Shane Warne: 10வது ஸ்டம்பில் பிட்ச் ஆகி லெக் ஸ்டம்பை கழட்டி எறிந்த வார்ன்! வரலாற்று சிறப்புமிக்க பந்து வீடியோ

ஆஸ்திரேலியாவின் முன்னாள் சுழல் ஜாம்பவான் ஷேன் வார்ன் 52 வயதில் மாரடைப்பால் இன்று திடீரென உயிரிழந்து, கிரிக்கெட் உலகை அதிர்ச்சியிலும் சோகத்திலும் ஆழ்த்தியுள்ளார். இந்நிலையில், அவர் வீசிய வரலாற்று சிறப்புமிக்க பந்துகளில் ஒன்றான, அன்வரின் விக்கெட்டை வீழ்த்திய சுழற்பந்தின் வீடியோ இதோ....  

டெஸ்ட் கிரிக்கெட்டில் முரளிதரனுக்கு(800 விக்கெட்டுகள்) அடுத்து அதிக விக்கெட்டுகள் வீழ்த்திய பவுலர் ஷேன் வார்ன். ஷேன் வார்ன் டெஸ்ட் கிரிக்கெட்டில் 708 விக்கெட்டுகளை வீழ்த்தியுள்ளார். 

1992ம் ஆண்டு முதல் 2007ம் ஆண்டு வரை ஆஸ்திரேலிய அணியில் ஆடிய வார்ன், சச்சின் டெண்டுல்கர், பிரயன் லாரா, ராகுல் டிராவிட், ஜாக் காலிஸ், ஜெயசூரியா போன்ற தலைசிறந்த பேட்ஸ்மேன்களை தனது மாயாஜால சுழலால் திணறடித்தவர். 

ரிஸ்ட் ஸ்பின்னரான ஷேன் வார்ன் வீசியுள்ள சில சுழற்பந்துகள், காலத்தால் அழியாதவை. பேட்ஸ்மேன்களை அதிரவைக்குமளவிற்கு தாறுமாறாக பந்தை திருப்பி தெறிக்கவிட்டுள்ளார் ஷேன் வார்ன். 

அப்படியான மாயாஜால சுழல்களில்  ஒரு பந்துதான் 1999ம் ஆண்டு பாகிஸ்தான் வீரர் சயீத் அன்வரின் விக்கெட்டை வீழ்த்திய பந்து. 1999ல் ஆஸ்திரேலியாவின் ஹோபர்ட்டில் நடந்த டெஸ்ட் போட்டியில், பாகிஸ்தான் அணியின் இரண்டாவது இன்னிங்ஸில், அந்த அணியின் டாப் ஆர்டர் பேட்ஸ்மேன் சயீத் அன்வரை, தனது மாயாஜால சுழலில் க்ளீன் போல்டாக்கி மிரட்டினார் வார்ன். 

அந்த குறிப்பிட்ட போட்டியின் முதல் இன்னிங்ஸில் டக் அவுட்டான அன்வர், இரண்டாவது இன்னிங்ஸில் 78 ரன்களுடன் களத்தில் இருந்தபோதுதான், வார்ன் அந்த வரலாற்று சிறப்புமிக்க பந்தை வீசினார். 

இடது கை பேட்ஸ்மேனான அன்வருக்கு ஷேன் வார்ன் வீசிய அந்த பந்து, ஆஃப் ஸ்டம்புக்கு வெளியே, அதாவது கிட்டத்தட்ட பத்தாவது ஸ்டம்பில்(லெக் ஸ்டம்ப்பிலிருந்து) பிட்ச் ஆகி, தாறுமாறாக திரும்பி, லெக் ஸ்டம்பை கழட்டியது. ஸ்டம்பையும் விக்கெட்டையும் பறிகொடுத்த அன்வரே, வார்னின் அந்த பந்தை ரசித்து சிரித்துக்கொண்டே சென்றார். 

ஷேன் வார்ன் 52 வயதில் மாரடைப்பால் இன்று திடீரென உயிரிழந்து, கிரிக்கெட் உலகை அதிர்ச்சியிலும் சோகத்திலும் ஆழ்த்தியுள்ள நிலையில், அவர் வீசிய வரலாற்று சிறப்புமிக்க பந்துகளில் ஒன்றான, அன்வரின் விக்கெட்டை வீழ்த்திய சுழற்பந்தின் வீடியோ இதோ....