என்னது நான் அடுத்த தளபதியா? அமரன் பட விழாவில் நச் பதில் கொடுத்த சிவகார்த்திகேயன் - வைரல் வீடியோ!

தமிழ் சினிமாவில் இப்போது முன்னணி நடிகராக விஸ்வரூபம் எடுத்துள்ளவர் தான் சிவகார்த்திகேயன். அதுவும் "கோட்" திரைப்படத்தில் தளபதி விஜயோடு இணைந்து அவர் நடித்த காட்சிகள் மிகப்பெரிய வரவேற்பை பெற்றுள்ளது என்றால் அது மிகையல்ல. தொடர்ச்சியாக நல்ல பல திரைப்படங்களை கொடுத்து வரும் சிவகார்த்திகேயன் ஏற்கனவே "ரங்கூன்" என்கின்ற வெற்றி திரைப்படத்தை இயக்கிய ராஜ்குமார் பெரியசாமி இயக்கத்தில் நடித்துள்ள திரைப்படம் தான் "அமரன்". 

இந்த திரைப்படத்தை உலக நாயகன் கமல்ஹாசனின் "ராஜ் கமல்" நிறுவனம் தயாரித்து வழங்கி உள்ளது. வருகின்ற அக்டோபர் மாதம் 31ம் தேதி உலக அளவில் இந்த திரைப்படம் வெளியாகவுள்ள நிலையில், தற்போது படக்குழு தீவிரமாக இப்படத்தின் பிரமோஷன் பணிகளில் ஈடுபட்டுள்ளனர். குறிப்பாக சில தினங்களுக்கு முன்பு மலேசியா நாட்டில் "அமரன்" திரைப்படத்திற்கான பிரமோஷன் பணிகள் நடந்தது முடிந்தது.  

அப்போது ரசிகர்களுடன் சிவகார்த்திகேயன் உரையாடிக் கொண்டிருந்த பொழுது, அடுத்த தளபதி நீங்கள் தான் என்று கூட்டத்திலிருந்து ரசிகர்கள் கூச்சலிட்டதை கேட்டவுடனேயே, "நிச்சயம் அப்படி கிடையாது.. தமிழ் சினிமாவை பொறுத்தவரை ஒரே ஒரு தளபதி தான், ஒரே ஒரு தல தான், ஒரே ஒரு உலகநாயகன் தான், ஒரே ஒரு சூப்பர் ஸ்டார் தான். அவர்களுடைய நடிப்பை பார்த்து சினிமா கற்றுக் கொண்டவன் நான். அவர்களைப் போல கடினமாக உழைத்து, அவர்களைப் போல நல்ல திரைப்படங்களை கொடுக்க ஆசைப்படலாம். ஆனால் அவர்களாகவே ஆக நாம் ஆசைப்படுவது ரொம்பவும் தவறு" என்று நச்சு பதில் ஒன்றை கூறியிருக்கிறார்.