கூகுள், ஃபேஸ்புக்கிற்கு நெருக்கடியா? மத்திய அரசு கையில் எடுத்த அந்த 'ஆயுதம்' - பின்னணி என்ன?

Data Protection இந்தியாவின் தரவு பாதுகாப்பு வாரியத்திற்கான டிஜிட்டல் உள்கட்டமைப்பு தயார் என்றும், விரைவில் செயல்பாட்டிற்கு வரும் என்றும் ஐடி செயலாளர் தெரிவித்துள்ளார்.

இந்தியாவில் டிஜிட்டல் தனிநபர் தரவு பாதுகாப்புச் சட்டத்தின் (DPDP Act) கீழ் அமையவுள்ள புதிய 'டேட்டா பாதுகாப்பு வாரியத்தை' (Data Protection Board) அமைப்பதற்கான அடிப்படைப் பணிகளை மத்திய அரசு தீவிரப்படுத்தியுள்ளது. இந்த வாரியத்தின் உறுப்பினர்களை நியமிப்பதற்கான நடைமுறைகள் மற்றும் வழிமுறைகளை வகுக்கும் பணிகள் தொடங்கிவிட்டதாக மத்திய தகவல் தொழில்நுட்பத் துறை செயலாளர் எஸ்.கிருஷ்ணன் தெரிவித்துள்ளார்.

முழுமையாக டிஜிட்டல் மயமாகும் அலுவலகம்

புதிய தரவு பாதுகாப்பு வாரியத்தின் செயல்பாடுகள் அனைத்தும் தொழில்நுட்ப ரீதியாக மிகத் துல்லியமாக இருக்க வேண்டும் என்பதில் அரசு உறுதியாக உள்ளது. இதற்காக, வாரியத்தின் அலுவலகம் "முழுமையாக டிஜிட்டல்" (Fully Digital) முறையில் செயல்படும் வகையில் வடிவமைக்கப்பட்டுள்ளது. இதற்கென பிரத்யேக மென்பொருள் (Specialised Software) ஏற்கனவே உருவாக்கப்பட்டுத் தயாராக இருப்பதாக ஐடி செயலாளர் எஸ்.கிருஷ்ணன் உறுதிப்படுத்தியுள்ளார்.

நிறுவனங்களுடன் ஆலோசனை மற்றும் காலக்கெடு

கூகுள், ஃபேஸ்புக் போன்ற பெரிய தொழில்நுட்ப நிறுவனங்கள் (Big Tech) புதிய விதிமுறைகளைப் பின்பற்ற கூடுதல் கால அவகாசம் கேட்கக்கூடும் என்ற கவலைகள் எழுந்தன. இது குறித்துப் பேசிய கிருஷ்ணன், "தொழில்துறையினரின் தயார் நிலையை அறிய அவர்களுடன் தொடர்ந்து ஆலோசித்து வருகிறோம். டிஜிட்டல் சூழலியல் மிகவும் சிக்கலானது என்பதால், எந்தவித இடையூறும் இன்றி சுமூகமான மாற்றத்தை உறுதி செய்வதே அரசின் நோக்கம்," என்றார். மேலும், பெரிய நிறுவனங்கள் எதுவும் இதுவரை கெடுபிடியான காலக்கெடு குறித்து தங்களிடம் அதிருப்தி தெரிவிக்கவில்லை என்றும் அவர் விளக்கினார்.

உறுப்பினர்கள் தேர்வு: இரண்டு முக்கியக் குழுக்கள்

சுயாதீன அமைப்பாகச் செயல்படவுள்ள இந்த வாரியம், தரவு மீறல்களைக் கண்காணித்து அபராதம் விதிக்கும் அதிகாரம் கொண்டது. இதன் உறுப்பினர்களைத் தேர்வு செய்ய டிபிடிபி விதிகளின்படி இரண்டு தேர்வுக் குழுக்கள் அமைக்கப்படும்:

1. தலைவரைத் தேர்ந்தெடுக்க: கேபினட் செயலாளர் தலைமையில், சட்டம் மற்றும் ஐடி செயலாளர்கள் மற்றும் இரு துறைசார் நிபுணர்கள் அடங்கிய குழு.

2. உறுப்பினர்களைத் தேர்ந்தெடுக்க: ஐடி செயலாளர் தலைமையில், சட்டச் செயலாளர் மற்றும் இரு துறைசார் நிபுணர்கள் அடங்கிய குழு.

மீறினால் ரூ.250 கோடி வரை அபராதம்!

வாரியம் எப்போது முழுமையாகச் செயல்பாட்டிற்கு வரும் என்பதற்கான உறுதியான தேதியைச் செயலாளர் குறிப்பிடவில்லை என்றாலும், "வரும் மாதங்களில்" இது எதிர்பார்க்கப்படுவதாகக் கூறினார். புதிய சட்டத்தின்படி, பயனர்களின் தரவுகளைப் பாதுகாப்பதில் நிறுவனங்கள் தவறு இழைத்தால் கடும் அபராதம் விதிக்கப்படும்:

• பாதுகாப்பு வழிமுறைகளைப் பின்பற்றாவிட்டால்: ரூ. 250 கோடி வரை

• தரவு கசிவு குறித்து அறிவிக்கத் தவறினால்: ரூ. 200 கோடி வரை

• குழந்தைகளின் தரவு தொடர்பான மீறல்களுக்கு: ரூ. 200 கோடி வரை