கிளாம்பாக்கம் பரிதாபங்கள் ஓய்த்த பாடில்லை; எடப்பாடி பழனிசாமி கடும் கண்டனம்

கிளாம்பாக்கம் பேருந்து நிலையத்தில் போதிய பேருந்து வசதிகள் இல்லாததால் மக்கள் அவதிக்குள்ளாவதாக எடப்பாடி பழனிசாமி கண்டனம் தெரிவித்துள்ளார். திட்டமிடல் இன்றி அவசரமாக நிலையத்தை திறந்து மக்களை கஷ்டப்படுத்தியதாகவும் விமர்சித்துள்ளார்.

கிளாம்பாக்கம் புதிய ஒருங்கிணைந்த பேருந்து நிலையத்தில் பேருந்து சேவைகள் முறையாகவும், சீராகவும் இருப்பதை தி.மு.க. அரசு உறுதி செய்ய வேண்டும் என்று அ.தி.மு.க. பொதுச்செயலாளரும், தமிழ்நாடு சட்டமன்ற எதிர்க்கட்சித் தலைவருமான எடப்பாடி பழனிசாமி வலியுறுத்தியுள்ளார். இது தொடர்பாக அவர் தனது 'எக்ஸ்' சமூக வலைத்தளப் பக்கத்தில் வெளியிட்டுள்ள பதிவில், தமிழக அரசின் செயல்பாடுகளுக்குக் கடும் கண்டனம் தெரிவித்துள்ளார்.

பயணிகளின் அவதிக்கு கண்டனம்

"கடந்த மூன்று நாட்களாக கிளாம்பாக்கம் பேருந்து நிலையத்தில் போதிய பேருந்து வசதிகள் இல்லாததால், சென்னையில் இருந்து தங்கள் சொந்த ஊர்களுக்குச் செல்லும் மக்கள் பெரும் அவதிக்கு உள்ளாகியுள்ளதாகச் செய்திகள் வருகின்றன" என்று எடப்பாடி பழனிசாமி தனது பதிவில் குறிப்பிட்டுள்ளார். கிளாம்பாக்கம் பேருந்து நிலையத்தைத் திட்டமிடல் இன்றி அவசரமாகத் திறந்து, மக்களைக் கஷ்டப்படுத்தியது இந்த தி.மு.க. அரசுதான் என்று அவர் குற்றம்சாட்டியுள்ளார்.

தி.மு.க. அரசு மீது விமர்சனம்

மேலும், "சரி, அதை முறையாக நிர்வாகம் செய்து பேருந்து வசதிகளை உறுதி செய்தார்களா என்றால், அதுவும் இல்லை! இன்று வரை 'கிளாம்பாக்கம் பரிதாபங்கள்' ஓய்ந்த பாடில்லை" என்று அவர் தனது பதிவில் விமர்சித்துள்ளார். பக்ரீத் பண்டிகை மற்றும் முகூர்த்த நாட்கள் நிறைந்த இந்த வார இறுதியில் மக்கள் கூட்டம் அதிகமாக இருக்கும் என்பது அரசுக்குத் தெரிந்திருக்காதா என்றும், அதற்கான முறையான ஏற்பாடுகளைச் செய்யக்கூட இந்த ஸ்டாலின் மாடல் தி.மு.க. அரசுக்குத் திறமை இல்லையா என்றும் எடப்பாடி பழனிசாமி கேள்வி எழுப்பியுள்ளார்.

எதிர்க்கட்சித் தலைவர் வலியுறுத்தல்

"சொந்த ஊருக்குச் செல்லக்கூட மக்களைப் பரிதவிக்க வைக்கும் ஸ்டாலின் மாடல் அரசுக்கு எனது கடும் கண்டனம்" என்று தெரிவித்த அவர், கிளாம்பாக்கம் பேருந்து நிலையத்தில் பேருந்து சேவையை முறையாகவும், சீராகவும் இருப்பதை உறுதி செய்ய வேண்டும் என்று ஸ்டாலின் மாடல் தி.மு.க. அரசை வலியுறுத்தியுள்ளார். இந்தப் பதிவு தமிழகம் முழுவதும் மக்களிடையே பரவலாகப் பகிரப்பட்டு வருகிறது.