ஜிமெயில் யூசர்களுக்கு 'ஜாக்பாட்'.. இனி ஈமெயில் படிக்கவே வேண்டாம்! சுந்தர் பிச்சை செய்த மேஜிக்!

Gemini கூகுள் சிஇஓ சுந்தர் பிச்சை ஜிமெயிலுக்கான ஜெமினி AI வசதிகளை அறிமுகப்படுத்தினார். இனி ஈமெயில் சுருக்கம், ஸ்மார்ட் ரிப்ளை உள்ளிட்ட பல வசதிகள் கிடைக்கும்.

கூகுள் நிறுவனத்தின் சிஇஓ சுந்தர் பிச்சை, ஜிமெயில் (Gmail) பயனர்களுக்கு ஒரு மகிழ்ச்சியான செய்தியை வெளியிட்டுள்ளார். "ஜிமெயிலில் ஜெமினி சகாப்தம் (Gemini Era) தொடங்கிவிட்டது" என்று அவர் அதிகாரப்பூர்வமாக அறிவித்துள்ளார். 20 ஆண்டுகளுக்கு முன்பு ஏப்ரல் 1-ம் தேதி தொடங்கப்பட்ட ஜிமெயில், இப்போது செயற்கை நுண்ணறிவு (AI) தொழில்நுட்பத்துடன் இணைந்து மிகப்பெரிய மாற்றத்தைச் சந்திக்கவுள்ளது. இனி உங்கள் இன்பாக்ஸ் முன்பை விட மிகவும் புத்திசாலித்தனமாகவும், வேகமாகவும் செயல்படும்.

சுந்தர் பிச்சையின் முக்கிய அறிவிப்பு

இதுகுறித்து எக்ஸ் (ட்விட்டர்) தளத்தில் பதிவிட்டுள்ள சுந்தர் பிச்சை, "2004-ம் ஆண்டு ஏப்ரல் ஃபூல்ஸ் தினத்தில் நாங்கள் ஜிமெயிலை அறிமுகப்படுத்தினோம். 20 ஆண்டுகளுக்குப் பிறகு, இப்போது ஜிமெயிலை ஜெமினி சகாப்தத்திற்குக் கொண்டு செல்கிறோம். ஏஐ ஓவர்வியூஸ் (AI Overviews), தனிப்பயனாக்கப்பட்ட பதில்கள், பிழை திருத்தம் மற்றும் புதிய ஏஐ இன்பாக்ஸ் எனப் பல வசதிகள் இதில் அடங்கும்," என்று குறிப்பிட்டுள்ளார்.

நீண்ட ஈமெயில்களைச் சுருக்கித் தரும் 'AI Overviews'

இந்த அப்டேட்டின் மிக முக்கிய அம்சம் 'AI Overviews' ஆகும். இனி நீங்கள் நீண்ட ஈமெயில் உரையாடல்களை (Threads) முழுமையாகப் படித்து நேரத்தை வீணடிக்கத் தேவையில்லை. டஜன் கணக்கான பதில்கள் கொண்ட ஒரு ஈமெயிலைத் திறக்கும்போது, ஜெமினி ஏஐ தானாகவே அதை ஆய்வு செய்து, முக்கியமான தகவல்களை மட்டும் சுருக்கமாக உங்களுக்கு வழங்கும். டெட்லைன்கள், செய்ய வேண்டிய பணிகள் மற்றும் எடுக்கப்பட்ட முடிவுகளை இது பட்டியலிட்டுக் காட்டும்.

இன்பாக்ஸிடமே கேள்வி கேட்கலாம்!

இனி உங்கள் இன்பாக்ஸுடன் நீங்கள் நேரடியாகப் பேசலாம். உதாரணமாக, "இந்த ப்ராஜெக்ட்டுக்கான பட்ஜெட் எவ்வளவு?" அல்லது "மீட்டிங் எப்போது?" என்று கேட்டால், ஜெமினி ஏஐ பழைய ஈமெயில்களைத் தேடி, உங்களுக்கான பதிலை உடனே வழங்கும். இந்த வசதி 'கூகுள் ஏஐ ப்ரோ' மற்றும் 'அல்ட்ரா' சந்தாதாரர்களுக்குக் கிடைக்கும். அதே சமயம், உரையாடல் சுருக்கங்கள் (Conversation Summaries) அனைவருக்கும் இலவசமாகக் கிடைக்கும்.

தானாகவே பதில் எழுதும் வசதி

கூகுள் தனது 'Help Me Write' மற்றும் 'Suggested Replies' வசதிகளையும் மேம்படுத்தியுள்ளது. ஈமெயிலின் தொனி மற்றும் நோக்கத்தைப் புரிந்துகொண்டு, அதற்கு ஏற்றார்போல் சரியான பதிலை ஜெமினி ஏஐ பரிந்துரைக்கும். ஒரு சிறிய குறிப்பைக் கொடுத்தால் போதும், முழுமையான ஒரு வரைவு (Draft) ஈமெயிலை இது உருவாக்கித் தரும். மேலும், 'Proofread' வசதி மூலம் இலக்கணம் மற்றும் தெளிவுத்திறனைச் சரிபார்த்துக்கொள்ளலாம்.

பாதுகாப்பான மற்றும் ஸ்மார்ட்டான இன்பாக்ஸ்

ஜிமெயில் இப்போது வெறும் இன்பாக்ஸாக மட்டும் இல்லாமல், ஒரு தனிப்பட்ட ஏஐ உதவியாளராக மாறுகிறது. இந்த புதிய மாற்றங்கள் அனைத்தும் கூகுளின் ஜெமினி ஏஐ மாடல்களின் பாதுகாப்பு நெறிமுறைகளுடன் வடிவமைக்கப்பட்டுள்ளன. முதற்கட்டமாக ஆங்கில மொழியில் தொடங்கும் இந்தச் சேவை, வரும் மாதங்களில் மற்ற பிராந்தியங்களுக்கும் விரிவுபடுத்தப்படும் என்று கூகுள் தெரிவித்துள்ளது.