கம்ப்யூட்டர் பத்தி ஒண்ணுமே தெரியாதா? பரவாயில்லை.. நீங்களும் ஆப் (App) உருவாக்கலாம்.. எப்படின்னு பாருங்க!

Microsoft மைக்ரோசாஃப்ட் நிறுவனம் கோடிங் தெரியாத ஊழியர்களையும் AI உதவியுடன் மென்பொருள் உருவாக்க அனுமதிக்கிறது. இது தொழில்நுட்ப உலகில் பெரிய மாற்றத்தை ஏற்படுத்தும்.

மென்பொருள் உலகில் ஒரு மிகப்பெரிய மாற்றத்தை மைக்ரோசாஃப்ட் (Microsoft) முன்னெடுத்துள்ளது. இனி கோடிங் (Coding) தெரிந்தவர்கள் மட்டுமே மென்பொருளை உருவாக்க முடியும் என்ற நிலை மாறி, சாதாரண ஊழியர்களும் செயற்கை நுண்ணறிவு (AI) உதவியுடன் கோடிங் செய்யும் புதிய முறையை அந்நிறுவனம் பரிசோதித்து வருகிறது.

கோடிங் தெரியாதவர்களுக்கும் வாய்ப்பு

மைக்ரோசாஃப்ட் நிறுவனத்தில் உள்ள வடிவமைப்பாளர்கள் (Designers), திட்ட மேலாளர்கள் (Project Managers) போன்ற தொழில்நுட்பம் சாராத ஊழியர்களுக்கும் இனி கோடிங் செய்யும் வாய்ப்பு வழங்கப்படுகிறது. இவர்கள் 'ஆந்த்ரோபிக்' (Anthropic) நிறுவனத்தின் 'கிளாட் கோட்' (Claude Code) போன்ற AI கருவிகளைப் பயன்படுத்தி, தங்கள் ஐடியாக்களை உடனடியாக மென்பொருளாக மாற்ற முடியும். இதற்காக அவர்கள் இன்ஜினியர்களுக்காகக் காத்திருக்க வேண்டிய அவசியமில்லை.

வேகமாக வளரும் தொழில்நுட்பம்

ஒரு புதிய ஐடியா தோன்றினால், அதை உடனடியாகச் சோதித்துப் பார்க்க (Prototype) இந்த முறை உதவும். மைக்ரோசாஃப்ட் நிறுவனம் தனது விண்டோஸ் (Windows), டீம்ஸ் (Teams) மற்றும் அவுட்லுக் (Outlook) போன்ற பிரிவுகளில் பணிபுரியும் ஊழியர்களை இந்த புதிய AI கருவிகளைப் பயன்படுத்த ஊக்குவிக்கிறது. இதன் மூலம் சாதாரண ஊழியர்களும் மென்பொருள் உருவாக்கத்தில் முக்கியப் பங்காற்ற முடியும்.

இன்ஜினியர்களுக்கு ஆபத்தா?

இந்த புதிய முயற்சியால் சாப்ட்வேர் இன்ஜினியர்களின் வேலைக்கு ஆபத்து வருமா என்ற கேள்வி எழலாம். ஆனால், மைக்ரோசாஃப்ட் இதுபற்றித் தெளிவாகக் கூறியுள்ளது. இன்ஜினியர்கள் தொடர்ந்து மிகச் சிக்கலான தொழில்நுட்பப் பணிகளைக் கவனிப்பார்கள் என்றும், அவர்களுக்கு உதவியாக கிட்ஹப் கோபைலட் (GitHub Copilot) தொடர்ந்து செயல்படும் என்றும் தெரிவிக்கப்பட்டுள்ளது.

எதிர்காலத்திற்கான விதை

ஏற்கனவே மைக்ரோசாஃப்டின் 20-30 சதவீத கோடிங் வேலைகளை AI செய்து வருகிறது. கூகுள் நிறுவனத்திலும் இதே நிலைதான். இந்நிலையில், சாதாரண மக்களையும் கோடிங் செய்ய வைக்கும் இந்த முயற்சி, எதிர்காலத்தில் தொழில்நுட்ப உலகையே தலைகீழாக மாற்றக்கூடும். இனி கம்ப்யூட்டர் சயின்ஸ் படித்தவர்கள் மட்டும்தான் சாப்ட்வேர் உருவாக்க முடியும் என்ற நிலை முற்றிலுமாக மாறப்போகிறது.