புதுச்சேரி மக்களுக்கு குட்நியூஸ்! ரூ.2157 கோடி திட்டத்துக்கு பச்சைக்கொடி காட்டிய மத்திய அரசு!

மரக்காணம் - புதுச்சேரி இடையே ரூ.2,157 கோடி செலவில் 4 வழிச்சாலை அமைக்க மத்திய அமைச்சரவை ஒப்புதல் அளித்துள்ளது. இது இப்பகுதியின் போக்குவரத்தை மேம்படுத்துவதோடு, பொருளாதார வளர்ச்சிக்கும் உதவும்.

மரக்காணம் - புதுச்சேரி இடையே ரூ.2,157 கோடி செலவில் 4 வழிச்சாலை அமைக்க மத்திய அமைச்சரவை இன்று ஒப்புதல் அளித்தது. பிரதமர் நரேந்திர மோடி தலைமையில் புதுதில்லியில் நடந்த கூட்டத்தில் இந்த முடிவு எடுக்கப்பட்டது. இது இப்பகுதியின் போக்குவரத்தை மேம்படுத்துவதோடு, பொருளாதார வளர்ச்சிக்கும் உதவும் என எதிர்பார்க்கப்படுகிறது.

மத்திய நெடுஞ்சாலைத் துறை அளித்த பரிந்துரையின்படி, இந்தச் சாலை NH-332A என்ற தேசிய நெடுஞ்சாலைப் பகுதியாக அமையும். இத்திட்டத்தின் மொத்தச் செலவு ₹2,157 கோடி ஆகும். இந்தச் செலவில் நிலம் கையகப்படுத்துவதற்கான செலவு ₹442 கோடி மற்றும் கட்டுமான செலவு ₹1,118 கோடி எனப் பிரிக்கப்பட்டுள்ளது. இந்தத் திட்டம் Hybrid Annuity Mode (HAM) எனப்படும் முறைப்படி செயல்படுத்தப்பட உள்ளது.

இந்த 4 வழிச் சாலைப் பணி நிறைவடைந்தால், சென்னை, புதுச்சேரி, விழுப்புரம் மற்றும் நாகப்பட்டினம் போன்ற முக்கிய நகரங்களுக்கு இடையே போக்குவரத்து நெரிசல் குறையும். இந்தப் புதிய சாலை NH-32 மற்றும் NH-332 போன்ற தேசிய நெடுஞ்சாலைகளுடனும், SH-136 மற்றும் SH-203 போன்ற மாநில நெடுஞ்சாலைகளுடனும் இணைக்கப்படும். இதன் மூலம் போக்குவரத்து இன்னும் மேம்படும்.

பொருளாதார வளர்ச்சி

இந்தச் சாலைத் திட்டமானது, புதுச்சேரியின் சுற்றுலாவை மேம்படுத்துவதோடு, வர்த்தகம் மற்றும் தொழில் வளர்ச்சிக்கு புதிய வாய்ப்புகளை உருவாக்கும். மேலும், இந்தத் திட்டம் நேரடியாக 8 லட்சம் பேருக்கும், மறைமுகமாக 10 லட்சம் பேருக்கும் வேலைவாய்ப்புகளை உருவாக்கும் என மதிப்பிடப்பட்டுள்ளது. இது அப்பகுதியின் பொருளாதார வளர்ச்சிக்கு முக்கியப் பங்களிக்கும் என்று மத்திய அரசு தெரிவித்துள்ளது.

இந்தச் சாலைப் பணிகள் மூன்று கட்டங்களாக மேற்கொள்ளப்பட உள்ளதாகத் தெரிகிறது. மாமல்லபுரம் - முகையூர் சாலை ஏற்கனவே திறக்கப்பட்டுள்ளது, முகையூர் - மரக்காணம் சாலை டிசம்பர் 2025-க்குள் பயன்பாட்டிற்கு வரும் என எதிர்பார்க்கப்படுகிறது. இறுதியாக, மரக்காணம் - புதுச்சேரி பகுதிக்கான பணிகள் இப்போது ஒப்புதல் பெற்றுள்ளன.

வருமான வரி மசோதா

அமைச்சரவைக் கூட்டத்தில், புதிய வருமான வரி சட்டத் திருத்த மசோதாவை சில மாற்றங்களுடன் மீண்டும் நாடாளுமன்றத்தில் தாக்கல் செய்யவும் முடிவு செய்யப்பட்டுள்ளது. இது குறித்த கூடுதல் விவரங்கள் விரைவில் வெளியாகும் என எதிர்பார்க்கப்படுகிறது.