Vipraj Nigam: வீரர் செய்த தவறால் 10 ரன்கள் தண்டம் கட்டிய இந்தியா..! யார் இந்த விப்ராஜ் நிகம்

இந்தியா A அணியின் விப்ராஜ் நிகம் மற்றும் அனுகுல் ராய் செய்த தவறுகளால் அணிக்கு பெரும் பின்னடைவு ஏற்பட்டது. ஆட்டம் தொடங்குவதற்கு முன்பே இலங்கை A அணிக்கு 10 ரன்கள் போனஸாக கிடைத்தது எப்படி? இந்த ரன்களால் தான் ஜெயிக்க வேண்டிய போட்டி டிராவில் முடிந்ததா? முழு விவரம் இங்கே.

Cricket Penalty Runs Rule: இலங்கையின் தம்புல்லாவில் நடக்கும் A அணிகளுக்கான முத்தரப்பு தொடரின் நான்காவது போட்டியில், இந்தியா A அணி வீரர்கள் செய்த தொடர் தவறுகள் ரொம்பவே காஸ்ட்லியாக அமைந்தது. இந்த தவறுகளால் இலங்கை A அணிக்கு, ஆட்டம் தொடங்குவதற்கு முன்பே 10 ரன்கள் போனஸாக கிடைத்தது. இந்தியா A தரப்பில் அனுகுல் ராய் மற்றும் விப்ராஜ் நிகம் ஆகியோர்தான் இந்த தவறுகளைச் செய்தனர். இதில் வேடிக்கை என்னவென்றால், ஒருமுறை எச்சரிக்கை விடுத்த பிறகும் விப்ராஜ் நிகம் மீண்டும் அதே தவறைச் செய்தார். இதன் விளைவை ஒட்டுமொத்த அணியும் சந்திக்க வேண்டியிருந்தது.

யார் இந்த விப்ராஜ் நிகம்?

விப்ராஜ் நிகம், இந்திய கிரிக்கெட்டில் வளர்ந்து வரும் ஆல்-ரவுண்டர்களில் ஒருவராகக் கருதப்படுகிறார். இவர் வலது கை பேட்ஸ்மேன் மற்றும் லெக்-பிரேக் பந்துவீச்சாளர். ஜூலை 28, 2004-ல் உத்திரப் பிரதேசத்தின் பாராபங்கியில் பிறந்தார். உள்ளூர் போட்டிகளில் உத்திரப் பிரதேச அணிக்காக விளையாடி வருகிறார். UP T20 லீக்கில் லக்னோ ஃபால்கன்ஸ் அணிக்காக 20 விக்கெட்டுகளை வீழ்த்தியபோதுதான் இவர் முதன்முதலில் கவனிக்கப்பட்டார். அந்த சிறப்பான ஆட்டத்திற்குப் பிறகு, சையத் முஷ்டாக் அலி டிராபி மற்றும் ரஞ்சி டிராபி போட்டிகளில் உத்திரப் பிரதேச அணியில் இவருக்கு இடம் கிடைத்தது. ஐபிஎல் 2025 மெகா ஏலத்தில், டெல்லி கேபிடல்ஸ் அணி இவரை 50 லட்ச ரூபாய்க்கு வாங்கியது. தனது அறிமுகப் போட்டியிலேயே லக்னோ சூப்பர் ஜெயண்ட்ஸ் அணிக்கு எதிராக வெறும் 15 பந்துகளில் 39 ரன்கள் விளாசி அசத்தினார். பந்துவீச்சிலும் முக்கிய விக்கெட்டுகளை எடுத்து அணியின் வெற்றிக்கு உதவினார்.

அனுகுல் ராய் மற்றும் விப்ராஜ் நிகம் செய்த தவறு என்ன?

• இந்தியா A பேட்டிங் செய்துகொண்டிருந்தபோது, 33-வது ஓவரில் முதல் தவறு நடந்தது. ஆல்-ரவுண்டர் அனுகுல் ராய், பிட்ச்சின் பாதுகாக்கப்பட்ட பகுதியான 'புரோடெக்டட் ஏரியா' மீது ஓடியது கண்டுபிடிக்கப்பட்டது. இதையடுத்து, நடுவர் அணிக்கு முதல் எச்சரிக்கையை விடுத்தார்.
• ஆனால் இரண்டு ஓவர்கள் கழித்து, 35-வது ஓவரில், விப்ராஜ் நிகமும் அதே பகுதியில் ஓடினார். இது இரண்டாவது தவறு என்பதால், விதிப்படி ஃபீல்டிங் செய்துகொண்டிருந்த இலங்கை A அணிக்கு 5 ரன்கள் பெனால்டியாக வழங்கப்பட்டது.
• தவறுகள் இத்துடன் நிற்கவில்லை. 37-வது ஓவரில், விப்ராஜ் நிகம் மீண்டும் புரோடெக்டட் ஏரியாவில் ஓடினார். இதன் விளைவாக, இந்தியா A அணிக்கு இரண்டாவது முறையாக 5 ரன்கள் பெனால்டி விதிக்கப்பட்டது.
• இப்படி, மொத்தமாக 10 ரன்கள் இலங்கை A அணியின் கணக்கில் சேர்க்கப்பட்டது. இதனால், ஒரு பந்துகூட வீசப்படாத நிலையில், இலங்கை அணி 10/0 என்ற ஸ்கோருடன் தனது இன்னிங்ஸைத் தொடங்கியது.

கிரிக்கெட்டில் 'புரோடெக்டட் ஏரியா' விதி என்றால் என்ன?

• கிரிக்கெட்டில் பிட்ச்சின் நடுப்பகுதி மிகவும் முக்கியமானதாகக் கருதப்படுகிறது. இந்த பகுதிதான் "புரோடெக்டட் ஏரியா" என்று அழைக்கப்படுகிறது. விதிகளின்படி, பேட்ஸ்மேன்கள் வேண்டுமென்றோ அல்லது கவனக்குறைவாகவோ இந்தப் பகுதியில் ஓட அனுமதிக்கப்படுவதில்லை. ஒரு வீரர் முதல் முறையாக இப்படிச் செய்தால், நடுவர் எச்சரிக்கை கொடுப்பார்.
• அதற்குப் பிறகும் அதே அணி மீண்டும் அந்த விதியை மீறினால், எதிரணிக்கு 5 ரன்கள் பெனால்டியாக வழங்கப்படும். இந்தத் தவறு மீண்டும் மீண்டும் தொடர்ந்தால், ஒவ்வொரு முறையும் கூடுதலாக 5 ரன்கள் எதிரணியின் கணக்கில் சேர்க்கப்படும்.

புரோடெக்டட் ஏரியாவைப் பாதுகாப்பது ஏன் அவசியம்?

பிட்ச்சின் இந்தப் பகுதி பந்துவீச்சாளர்கள் மற்றும் பேட்ஸ்மேன்கள் இருவருக்குமே ஆட்டத்தின்போது ரொம்பவே முக்கியம். வீரர்களின் ஷூக்களில் உள்ள ஸ்பைக்ஸ் (spikes) இந்தப் பகுதியை சேதப்படுத்த வாய்ப்புள்ளது. இந்தப் பகுதியில் தொடர்ந்து ஓடினால், பிட்ச்சில் பள்ளங்கள் மற்றும் கரடுமுரடான பகுதிகள் உருவாகும். இது பந்தின் பவுன்ஸ், டர்ன் மற்றும் ஆட்டத்தின் போக்கையே பாதிக்கக்கூடும். இதனால்தான், கிரிக்கெட் விதிகள் இந்தப் பகுதியைப் பாதுகாப்பதில் மிகவும் கடுமையாக இருக்கின்றன. மீறினால் பெனால்டியும் விதிக்கப்படுகிறது.

பெரிய விலையைக் கொடுத்த இந்தியா A அணி

அனுகுல் ராய் மற்றும் விப்ராஜ் நிகம் செய்த மூன்று தவறுகளால், இந்தியா A அணிக்கு 10 ரன்கள் இழப்பு ஏற்பட்டது. மறுபுறம், இலங்கை A அணிக்கு ஒரு பந்துகூட சந்திக்காமல் 10 ரன்கள் கிடைத்தது. கிரிக்கெட்டில் இதுபோன்ற சம்பவங்கள் மிக அரிதாகவே நடக்கும். அதனால்தான், தம்புல்லாவில் நடந்த இந்தப் போட்டி, வீரர்களின் தவறுகள் மற்றும் பெனால்டி ரன்களால் கிரிக்கெட் உலகில் பேசுபொருளாக மாறியுள்ளது.