A Raja: கொச்சையாக விமர்சித்த ஆ. ராசா... தரமான பதிலடி கொடுத்த தமிழக வெற்றிக் கழகம்!

TVK Slams A Raja : திமுக கூட்டணியில் இருந்த விசிக, முஸ்லிம் லீக் கட்சிகள் தவெக அரசில் இணைந்ததை ஆ. ராசா கிண்டலடித்தார். இது அநாகரிகத்தின் உச்சம் என்றும், திமுகவின் அதிகார மமதையைக் காட்டுவதாகவும் தவெக கடுமையாக சாடியுள்ளது.

முதலமைச்சர் விஜய் தலைமையிலான அமைச்சரவையில் விடுதலை சிறுத்தைகள் கட்சி (விசிக) மற்றும் இந்திய யூனியன் முஸ்லிம் லீக் (ஐயுஎம்எல்) இணைந்ததை, திமுக எம்.பி. ஆ. ராசா 'முடத்தெங்கு' என்று கிண்டலாக குறிப்பிட்டிருந்தார். இதை தமிழக வெற்றி கழகம் (தவெக) கடுமையாக சாடியுள்ளது. இது அரசியல் நாகரிக வரம்புகளை மீறிய செயல் என்றும், ஜனநாயக கொள்கைகளை அவமதிப்பதாகவும் தவெக குற்றம் சாட்டியுள்ளது. ஆ. ராசா வெளியிட்ட ட்வீட், 'அநாகரிகத்தின் உச்சம்' என்றும், இது திமுகவின் அதிகார மமதையை வெளிச்சம் போட்டுக் காட்டுவதாகவும் தவெக கூறியுள்ளது.

ஆ. ராசாவை சாடிய தவெக

தவெக வெளியிட்ட அறிக்கையில், "திமுக எம்.பி. திரு. ஆ. ராசா தனது சமூக வலைதளப் பக்கத்தில் பதிவிட்ட கருத்து, அநாகரிகத்தின் உச்சம். விசிக மற்றும் ஐயுஎம்எல் முன்னெடுக்கும் 'அதிகாரப் பகிர்வு' என்ற ஜனநாயகக் கொள்கையை இது கொச்சைப்படுத்துகிறது. மேலும், இது அரசியல் தார்மீக வரம்புகளை முற்றிலும் மீறிய செயல்!" என்று குறிப்பிடப்பட்டுள்ளது.

திமுக தனது கூட்டணிக் கட்சிகளை சமமான ஜனநாயகப் பங்காளிகளாகக் கருதாமல், தங்களின் சொத்து போல நடத்துகிறது என்றும் தவெக குற்றம் சாட்டியுள்ளது. "சமூக நீதியை அடிப்படையாகக் கொண்ட கட்சிகள் தங்களின் உரிமைகளையோ அல்லது மாற்று அரசியல் கருத்துக்களையோ முன்வைக்கும்போது, அவர்களை இழிவாக விமர்சிப்பதும், மிரட்டும் தொனியில் பேசுவதும் திமுகவின் அதிகார மமதையைத்தான் காட்டுகிறது!" என்றும் அந்த அறிக்கையில் மேலும் கூறப்பட்டுள்ளது.

திமுகவின் இந்த எதிர்வினை, அதன் நீண்டகால அரசியல் ஆதிக்கத்தை இழந்துவிடுவோமோ என்ற நேரடி அச்சத்துடன் தொடர்புடையது என்று கூறியுள்ள தவெக, அனைவரையும் உள்ளடக்கிய ஆட்சி முறை குறித்து ஆளும் கூட்டணி பீதியடைந்துள்ளது என்றும் தெரிவித்துள்ளது. "தமிழக வெற்றி கழகம் முன்மொழியும் 'அதிகாரப் பகிர்வு' என்ற நேர்மையான, அனைவரையும் உள்ளடக்கிய அரசியல் தத்துவம், தங்களின் குடும்ப அரசியல் ஏகபோகத்தை தகர்த்துவிடும் என்ற அச்சத்தில்தான் திமுகவினர் நிதானம் இழந்து புலம்பத் தொடங்கியுள்ளனர்! உங்கள் சுயரூபத்தை நீங்களே அம்பலப்படுத்திக் கொண்டீர்கள்," என்று தவெக தனது அறிக்கையை முடித்துள்ளது.

திமுக கூட்டணியில் பாரம்பரியமாக இடம்பெற்றிருந்த விசிக மற்றும் ஐயுஎம்எல் கட்சிகளின் எம்.எல்.ஏ.க்கள், புதிதாக அமைந்த தவெக கூட்டணி அரசில் அமைச்சர்களாகப் பதவியேற்ற சூழலில்தான் இந்த சர்ச்சை வெடித்துள்ளது. ஆ. ராசா தனது ட்விட்டர் பக்கத்தில் இலக்கிய நயத்துடன் ஒரு பதிவை வெளியிட்டிருந்தார். அந்த உருவகத்தை புரிந்துகொண்ட தவெக, அது விசிக, ஐயுஎம்எல் போன்ற சமூக நீதிக் கட்சிகளை இழிவுபடுத்தும் தாக்குதல் என்று கூறியுள்ளது.

திமுகவின் துணைப் பொதுச் செயலாளரான ஆ. ராசா, தனது அதிகாரப்பூர்வ எக்ஸ் பக்கத்தில், 'முடத்தெங்கு' என்ற இலக்கியக் கருத்தை தற்போதைய அரசியல் நடத்தைக்கு ஒப்பிட்டு ஒரு கேள்வியை எழுப்பியிருந்தார்.
"என் வீட்டுத் தோட்டத்தில் உள்ள தென்னை மரம் வளைந்து எதிர் வீட்டுக்கு இளநீர் கொடுத்தால், அதற்கு இலக்கியத்தில் 'முடத்தெங்கு' என்று பெயர்! அரசியலில் அதற்கு என்ன பெயர் வைப்பது? தமிழ் வாழ்க!" என்று ராசா பதிவிட்டிருந்தார்.