இங்கிலாந்துக்கு எதிரான ஆட்டத்தில் 235 ரன்கள் குவித்தார் கோலி…

இங்கிலாந்துக்கு எதிரான 4-ஆவது டெஸ்ட் கிரிக்கெட் போட்டியில் இந்தியா தனது முதல் இன்னிங்ஸில் 182.3 ஓவர்களில் 631 ரன்கள் குவித்து ஆட்டமிழந்தது.

இந்திய கேப்டன் விராட் கோலி 235 ரன்கள் குவித்தார். 9-ஆவது வீரராக களமிறங்கிய ஜெயந்த் யாதவ் 104 ரன்கள் எடுத்தார். கோலி-ஜெயந்த் யாதவ் ஜோடி 8-ஆவது விக்கெட்டுக்கு 241 ரன்கள் குவித்து இந்தியா இமாலய ஸ்கோரை குவிக்க உதவியது.
முதல் இன்னிங்ஸில் 231 ரன்கள் பின்தங்கிய நிலையில் 2-ஆவது இன்னிங்ûஸ ஆடிய இங்கிலாந்து அணி 4-ஆவது நாள் ஆட்டநேர முடிவில் 47.3 ஓவர்களில் 6 விக்கெட் இழப்புக்கு 182 ரன்கள் எடுத்துள்ளது. இந்தியாவின் முதல் இன்னிங்ஸ் ஸ்கோரை எட்டுவதற்கு அந்த அணி இன்னும் 49 ரன்கள் எடுக்க வேண்டியுள்ளது. ஆனால் கைவசம் 4 விக்கெட்டுகள் மட்டுமே உள்ளதால் அந்த அணி இன்னிங்ஸ் தோல்வியைத் தவிர்க்க போராடி வருகிறது.
மும்பையில் நடைபெற்று வரும் இந்தப் போட்டியில் இங்கிலாந்து தனது முதல் இன்னிங்ஸில் 130.1 ஓவர்களில் 400 ரன்கள் குவித்தது. அந்த அணியில் அதிகபட்சமாக ஜென்னிங்ஸ் 112, ஜோஸ் பட்லர் 76 ரன்கள் குவித்தனர். இந்தியத் தரப்பில் அஸ்வின் 6 விக்கெட்டுகளையும், ஜடேஜா 4 விக்கெட்டுகளையும் சாய்த்தனர்.
இதையடுத்து முதல் இன்னிங்ûஸ ஆடிய இந்திய அணியில் முரளி விஜய், கேப்டன் கோலி ஆகியோர் சதமடிக்க, 3-ஆவது நாள் ஆட்டநேர முடிவில் 142 ஓவர்களில் 7 விக்கெட் இழப்புக்கு 451 ரன்கள் குவித்திருந்தது. கோலி 147, ஜெயந்த் யாதவ் 30 ரன்களுடன் களத்தில் இருந்தனர்.
கோலி இரட்டைச் சதம்: 4-ஆவது நாளான ஞாயிற்றுக்கிழமை தொடர்ந்து ஆடிய இந்திய அணியில் கேப்டன் கோலி 246 பந்துகளில் 150 ரன்களை எட்ட, ஜெயந்த் 103 பந்துகளில் அரை சதத்தை எட்டினார். இதனால் 153-ஆவது ஓவரில் 500 ரன்களைக் கடந்தது இந்தியா.
இதன்பிறகு தொடர்ந்து சிறப்பாக ஆடிய கேப்டன் கோலி 302 பந்துகளில் இரட்டைச் சதத்தை எட்டினார். இந்த ஆண்டில் அவர் அடித்த 3-ஆவது இரட்டைச் சதம் இது. மறுமுனையில் அசத்தலாக ஆடிய ஜெயந்த் யாதவ், மதிய உணவு இடைவேளைக்குப் பிறகு 196 பந்துகளில் சதத்தை எட்டினார். இதன்மூலம் 9-ஆவது பேட்ஸ்மேனாக களமிறங்கி சதமடித்த முதல் இந்தியர் என்ற பெருமையைப் பெற்றார்.
இந்தியா 176.3 ஓவர்களில் 605 ரன்களை எட்டியபோது ஜெயந்த் யாதவ் ஆட்டமிழந்தார். அவர் 204 பந்துகளில் 15 பவுண்டரிகளுடன் 104 ரன்கள் குவித்தார். அவரைத் தொடர்ந்து கோலி 235 ரன்களில் ஆட்டமிழந்தார். அவர் 340 பந்துகளில் 1 சிக்ஸர், 25 பவுண்டரிகளுடன் இந்த ரன்களை எடுத்தார். கடைசி விக்கெட்டாக புவனேஸ்வர் குமார் 9 ரன்களில் வெளியேற, இந்தியா 182.3 ஓவர்களில் 631 ரன்களுக்கு ஆட்டமிழந்தது.
இங்கிலாந்து தரப்பில் ஆதில் ரஷித் 4 விக்கெட்டுகளை சாய்த்தார். மொயீன் அலி, ஜோ ரூட் ஆகியோர் தலா 2 விக்கெட்டுகளை வீழ்த்தினர்.
இங்கிலாந்து-182/6: முதல் இன்னிங்ஸில் 231 ரன்கள் பின்தங்கிய நிலையில் 2-ஆவது இன்னிங்ûஸ ஆடிய இங்கிலாந்து அணிக்கு ஆரம்பமே அதிர்ச்சிக் காத்திருந்தது. முதல் இன்னிங்ஸில் சதமடித்த ஜென்னிங்ஸ் ரன் கணக்கைத் தொடங்குவதற்கு முன்னதாவே புவனேஸ்வர் குமார் பந்துவீச்சில் ஆட்டமிழந்தார்.
இதையடுத்து ஜோ ரூட் களமிறங்க, கேப்டன் அலாஸ்டர் குக் 18 ரன்களிலும், பின்னர் வந்த மொயீன் அலி ரன் ஏதுமின்றியும் நடையைக் கட்டினர். இதனால் 49 ரன்களுக்கு 3 விக்கெட்டுகளை இழந்து தத்தளித்தது இங்கிலாந்து.
இதையடுத்து ஜோ ரூட்டுடன் இணைந்தார் ஜானி பேர்ஸ்டோவ். நிதானமாக ஆடிய இந்த ஜோடி 4-ஆவது விக்கெட்டுக்கு 92 ரன்கள் சேர்த்தது. இங்கிலாந்து 141 ரன்களை எட்டியபோது ஜோ ரூட் 77 ரன்களில் (112 பந்துகளில்) ஆட்டமிழக்க, மீண்டும் சரிவுக்குள்ளானது. பின்னர் வந்த பென் ஸ்டோக்ஸ் 18 ரன்களிலும், ஜேக் பால் 2 ரன்களிலும் அஸ்வின் பந்துவீச்சில் ஆட்டமிழந்தனர்.
4-ஆவது நாள் ஆட்டநேர முடிவில் இங்கிலாந்து அணி 47.3 ஓவர்களில் 6 விக்கெட் இழப்புக்கு 182 ரன்கள் எடுத்துள்ளது. ஜானி பேர்ஸ்டோவ் 50 ரன்களுடன் களத்தில் உள்ளார். இந்தியத் தரப்பில் ஜடேஜா, அஸ்வின் ஆகியோர் தலா 2 விக்கெட்டுகளை சாய்த்துள்ளனர்.
கடைசி நாள் ஆட்டம் திங்கள்கிழமை நடைபெறுகிறது. இந்தியாவின் முதல் இன்னிங்ஸ் ஸ்கோரை எட்டுவதற்கு இங்கிலாந்து அணி இன்னும் 49 ரன்கள் எடுக்க வேண்டியுள்ளது. ஆனால் கைவசம் 4 விக்கெட்டுகள் மட்டுமே உள்ளன. இதனால் அந்த அணி இன்னிங்ஸ் தோல்வியை சந்திக்கும் நிலைக்கு தள்ளப்பட்டுள்ளது.