புரோ கபடி: யு-மும்பா அணிக்கு படுதோல்வியை பரிசளித்தது அரியாணா ஸ்டீலர்ஸ்…

Pro Kabaddi Aurani Stylers has been rewarded for the U-Mumbai team ...

புரோ கபடி லீக் சீசன் – 5 போட்டியின் 108-வது ஆட்டத்தில் அரியாணா ஸ்டீலர்ஸ் அணி 41-30 என்ற புள்ளிகள் கணக்கில் யு மும்பா அணியை வீழ்த்தியது.

புரோ கபடி லீக் சீசன் – 5 போட்டியின் 108-வது ஆட்டம் சென்னையில் நேற்று நடைபெற்றது.

இந்த ஆட்டத்தில் அபாரமாக ஆடிய அரியாணா அணி, யு மும்பா கேப்டன் அனுப் குமாரை வீழ்த்தி தனது முதல் புள்ளியை தொடங்கியது.

அதன்பிறகு யு மும்பா வீரர் ஸ்ரீகாந்த் அடுத்தடுத்து இரு புள்ளிகளைப் பெற 5-வது நிமிடத்தில் இரு அணிகளும் 3-3 என்ற கணக்கில் சமநிலையில் பெற்றன.

இதைத் தொடர்ந்து அரியாணா வீரர் விகாஸ் கன்டோலா தொடர்ச்சியாக புள்ளிகளைக் கைப்பற்ற அரியாணா அணி 7-4 என்ற கணக்கில் முன்னிலை பெற்றது.

யு மும்பா வீரர் காசிலிங் அடாகே 2 புள்ளிகளை கைப்பற்றியும் எனினும், அரியாணா வீரர் வாஸிர் சிங் ஒரு புள்ளியை கைப்பற்ற, அந்த அணி 8-7 என்ற கணக்கில் முன்னிலையை தக்கவைத்துக் கொண்டது.

ஆட்டத்தின் 13-வது நிமிடத்தில் ரைடு சென்ற யு மும்பா கேப்டன் அனுப் குமார் 'சூப்பர் ரைடு' மூலம் 3 புள்ளிகளைப் பெற அந்த அணி 10-8 என்ற கணக்கில் முன்னிலைப் பெற்றது.

இதன்பிறகு அரியாணா ரைடர்கள் தாஹியாவும், விகாஸ் கன்டோலாவும் தொடர்ச்சியாக புள்ளிகளைக் குவிக்க 16-வது நிமிடத்தில் 14-10 என்ற கணக்கில் அரியாணா முன்னேறியது. இதனால் மீண்டும் பின்னடைவைச் சந்தித்த யு மும்பா அணி 11-வது நிமிடத்தில் 'ஆல் ஔட்' ஆனதால் அரியாணா 19-14 என்ற கணக்கில் முன்னிலைப் பெற்றது.

தொடர்ந்து தாஹியாவும், விகாஸ் கன்டோலாவும் அபாரமாக ஆட, முதல் பாதி ஆட்டநேர முடிவில் 22-16 என்ற புள்ளிகள் கணக்கில் முன்னிலையில் இருந்தது அரியாணா.

பின்னர் நடைபெற்ற 2-வது பாதி ஆட்டத்தில் யு மும்பா கேப்டன் அனுப் குமார் தொடர்ந்து போராடி 33-வது நிமிடத்தில் 24-32 என்ற கணக்கில் அந்த அணி பின்தங்கியிருந்தது.

மறுபுறம், தொடர்ந்து ஆதிக்கம் செலுத்திய அரியாணா அணி, 36-வது நிமிடத்தில் 2-வது முறையாக யு மும்பா அணியை ஆல் ஔட் செய்ததால் அந்த அணி 38-27 என்ற கணக்கில் முன்னிலை பெற்றது.

இறுதியில் அரியாணா 41-30 என்ற புள்ளிகள் கணக்கில் அபார வெற்றி கண்டது.

அரியாணா தரப்பில் தாஹியா, விகாஸ் கன்டோலா ஆகியோர் தலா 8 புள்ளிகளை கைப்பற்றினர்.

யு மும்பா தரப்பில் கேப்டன் அனுப் குமார் 10 புள்ளிகளைக் கைப்பற்றி 'சூப்பர் 10' அந்தஸ்தை பெற்றார்.

10-வது வெற்றியின் மூலம் அரியாணா அணி, 'ஏ' பிரிவு புள்ளிகள் பட்டியலில் 64 புள்ளிகளுடன் தொடர்ந்து 2-வது இடத்தில் உள்ளது.

இதுவரை 19 ஆட்டங்களில் விளையாடி 9-வது தோல்வியை சந்தித்துள்ள யு மும்பா அணி, 'ஏ' பிரிவு புள்ளிகள் பட்டியலில் 54 புள்ளிகளுடன் 4-ஆவது இடத்தில் உள்ளது.