X தளத்தில் திடீர் கோளாறு! இந்தியாவில் மீண்டும் சரியானதா? Downdetector சொல்லும் உண்மை நிலவரம் இதோ!

X எலான் மஸ்கின் X தளம் முடங்கியதால் ஆயிரக்கணக்கான பயனர்கள் பாதிப்பு. ஜனவரி 13 ஆம் தேதிக்கான Downdetector புள்ளிவிவரங்கள் மற்றும் லேட்டஸ்ட் அப்டேட்ஸ் இங்கே.

எலான் மஸ்கிற்கு சொந்தமான சமூக வலைதளமான X (முன்பு ட்விட்டர்) உலகம் முழுவதும் ஆயிரக்கணக்கான பயனர்களுக்கு இன்று மாலை முடங்கியது. சேவைகள் தடைபடுவதைக் கண்காணிக்கும் இணையளமான Downdetector வெளியிட்ட தகவலின்படி, இன்று (ஜனவரி 13, 2026) மாலை முதல் இந்தத் தளம் செயல்படுவதில் சிக்கல்கள் இருப்பதாகப் புகார்கள் குவியத் தொடங்கின.

Downdetector வெளியிட்ட புள்ளிவிவரங்கள்

கிடைக்கப்பெற்ற தரவுகளின்படி, 1,500-க்கும் மேற்பட்ட பயனர்கள் (சில பிராந்தியங்களில் 7,000-க்கும் மேல்) எக்ஸ் தளத்தில் சிக்கல்களை எதிர்கொண்டதாகப் புகாரளித்துள்ளனர். இந்தச் சிக்கல்கள் குறித்த புள்ளிவிவரங்கள் பின்வருமாறு:

• 59% பயனர்கள்: மொபைல் செயலியை (Mobile App) பயன்படுத்துவதில் சிக்கலை எதிர்கொள்கின்றனர்.

• 33% பயனர்கள்: இணையதளத்தை (Website) திறப்பதில் சிரமப்படுகின்றனர்.

• 8% பயனர்கள்: சர்வர் இணைப்பு அல்லது ஃபீட் ரெஃப்ரெஷ் (Feed Refreshing) செய்வதில் கோளாறுகளைச் சந்திக்கின்றனர்.

பயனர்கள் சந்திக்கும் முக்கிய சிக்கல்கள்

பல பயனர்கள் தங்கள் திரையில் "Something went wrong" என்ற பிழைச் செய்தியைப் பார்ப்பதாகவும், ஹோம் ஃபீட் மற்றும் நோட்டிஃபிகேஷன்கள் லோட் ஆகவில்லை என்றும் தெரிவித்துள்ளனர். கடந்த சில மாதங்களாகவே X தளம் அவ்வப்போது தொழில்நுட்பக் கோளாறுகளைச் சந்தித்து வருகிறது. இருப்பினும், 2026 ஆம் ஆண்டில் தளம் சந்திக்கும் முதல் பெரிய முடக்கம் இதுவாகும்.

தற்போதைய நிலவரப்படி, இந்தத் தொழில்நுட்பக் கோளாறுக்கான காரணம் குறித்து X நிறுவனம் அதிகாரப்பூர்வ அறிவிப்பு எதையும் வெளியிடவில்லை. இந்தியாவில் இரவு 8:30 மணியளவில் நிலைமை சீராகத் தொடங்கியதாகத் தெரிகிறது.

அரசுக்கு X நிறுவனம் அளித்த உறுதிமொழி

இதற்கிடையில், X தளம் தனது உள்ளடக்க நெறிமுறைப்படுத்தலில் (Content Moderation) உள்ள தவறுகளை ஒப்புக்கொண்டுள்ளது. ஞாயிற்றுக்கிழமை (ஜனவரி 11, 2026) அரசு வட்டாரங்கள் வெளியிட்ட தகவலின்படி, இனி இந்திய சட்டங்கள் மற்றும் விதிமுறைகளுக்கு உட்பட்டுச் செயல்படுவதாக அந்நிறுவனம் உறுதியளித்துள்ளது.

ஆபாசமான மற்றும் பாலியல் ரீதியான உள்ளடக்கங்கள், குறிப்பாக X-ன் செயற்கை நுண்ணறிவு கருவியான 'Grok' மூலம் உருவாக்கப்பட்ட படங்கள் பரப்பப்படுவது குறித்து எழுந்த புகார்களைத் தொடர்ந்து இந்த நடவடிக்கை எடுக்கப்பட்டுள்ளது. இந்தப் புகார்களின் அடிப்படையில், X நிறுவனம் சுமார் 3,500 ஆட்சேபனைக்குரிய பதிவுகளை நீக்கியுள்ளதோடு, 600-க்கும் மேற்பட்ட கணக்குகளை முடக்கியுள்ளதாகத் தகவல்கள் தெரிவிக்கின்றன.