AI சாட்போட்களை விரட்டும் WhatsApp: ஏன் இந்த திடீர் தடை? பின்னணி என்ன?

WhatsApp சர்வர் சுமை மற்றும் பாதுகாப்பு காரணங்களுக்காக, WhatsApp மூன்றாம் தரப்பு AI சேவைகளான ChatGPT-ஐ ஜனவரி 15, 2026 முதல் தடை செய்கிறது. 50 மில்லியனுக்கும் அதிகமான பயனர்கள் பாதிக்கப்படுவர். உங்கள் அரட்டை வரலாற்றை சேமிப்பது எப்படி என அறியுங்கள்!

உலகம் முழுவதும் கோடிக்கணக்கானோரால் பயன்படுத்தப்படும் உடனடி செய்தி தளங்களில் ஒன்றான வாட்ஸ்அப் (WhatsApp), அதன் வணிக API (Business API) விதிகளில் ஒரு பெரிய மாற்றத்தைக் கொண்டுவரத் தயாராகிறது. இந்த அப்டேட்டின் மூலம், வாட்ஸ்அப் தளத்தில் செயல்படும் ChatGPT அல்லது Perplexity AI போன்ற பொதுவான நோக்கங்கொண்ட மூன்றாம் தரப்பு செயற்கை நுண்ணறிவு (AI) சாட்போட்களுக்கான அணுகலைத் தடை செய்யப் போகிறது.

 ChatGPT ஏன் வாட்ஸ்அப்பில் செயல்படாது?

வரும் ஜனவரி 15, 2026 முதல் வாட்ஸ்அப்பில் ChatGPT செயல்படாது என்பதை OpenAI அதிகாரப்பூர்வமாக உறுதிப்படுத்தியுள்ளது. இந்தத் தடை, வாட்ஸ்அப்பில் ChatGPT-ஐப் பயன்படுத்தும் 50 மில்லியனுக்கும் அதிகமான தற்போதைய பயனர்களைப் பாதிக்கிறது. அனைத்து மூன்றாம் தரப்பு AI கருவிகளையும் மெட்டா தடை செய்துள்ளதால், வாட்ஸ்அப்பில் தொடர்ந்து சேவையை வழங்க முடியாத நிலை OpenAI-க்கு ஏற்பட்டுள்ளது. வேறு வழியின்றி, மெட்டாவின் முடிவுக்குக் கட்டுப்படுவதாக OpenAI தெரிவித்துள்ளது.

 யாரெல்லாம் பாதிக்கப்படுவார்கள்?

இந்தக் கொள்கை மாற்றம் முக்கியமாக, வாட்ஸ்அப் வணிக API பயனர்கள் (WhatsApp Business API users) மற்றும் வாடிக்கையாளர் உரையாடல்களுக்கு AI ஆட்டோமேஷனைப் பயன்படுத்தும் நிறுவனங்களைப் பாதிக்கிறது. பல ஸ்டார்ட்அப் நிறுவனங்கள் வாடிக்கையாளர் ஆதரவு, விற்பனை, லீட்கள் மற்றும் பொதுவான கேள்விகளுக்குப் பதிலளிக்க ChatGPT மூலம் இயங்கும் வாட்ஸ்அப் போட்களைப் பயன்படுத்தி வந்தன. இப்போது, அந்த அனைத்துச் சேவைகளும் நிறுத்தப்படும். சாதாரண பயனர்கள் AI உடன் அரட்டை அடிக்கப் பயன்படுத்திய சேவைகளும் நின்று போகும்.

 தடைக்கான காரணம் என்ன? மெட்டாவின் நோக்கம் என்ன?

அதிகரித்து வரும் AI செய்திகளால் சர்வர்கள் அதிக சுமையுடன் (Overloaded servers) இயங்குவதே இந்தத் தடைக்கு முக்கிய காரணம் என மெட்டா கூறுகிறது. மேலும், வெளிப்புற AI மாடல்களில் உள்ள பாதுகாப்பு மற்றும் இணக்க அபாயங்கள் (Security and compliance risks) பற்றிய கவலைகளும் இதில் அடங்கும். சுருக்கமாகச் சொன்னால், வாட்ஸ்அப்பின் AI சூழலைத் தனியுரிமையுடனும் பாதுகாப்பாகவும்—மெட்டாவின் சொந்த AI கருவிகளுக்குள்ளேயே—தங்கள் கட்டுப்பாட்டில் வைத்திருக்கவே மெட்டா விரும்புகிறது.

உங்கள் ChatGPT அரட்டை வரலாற்றை சேமிப்பது எப்படி?

வாட்ஸ்அப் சாட்போட் அரட்டைகளை ஏற்றுமதி செய்ய அனுமதிக்காததால், உங்கள் உரையாடல்களைப் பழிர்ப்பு (Backup) எடுக்க OpenAI ஒரு எளிய வழியை அறிமுகப்படுத்தியுள்ளது.

1. Android / iOS-ல் ChatGPT செயலியைப் பதிவிறக்கவும் அல்லது இணையதளத்தில் (Chat OpenAI.com) திறக்கவும்.

2. ChatGPT-யில் உள்நுழையவும் அல்லது புதிய கணக்கை உருவாக்கவும்.

3. ChatGPT வாட்ஸ்அப் எண்ணைத் (1-800-ChatGPT) திறந்து, சுயவிவரத்தில் உள்ள இணைப்பைக் கிளிக் செய்து உங்கள் ChatGPT கணக்குடன் இணைக்கவும்.

4. இணைத்தவுடன், உங்கள் தொலைபேசி எண் இணைக்கப்பட்டு, உங்கள் வாட்ஸ்அப் அரட்டை வரலாறு ChatGPT செயலியில் தோன்றும்.

இந்த வழியில், தடைக்குப் பிறகும் உங்கள் பழைய AI உரையாடல்களை நீங்கள் இழக்க மாட்டீர்கள்.

 ஜனவரி 15, 2026-க்குப் பிறகு என்ன நடக்கும்?

கெடுவுக்குப் பிறகு, வாட்ஸ்அப்பில் ChatGPT பதிலளிப்பதை நிறுத்திவிடும். அனைத்து மூன்றாம் தரப்பு AI போட்களும் வேலை செய்வதை நிறுத்திவிடும். மெட்டாவின் அதிகாரப்பூர்வ AI கருவிகள் மட்டுமே (கிடைக்கப்பெறும் போது) அனுமதிக்கப்படும். AI போட்களைச் சார்ந்துள்ள வணிகங்கள் மற்றும் பயனர்கள் இனிமேல் ChatGPT செயலி, இணையதளம் அல்லது பிரத்யேக AI தளங்களுக்கு மாற வேண்டிய கட்டாயம் ஏற்படும்.