வக்கிர மனங்களால் உக்கிரமாகுமோ யுத்தம்: கவிஞர் வைரமுத்து வேதனை

உலக அமைதியை வலியுறுத்தி, அணு ஆயுதப் போரின் அபாயத்தை கவிஞர் வைரமுத்து தனது சமூக வலைத்தளத்தில் எடுத்துரைத்துள்ளார். ஈரான்-இஸ்ரேல்-அமெரிக்க மோதலைக் குறிப்பிட்டு, போரின் அழிவுகரமான விளைவுகளைப் பற்றி எச்சரிக்கை விடுத்துள்ளார்.

உலகெங்கும் அதிகரித்து வரும் போர் பதட்டங்களுக்கு மத்தியில், பிரபல கவிஞர் வைரமுத்து தனது சமூக வலைத்தள பக்கமான எக்ஸ் இல் உலக அமைதியை வலியுறுத்திப் பதிவிட்டுள்ளார். அணு ஆயுதப் போர் குறித்த அச்சத்தையும், போரின் அழிவுகரமான விளைவுகளையும் அவர் தனது கவிதை பதிவில் சுட்டிக்காட்டியுள்ளார்.

இது தொடர்பாக அவர் வெளியிட்டுள்ள பதிவில், "உலகின் தலையில் மெல்லிய இழையில் ஆடிக்கொண்டிருக்கிறது அணுகுண்டு. 'வக்கிர மனங்களால் உக்கிரமாகுமோ யுத்தம்' கலங்குகிறது உலகு. ஈரானின் அணுசக்தித் தளங்களில் டொமாஹக் ஏவுகணைகள் வீசி அவசரப்பட்டுவிட்டது அமெரிக்கா. வல்லரசுகள் நல்லரசுகள் ஆகாவிடில் புல்லரசு ஆகிவிடும் பூமி" என்று குறிப்பிட்டுள்ளார்.

மேலும், போரினால் ஏற்படும் விளைவுகளை வலியுறுத்திய கவிஞர், "தான் கட்டமைத்த நாகரிகத்தைத் தானே அழிப்பதன்றி இதுவரை போர்கள் என்ன செய்தன? போரிடும் உலகத்தை வேரொடு சாய்ப்போம். அணுகுண்டு முட்டையிடும் அலுமினியப் பறவைகள் அதனதன் கூடுகளுக்குத் திரும்பட்டும்" என்று அழைப்பு விடுத்தார்.

ஈரான்-இஸ்ரேல்-அமெரிக்கா மோதல்:

கடந்த ஜூன் 13 ஆம் தேதி, இஸ்ரேல் 'ஆபரேஷன் ரைசிங் லயன்' என்ற பெயரில் ஈரான் மீது தாக்குதல் நடத்தியது. இது ஈரானின் அணு ஆயுதப் பயன்பாட்டிற்கு எதிரான தாக்குதல் என்று இஸ்ரேல் அப்போது தெரிவித்தது. இதற்கு பதிலடியாக ஈரானும் தாக்குதலில் ஈடுபட்டது. இந்த சூழ்நிலையில், ஈரானுக்கு எதிராக அமெரிக்காவும் போரில் இறங்கியது. ஈரானின் பர்தவ், நடான்ஸ் மற்றும் எஸ்பஹான் ஆகிய மூன்று அணு உலைகள் மீது தாக்குதல் நடத்தப்பட்டதாக தகவல்கள் வெளியாகியுள்ளன. இதனால் மத்திய கிழக்கில் போர் பதற்றம் மேலும் அதிகரித்துள்ளது.

இந்த சூழ்நிலையில், கவிஞர் வைரமுத்துவின் இந்த பதிவு, போர் மேகங்கள் சூழ்ந்துள்ள உலகில் அமைதியையும், நல்லிணக்கத்தையும் நிலைநாட்ட வேண்டியதன் அவசியத்தை உணர்த்துகிறது. வல்லரசுகள் பொறுப்புடன் செயல்பட வேண்டும் என்பதையும், போர் என்பது அழிவையே தரும் என்பதையும் அவர் தனது கவிதை வரிகளில் ஆழமாகப் பதிவு செய்துள்ளார்.