தாக்குதல் நடத்தியுள்ளன. அமெரிக்காவின் புதிய போர் நிறுத்த முன்மொழிவு குறித்து ஹமாஸ் தலைவர்கள் பேச்சுவார்த்தை நடத்திக்கொண்டிருந்தபோது இந்தத் தாக்குதல் நடந்துள்ளது.

இஸ்ரேலியப் படைகள் கத்தாரின் தலைநகரான தோஹாவில் உள்ள ஹமாஸ் தலைவர்களைக் குறிவைத்துத் தாக்குதல் நடத்தியுள்ளதாக இஸ்ரேலிய அதிகாரிகள் அறிவித்துள்ளனர். அமெரிக்காவின் புதிய போர் நிறுத்த முன்மொழிவு குறித்து ஹமாஸ் தலைவர்கள் பேச்சுவார்த்தை நடத்திக்கொண்டிருந்தபோது இந்தத் தாக்குதல் நடந்துள்ளதாகத் தகவல்கள் தெரிவிக்கின்றன.

இஸ்ரேலின் உள்நாட்டுப் பாதுகாப்பு அமைப்பான ஷின் பெட்டுடன் இணைந்து இந்த நடவடிக்கை மேற்கொள்ளப்பட்டது. கத்தார் ஊடகங்களின்படி, இந்தத் தாக்குதலில் ஹமாஸ் தலைவர்களின் மூன்று மெய்க்காப்பாளர்கள் மற்றும் இரண்டு கத்தார் பாதுகாப்புப் பணியாளர்கள் உட்பட குறைந்தது ஐந்து பேர் கொல்லப்பட்டுள்ளனர். எனினும், அல் ஜசீரா செய்தி நிறுவனத்திடம் பேசிய ஹமாஸ் அதிகாரி ஒருவர், தாக்குதலில் குறிவைக்கப்பட்ட ஹமாஸ் தலைவர்கள் உயிர் பிழைத்துவிட்டதாகக் கூறியுள்ளார்.

தாக்குதலுக்குப் பொறுப்பேற்ற இஸ்ரேல்

அமெரிக்க அதிபர் டொனால்ட் டிரம்ப் இந்தத் தாக்குதலுக்கு ஒப்புதல் அளித்ததாக முன்னதாக செய்திகள் வெளியானது. ஆனால், இஸ்ரேல் பிரதமர் அலுவலகம் இது ஒரு "முற்றிலும் சுதந்திரமான இஸ்ரேலிய நடவடிக்கை" என்று தெளிவுபடுத்தியுள்ளது. மேலும், "இஸ்ரேல் இதனைத் தொடங்கி, நடத்தி, முழுப் பொறுப்பையும் ஏற்கிறது" என்று தெரிவித்துள்ளது.

இஸ்ரேலிய பாதுகாப்புப் படை (IDF) தனது எக்ஸ் பக்கத்தில் இதுபற்றி பதிவிட்டுள்ளது. அதில், அக்டோபர் 7-ம் தேதி தாக்குதலுக்குக் காரணமான ஹமாஸ் பயங்கரவாத அமைப்பின் மூத்த தலைவர்களைக் குறிவைத்து இந்தத் தாக்குதல் நடத்தப்பட்டதாகக் கூறியுள்ளது. பொதுமக்கள் பாதிப்பைக் குறைப்பதற்காக, துல்லியமான ஆயுதங்கள் மற்றும் கூடுதல் உளவுத்துறை தகவல்கள் பயன்படுத்தப்பட்டதாகவும், ஹமாஸுக்கு எதிராகத் தொடர்ந்து உறுதியுடன் செயல்படுவோம் என்றும் இஸ்ரேல் ராணுவம் தெரிவித்துள்ளது.

கத்தாருக்கான இஸ்ரேலின் இந்தத் தாக்குதல், போர் நிறுத்த முயற்சிகளைப் பலவீனப்படுத்துவதற்கான மற்றொரு முயற்சி என்று அல் ஜசீரா செய்தி நிறுவனம் கூறியுள்ளது. காசாவில் கிட்டத்தட்ட இரண்டு ஆண்டுகளாக நடைபெற்று வரும் போரில், கத்தார் மற்றும் எகிப்து ஆகிய நாடுகள் அமைதிப் பேச்சுவார்த்தையில் மத்தியஸ்தர்களாகச் செயல்பட்டு வருகின்றன.

கத்தார் அரசின் கண்டனம்

இஸ்ரேலின் இந்தத் தாக்குதலை கத்தார் வன்மையாகக் கண்டித்துள்ளது. இது கோழைத்தனமான செயல் என்றும், சர்வதேச சட்டங்களின் கடுமையான மீறல் என்றும் கத்தார் வெளியுறவு அமைச்சகத்தின் செய்தித் தொடர்பாளர் மஜீத் அல்-அன்சாரி கூறியுள்ளார். இந்தத் தாக்குதல், ஹமாஸ் அரசியல் பிரிவின் உறுப்பினர்கள் வசிக்கும் குடியிருப்புப் பகுதிகளைக் குறிவைத்து நடத்தப்பட்டதாக அவர் தெரிவித்தார்.