குடும்பத்தோடு உட்கார்ந்து 'ரீல்ஸ்' பார்க்கலாமா? வந்துவிட்டது புதிய வசதி.. ஒரே டிவியில் 5 அக்கவுண்ட்!

Instagram அமேசான் ஃபயர் டிவியில் இன்ஸ்டாகிராம் ஆப் அறிமுகம்! இனி பெரிய திரையில் ரீல்ஸ் பார்க்கலாம். 5 அக்கவுண்ட்களைப் பயன்படுத்தும் வசதியும் உண்டு.

இன்ஸ்டாகிராம் என்றாலே நம் நினைவுக்கு வருவது மொபைல் போன் தான். ஆனால், இனி அந்தக் கதை மாறப்போகிறது. அமேசான் (Amazon) மற்றும் மெட்டா (Meta) நிறுவனங்கள் இணைந்து ஒரு புதிய மைல்கல்லைத் தொட்டுள்ளன. 'இன்ஸ்டாகிராம் ஃபார் டிவி' (Instagram for TV) என்ற புதிய செயலி தேர்ந்தெடுக்கப்பட்ட அமேசான் ஃபயர் டிவி சாதனங்களில் அறிமுகப்படுத்தப்பட்டுள்ளது. இதன் மூலம் பயனர்கள் தங்களுக்குப் பிடித்த ரீல்ஸ் (Reels) வீடியோக்களை இனி பெரிய திரையில் கண்டு மகிழலாம்.

பொழுதுபோக்கில் புதிய மாற்றம்: மொபைல் டூ டிவி

இதுவரை தனிப்பட்ட நபர்கள் தங்கள் மொபைல் திரையில் மட்டுமே பார்த்து வந்த இன்ஸ்டாகிராம் ரீல்ஸை, இனி குடும்பத்தோடு அமர்ந்து டிவியில் பார்க்கும் அனுபவத்தை இந்த புதிய ஆப் வழங்குகிறது. பொழுதுபோக்கு மற்றும் சமூக வலைத்தளங்களுக்கு இடையிலான இடைவெளியைக் குறைக்கும் வகையில் இந்த முயற்சி அமைந்துள்ளது. பயனர்கள் அமேசான் ஆப் ஸ்டோரிலிருந்து நேரடியாக இந்த செயலியைப் பதிவிறக்கம் செய்து கொள்ளலாம்.

உங்களுக்குப் பிடித்த வீடியோக்கள் வரிசையாக வரும்

டிவியில் ரீல்ஸ் பார்க்கும் அனுபவத்தை மேம்படுத்தச் சிறப்பான வசதிகள் செய்யப்பட்டுள்ளன. பயனர்களின் விருப்பத்திற்கு ஏற்ப (Interest-based channels) வீடியோக்கள் வகைப்படுத்தப்பட்டுத் திரையில் தோன்றும். இன்ஸ்டாகிராமின் அல்காரிதம் மூலம், நீங்கள் மொபைலில் எப்படி உங்களுக்குப் பிடித்தமான படைப்பாளர்களின் (Creators) வீடியோக்களைப் பார்க்கிறீர்களோ, அதேபோன்ற பரிந்துரைகள் டிவியிலும் கிடைக்கும்.

ஒரே டிவியில் 5 அக்கவுண்ட்: குடும்பங்களுக்கான வசதி

இந்தியக் குடும்பங்களுக்கு மிகவும் ஏற்ற வசதியாக இது இருக்கும். ஒரு ஃபயர் டிவி சாதனத்தில் அதிகபட்சமாக 5 இன்ஸ்டாகிராம் கணக்குகளை இணைக்க முடியும். வீட்டில் உள்ள ஒவ்வொருவரும் அவரவர் கணக்கில் லாக்-இன் செய்து, தங்களுக்குரிய பிரத்யேக பரிந்துரைகளைப் பெறலாம். கிரியேட்டர்களைத் தேடுவது, ட்ரெண்டிங் தலைப்புகளைப் பார்ப்பது மற்றும் நண்பர்களின் கணக்குகளைப் பார்ப்பது என அனைத்தையும் டிவியிலேயே செய்ய முடியும்.

பெரிய திரையில் என்னென்ன செய்யலாம்?

மொபைலில் செய்வதைப் போலவே டிவியிலும் ரீல்ஸ் வீடியோக்களுக்கு 'லைக்' (Like) போடலாம், கமெண்டுகளைப் படிக்கலாம். ஆனால், இது வீடியோக்களைப் பார்ப்பதற்கான (Consumption) தளமாக மட்டுமே வடிவமைக்கப்பட்டுள்ளது. டிவியைப் பயன்படுத்திப் புதிய ரீல்ஸ் வீடியோக்களை உருவாக்கவோ அல்லது பதிவேற்றவோ முடியாது.

எந்தெந்த டிவிகளில் இது வேலை செய்யும்?

தற்போது இந்த வசதி அமெரிக்காவில் உள்ள குறிப்பிட்ட ஃபயர் டிவி மாடல்களில் மட்டுமே அறிமுகப்படுத்தப்பட்டுள்ளது.

• ஃபயர் டிவி எச்டி (Fire TV HD)

• ஃபயர் டிவி ஸ்டிக் 4கே பிளஸ் மற்றும் மேக்ஸ் (Fire TV Stick 4K Plus/Max)

• ஃபயர் டிவி ஆம்னி QLED சீரிஸ்

இந்தியாவில் எப்போது எதிர்பார்க்கலாம்?

இந்தியாவில் இந்த வசதி எப்போது அறிமுகமாகும் என்பது குறித்த அதிகாரப்பூர்வ அறிவிப்பு இன்னும் வெளியாகவில்லை. இருப்பினும், சமீபத்தில்தான் அமேசான் தனது 'Fire TV Stick 4K Select' மாடலை ரூ.5,499 விலையில் இந்தியாவில் அறிமுகப்படுத்தியது. எனவே, அடுத்த சில மாதங்களில் இந்த இன்ஸ்டாகிராம் டிவி வசதி இந்தியப் பயனர்களுக்கும் கிடைக்கும் என்று எதிர்பார்க்கப்படுகிறது.