இந்தியா-குவைத் நட்புறவு: 250 ஆண்டு பாரம்பரியத்தைப் பிரதிபலிக்கும் சிறப்புக் கண்காட்சி

இந்தியா-குவைத் இடையிலான 250 ஆண்டுகள் பழமையான நட்புறவை நினைவுகூரும் வகையில், "ரிஹ்ல-இ-தோஸ்தி" என்ற சிறப்பு கண்காட்சி குவைத் தேசிய நூலகத்தில் தொடங்கப்பட்டுள்ளது. வரலாற்று ஆவணங்கள், புகைப்படங்கள், உள்ளிட்ட பல பொருட்கள் காட்சிப்படுத்தப்பட்டுள்ளன.

இந்தியா மற்றும் குவைத் நாடுகளுக்கு இடையேயான 250 ஆண்டுகால பழமையான நட்புறவை நினைவுகூரும் வகையில், "ரிஹ்ல-இ-தோஸ்தி" (Rihla-e-Dosti) என்ற தலைப்பிலான ஒரு சிறப்பு கலாசாரக் கண்காட்சி குவைத் தேசிய நூலகத்தில் கோலாகலமாகத் தொடங்கப்பட்டுள்ளது. இந்தக் கண்காட்சி, இரு நாடுகளுக்கும் இடையிலான ஆழமான வரலாற்றுப் பிணைப்பையும், பரஸ்பர ஒத்துழைப்பையும் எடுத்துக்காட்டுகிறது.

இந்தக் கண்காட்சி இந்தியத் தூதரகத்தின் தலைமையில், குவைத் தேசிய கலாச்சாரக் கவுன்சில், குவைத் ஹெரிடேஜ் சங்கம், இந்திய தேசிய ஆவணக்காப்பகம் உள்ளிட்ட பல முன்னணி அமைப்புகளுடன் இணைந்து நடத்தப்படுகிறது.

வரலாற்று ஆவணங்கள்

கண்காட்சியில், இந்தியா மற்றும் குவைத் இடையேயான நீண்டகால நட்பு மற்றும் வர்த்தக உறவுகளைப் பிரதிபலிக்கும் பல்வேறு வரலாற்று ஆவணங்கள் மற்றும் அரிய பொருட்கள் இடம்பெற்றுள்ளன.

இவற்றில், இரு நாடுகளின் அரசியல் மற்றும் வர்த்தக உறவுகளுக்கான அசல் ஆவணங்கள், தலைவர்கள் நடத்திய முக்கிய சந்திப்புகளின் அரிய புகைப்படங்கள், பழமையான கையெழுத்துப் பிரதிகள் மற்றும் தனிப்பட்ட கடிதங்கள், பழங்கால நாணயங்கள் மற்றும் அரிய பொருட்கள், இந்தியாவின் துறைமுகங்களின் வர்த்தக வரலாறு குறித்த விரிவான ஆவணங்கள், மற்றும் அரபி, இந்திய பிராந்திய மொழிகளில் பதிப்பிக்கப்பட்ட அரிய நூல்கள் போன்றவை அடங்கும். இந்தக் கண்காட்சி, இரு நாடுகளின் பொதுவான பாரம்பரியத்தையும், கலாசாரப் பரிமாற்றங்களையும் ஒருங்கே காட்சிப்படுத்தி, பார்வையாளர்களைக் கவர்ந்துள்ளது.

கலாசார நிகழ்வுகள் மற்றும் விவாதங்கள்

மேலும், கண்காட்சியின் ஒரு பகுதியாக, பல கலாசார நிகழ்வுகள் மற்றும் பேனல் விவாதங்களும் ஏற்பாடு செய்யப்பட்டுள்ளன. இவை இந்தியா-குவைத் நட்புறவின் பல்வேறு பரிமாணங்களை ஆராய்வதோடு, எதிர்கால ஒத்துழைப்புக்கான புதிய வழிகளையும் திறக்கும் என எதிர்பார்க்கப்படுகிறது. இந்தப் பயணம், இரு நாடுகளுக்கும் இடையேயான வளமான வரலாற்றுப் பயணத்தை ஆவணப்படுத்துவதோடு, ஒரு வலுவான எதிர்காலத்திற்கான அடித்தளத்தையும் அமைப்பதாக அமைந்திருக்கிறது.