தேசிய கூடைப்பந்து சாம்பியன்ஷிப்: முதல் நாள் ஆட்டத்திலேயே தமிழகத்திற்கு அசத்தல் வெற்றி

National basketball championship Tamil Nadu won first day of the game

தேசிய கூடைப்பந்து சாம்பியன்ஷிப் போட்டியின் முதல் நாள் ஆட்டங்களில் ஆடவர் மற்றும் மகளிருக்கான பிரிவுகளில் தமிழகம் வெற்றிப் பெற்று அசத்தியுள்ளது.

ஆடவர் மற்றும் மகளிருக்கான 68-வது தேசிய சீனியர் சாம்பியன்ஷிப் போட்டிகள் சென்னை ஜவாஹர்லால் நேரு விளையாட்டரங்கில் நேற்று தொடங்கியது.

இதில் ஆடவர் பிரிவில் 'தகுதி-1'-இன் 'பி' பிரிவு ஆட்டத்தில் தமிழகம் 113-58 என்ற புள்ளிகள் கணக்கில் அரியாணாவை வென்றது.  அதிகபட்சமாக தமிழகத்தின் ஜஸ்டின் 22 புள்ளிகள், அரியாணாவின் அங்கித் 18 புள்ளிகள் எடுத்தனர்.

அதேபோல, பஞ்சாப் 76-65 என்ற புள்ளிகள் கணக்கில் குஜராத்தை வீழ்த்தியது. பஞ்சாப் வீரர் குர்வீந்தர் சிங், குஜராத் வீரர் ஹர்பால் அதிக புள்ளிகள் எடுத்தனர்.

மற்றொரு பிரிவான 'ஏ' பிரிவு ஆட்டத்தில் உத்தரகண்ட் 85-62 என்ற கணக்கில் ஒடிஸாவை வென்றது. உத்தரகண்ட் வீரர் மோஹித் பந்தாரி, ஒடிஸா வீரர் சுமன் சாஹு அதிக புள்ளிகளை கைப்பற்றினர்.

அதேபோல ஆந்திர பிரதேசம் 76-75 என்ற கணக்கில் ஜம்மு காஷ்மீரையும், புதுச்சேரி 54-22 என்ற கணக்கில் தெலங்கானாவையும், சத்தீஸ்கர் 49-32 என்ற கணக்கில் கோவாவையும், உத்தரப் பிரதேசம் 88-76 என்ற கணக்கில் மேற்கு வங்கத்தையும் வென்றன.

இந்தப் போட்டியின் மகளிர் பிரிவில் தமிழகம் 68-48 என்ற புள்ளிகள் கணக்கில் மத்திய பிரதேசத்தை வென்றது.

அதேபோல, ராஜஸ்தான் 89-61 என்ற புள்ளிகள் கணக்கில் தெலங்கானாவையும், இந்தியன் இரயில்வே 89-39  என்ற புள்ளிகள் கணக்கில் டெல்லியை வீழ்த்தியது.