சர்வதேச டென்னிஸ் தரவரிசையில் ஜோகோவிச்சுக்கு பின்னடைவு…

Jokovich reversal in international tennis rankings

சர்வதேச டென்னிஸ் (ஏடிபி) தரவரிசையில் உலகின் முன்னணி வீரர்களில் ஒருவரான செர்பியாவின் நோவக் ஜோகோவிச் ஒரு இடம் பின்தங்கி 5-வது இடத்துக்கு தள்ளப்பட்டுள்ளார்.

2017 சீசனின் எஞ்சியப் போட்டிகளில் விளையாடப் போவதில்லை என்று ஜோகோவிச் சில நாள்களுக்கு முன்பு அறிவித்திருந்தார். முழங்கையில் ஏற்பட்ட காயம் காரணமாக அவர் இந்த முடிவை எடுத்தார்.

இந்த நிலையில் சர்வதேச டென்னிஸ் (ஏடிபி) தரவரிசையில் 4-வது இடத்தில் இருந்த ஜோகோவிச் தற்போது 5-வது இடத்துக்கு பின்தங்கினார்.

பிரிட்டனின் ஆன்டி முர்ரே முதலிடத்திலும், ஸ்பெயினின் ரஃபேல் நடால் இரண்டாவது இடத்திலும், ஸ்விட்சர்லாந்தின் ரோஜர் ஃபெடரர் மூன்றாவது இடத்திலும் உள்ளனர்.

5-வது இடத்தில் இருந்த ஸ்விட்சர்லாந்து வீரரான ஸ்டானிஸ்லஸ் வாவ்ரிங்கா 4-வது இடத்துக்கு முன்னேறியுள்ளார்.

ஜெர்மனி வீரர் அலெக்சாண்டர் ஸ்வெரேவ் மூன்று இடங்கள் முன்னேறி 8-வது இடத்தைப் பிடித்துள்ளார்.

ஹம்பர்க் ஓபனில் பட்டம் வென்ற ஆர்ஜென்டீனாவின் லியானார்டோ மேயர் 89 இடங்கள் முன்னேறி 49-வது இடத்தைப் பிடித்துள்ளார்.

மகளிர் தரவரிசையைப் பொறுத்தவரையில் செக்.குடியரசின் கரோலினா பிளிஸ்கோவா முதலிடத்திலும், ருமேனியாவின் சைமோனா ஹேலப் இரண்டாவது இடத்திலும், ஜெர்மனியின் ஏஞ்ஜெலிக் கெர்பர் மூன்றாவடு இடத்திலும், விம்பிள்டன் சாம்பியனான ஸ்பெயினின் கார்பைன் முகுருஸா நான்காவது இடத்திலும் உள்ளனர்.

ஜியாங்க்ஸி ஓபனில் பட்டம் வென்ற சீனாவின் பெங் ஷுவாய் 23-வது இடத்துக்கு முன்னேறியுள்ளார்.

செக்.குடியரசின் கேத்தரினா சினியாகோவா 17 இடங்கள் முன்னேறி 39-வது இடத்தைப் பிடித்துள்ளார்.